Z wudaća: wutora, 13 apryla 2021

Sokolca (SN/MWj). Z wótrymi słowami kritizuje frakcija Zelenych Budyskeho wokrjesneho sejmika planowany wutwar wokrjesneje dróhi K 7239 wot južneje kromy Budyšina přez Sokolcu (Soculahora) a dale hač k statnej dróze S 110 blisko Bónjec (Binnewitz). Techniski wuběrk sejmika bě spočatk měrca wobzamknył, puć za dohromady 4,5 milionow eurow wutwarić. Hłowny argument rěkaše, zo je tuchwilny puć přewuski a zo móžetej nakładnej awće lědma nimo sebje jěć.

Kaž w stejišću wokrjesneho radźićela Zelenych Franka Sühnela rěka, ma jeho frakcija dróhotwarski projekt za dwójny njezmysł, pjenježny kaž tež ekologiski. W hospodarsce napjatym času, hdyž dyrbi wokrjes hdźežkuli móžno lutować, chcedźa za wjele pjenjez puć wutwarić, kiž je hišće w dobrym stawje, jenož dokelž je za wokrjesnu dróhu přewuski. Do planowaneho wotrězka a za nim pak wostanu dróhi potom dale wuske. Nimo toho Sühnel porokuje, zo chcedźa za to něhdźe 12 800 kwadratnych metrow, potajkim nimale dwě koparskej hrajnišći zazyglować a wjace hač sto štomow podrězać.

Budyšin. Pod hesłom „Serbja we Łužicy. Drěmacy pokład w Sakskej?“ přeproša Politiski ku błanski forum Sakska Konrada Adenaueroweje załožby hišće na dwě onlinowej zarjadowani z diskusiju. Jutře, srjedu, wěnujetaj so něhdyša zapósłanča zwjazkoweho sejma a bywša předsydka Rady za serbske naležnosće Sakskeje ­Marja Michałkowa kaž tež Slepjanski wjesnjanosta Jörg Funda (CDU) temje ­„Jedyn lud, jedyn hłós!? – Politiska participacija Serbow w Sakskej“. Hosćo poslednjeho zarjadowanja 21. apryla pod hesłom „Młodźi a dynamiscy – Perspektiwy do přichoda za Serbow“ budu ­Dawid Statnik, předsyda Domowiny, kaž tež Helena Hejduškec a Jakub Wowčer ­ze Serbskeho młodźinskeho towarstwa Pawk. Za wobě zarjadowani je přizjewjenje trěbne. Z wobkrućenjom dóstanu zajimcy přistup připósłany. Link na stronu k přizjewjenju je mjez druhim pod www.posol.de wozjewjeny.

Premjera knihi wirtuelnje

Do traktorow so zadobyli

Kubšicy. Tójšto škody načinili su njeznaći minjeny kónc tydźenja na terenje firmy w Kubšicach. Tam zadobychu so do šěsć traktorow, kotrež stejachu pod hołym njebjom a w halach. Z nich pokradnychu jězdźidłowe kompjutery kaž tež GPS-nastroje. Wěcnu škodu trochuja na něhdźe 15 000 eurow. Hódnota pokradnjenych wěcow wučinja na wšě 80 000 eurow. Fachowcy zawěsćichu slědy, a kriminalisća přewzachu přepytowanja.

Kolesowar smjertnje znjezbožił

Biskopicy. Rjane wjedro je předwčera­wšim mnohich kolesowarjow won wabiło. Bohužel je při tym tež k njezbožam dóšło. W Biskopicach je 69lětny muž z dotal njeznateje přičiny z kolesom padnył, jako po Ramnowskim puću jězdźeše. Wuchowanske mocy dowjezechu jeho do chorownje, hdźež muž na sćěhi zranjenjow zemrě. Při Parcowskim jězoru je so 77lětna ćežko zraniła. Jeje mandźelski jědźeše před njej a dyrbješe zaborzdźić, štož žona přepozdźe pytny a padny. Ju dyrbjachu do chorownje dowjezć.

Hłowne koło DEL 2 njebudźe hižo dohrate

Zamołwići a oficialni druheje Němskeje ligi w lodohokeju (DEL2) su so minjeny štwórtk dojednali hišće běžacu sezonu dočasnje zakónčić. Přičina za to je situacija kołowokoło koronapandemije.

Dale a wjace hrajerjow a čłonow ně­kotrych mustwow je so minjene dny z wirusom natyknyło, tak zo dyrbjachu do karanteny. Kónčna tabulka zestaji so nět­ko z pomocu kwocientneho prawidła wšěch hratych hrow hač do 8. apryla 2021. To rěka, zo dypki přez hry diwi­děruja. Při samsnym kwocienće liči ­potom diferenca třělenