Z wudaća: póndźela, 12 apryla 2021

Incidenca hranicu 200 překročiła

Budyšin. Z incidencu 233,2 zwěsći Roberta Kochowy institut dźensa za Budyski wokrjes nahladny postup natyknjenjow z koronawirusom. Dokelž su w strowotniskim zarjedźe kónc tydźenja nowu software instalowali, hakle jutře naj­nowše ličby wozjewja. W Zhorjelskim wokrjesu informowachu wčera wo 80 ­natyknjenjach a dwěmaj smjertnymaj padomaj. Po RKI wučinja tamniša incidenca dźensa 198,2.

Předpředań zahajili

Zły Komorow. Nowe jewišćo w Złym Komorowje je wčera předpředań za lětnju sezonu w Kóšynskim amfiteatrje při Złokomorowskim jězorje zahajiło. Mjez 70 zarjadowanjemi su tři swójske nowoprodukcije planowane. Koronapandemije dla předawaja tuchwilu jenož 50 zastupnych lisćikow na jednotliwe předstajenje. Poskitk pak chcedźa přichodnym předpisam přiměrić.

Dźensa koncert Caroliny Eyckec

Po wjac hač lětdźesatkomaj su lětsa w Róžeńće na próstwu dźěći rjanu tradiciju wozrodźili. Sobotu popołdnju ćehnješe wot ­Róžeńčanskeje putniskeje cyrkwje dźěćacy křižerski procesion přez Łazk a Sernjany zaso domoj do Róžanta. Sydom porow dźěći pod nawodom kantora Johana Šnajdra na swojich wupyšenych drjewjanych konikach spěwaše jutrowne kěrluše a so při wjacorych swjatych křižach po puću pomodli. Tež samodźěłanej křižerskej chorhoji běchu sej wobstarali. Foto: Konstantin Hrjehor

Budyšin (SN/JaW). Domowina chce so wo zakonsce płaćiwy namjet zastupnika abo zastupniče Serbow w rozhłosowej radźe MDR starać. To podšmórny před­syda Domowiny Dawid Statnik w nowinskej zdźělence. Zdobom wón po­twjerdźi, zo ma Domowina jako třěšny zwjazk serbskich towarstwow „demokratisce legitimowany nadawk, zastupjerja abo zastupjerku Serbow za rozhłosowu radu MDR wolić“.

Krabatowe swjedźenske hry znowa wotprajene

Čorny Chołmc (SN/CoR). Štóž je sej loni swoje zastupne lisćiki za wupadnjene Krabatowe swjedźenske hry za lětuše wobchował, dyrbi to nětko dale. Tež lětsa woblubowany lětni dźiwadłowy spektakl pod hołym njebjom w Čornym Chołmcu njebudźe.

„Poprawom njeje hišće oficialne, fakt pak je, zo tež lětsa festiwal přewjesć njemóžemy“, rozłoži jednaćel Krabatoweho młyna Tobias Čižik na naprašowanje našeho wječornika. „Tež hdyž so pandemija w lěću změruje, přiwšěm z toho wuchadźamy, zo njesměmy před 800 ludźimi hrać. Za połojcu wopytowarjow pak njeje tajka produkcija absolutnje financujomna. Dyrbimy tuž swjedźenske hry bohužel chcyjo nochcyjo hišće raz přestorčić.“ Zastupne lisćiki wostanu za klětu dale płaćiwe, ludźo móža pak je tež wróćić, za čož dóstanu pjenjezy zarunane. „Tuchwilu rozmyslujemy wo tym, našemu publikumej něšto hinaše mjeńšeho razu poskićeć, tak impozantne kaž naš festiwal pak na žadyn pad njebudźe“, Tobias Čižik rjekny.

Rowno (SN/BŠe). Brunicowy koncern Łužiska energija a milinarnje (LEAG) je prěni raz hrozył, lěs blisko Wochožanskeje wuhloweje jamy wuswojić. Tuchwilu Cho­ćebuska wobswětowa skupina Zeleneje ­ligi ležownosć wotnaja. Wobswětoškitne zjednoćenstwo pak njeda so zatrašić ­a chce ze swojimi aktiwitami we wohroženym lěsu pokročować. Swoju zwólniwosć, dale za přestrjeń wojować, su hakle wčera zaso wobkrućili a protestnu akciju přewjedli. Tak přihotowachu za nju dźesać metrow dołhi baner z napisom „Njepředajomny“. Renej Šuster z Choćebuskeje Zeleneje ligi potwjerdźi, zo nima LEAG hižo dosć argumentow za hórnistwowu potrjebu ležownosće. „Tuchwilu dźě ani jasne njeje, hač móže koncern rekultiwěrowanje zapłaćić“, Šuster wčera wuzběhny. „Chcemy swój lěs zachować, zo njeby brunicowa jama hač do Rownoho abo Mułkec sahała.“ Tež pohórnistwowy jězor njeby potom hižo tak wulki był a přichodne hrožace kóšty bychu so pomjeńšili.“

AquaTech Łužica chce Łužicu na pioněrski region nastupajo nowe surowizny z wody wuwiwać.

Njebjelčicy/Drježdźany (SN). Nimale 50 zajimcow je so minjeny štwórtk na prěnim sympoziju inowaciskeho zwjazka AquaTech Łužica wobdźěliło, informuje zwjazk. Zastupnicy ze wšelakich wobłukow, kaž slědźenja, hospodarstwa a politiki, „diskutowachu nadrobnje wo zwoprawdźomnych, hospodarsce wužiwajomnych a inowatiwnych wobłukach zhromadneho skutkowanja za strukturnu změnu we Łužicy“, wuswětla poradźowar Njebjelčan­skeje Greentec Consult tzwr Andreas Kretsch­mer w nowinskej zdźělence.

Saarbrücken (dpa/SN). W Posaarskej je sydomdnjowska incidenca hižo tři dny za sobu hódnotu sto překročiła. Tuž je tak mjenowana koronowa ampla wot zeleneje na žołtu barbu přešaltowała. Wot dźensnišeho płaći rozšěrjena winowatosć testowanja nětko tež we wobchodach a ćěłu bliske posłužby nastupajo, kaž strowotniske ministerstwo informuje. W Posaarskej běchu minjenu wutoru wonkownu gastronomiju, dźiwadła, kina a fitnesowe studija zaso wotewrěli.

Nuzowy staw skónčeny

Praha (dpa/SN). W Čěskej su minjenu nóc hižo poł lěta płaćiwy nuzowy staw skónčili. Tak je zakaz, region wopušćić, runje tak zběhnjeny kaž zakaz, w nocy dom wopušćić. Přiwšěm su hosćency a wobchody dale zawrjene. Nimo toho dyrbja ludźo w zjawnosći dale nahubnik wužiwać. Po wšěm kraju płaćiwy nuzowy staw běchu loni 5. oktobra wukazali a wospjet podlěšili. Ličba nowych infekcijow na 100 000 wobydlerjow wučinja 808 a je trójce tak wulka kaž w Němskej.

Heil chce winowatosć testow

Zwjazkowy prezident Frank-Walter Steinmeier (srjedźa) je wčera składnostnje 76. róčnicy wuswobodźenja bywšeho koncentraciskeho lěhwa Buchenwald wopomnišćo njedaloko Weimara wopytał. Durinski ministerski prezident Bodo Ramelow (Lěwica) jeho přewodźeše. W lěhwje běchu nacionalsocialisća něhdźe 56 000 zawlečenych morili. Foto: pa/Markus Schreiber

Mylnje eksmatrikulowała je Swobodna uniwersita w Berlinje 2 600 studentow. Přičina bě techniski zmylk. Studenća njeběchu swój studijny popłatk w prawym času přepokazali a běchu hižo napominani. Poprawom dóstawaja potrjecheni w tym padźe druhe napominanje. Město toho pak připósła jim knihowanski system hnydomnu eksmatrikulaciju. Mjeztym su wšitkich wo misnjenju informowali a zmylk w systemje sporjedźeli.

Přepjany za alkoholowy test bě šofer nakładneho awta w badensko-württembergskim Herbrechtingenje. Do toho bě wón ze swojim jězdźidłom na parkowanišću do připowěšaka dalšeho Lkw-ja zrazył, a to tak jara, zo bu připowěšak do pódla stejaceho awta stłóčeny. 31lětny bě tak wopity, zo njemóžeše ani alkoholowy test přewjesć. Policisća dowjezechu jeho tuž do chorownje.

Berlin (dpa/SN). Z wotewrjenym bojom wo móc nastupajo kanclersku kandidaturu mjez předsydu CDU Arminom Laschetom a předsydu CSU Markusom ­Söderom steji unija dźensa pod wulkim ćišćom. Armin Laschet chcyše sej dopołdnja na zhromadnym posedźenju předsydstwa a prezidija CDU podpěru nawodnistwa strony zaručić a „wo dowěru prosyć“, kaž wón wčera wječor w telewiziji ARD rjekny. Na prašenje, hač z podpěru wjetšiny liči, Laschet zwurazni: „Z toho wuchadźam.“

Tež prezidiji CSU chcyše so dźensa popołdnju schadźować. Hromadźe z Laschetom wustupujo Markus Söder wčera po­twjerdźi, zo chcył jenož potom jako kancler kandidować, by-li wulku podpěru nawodnistwa CDU měł. Bayerski ministerski prezident přilubi, zo by so tež w tamnym padźe bjez hněwa zarjadował a dowěrliwje z Laschetom hromadźe dźěłał.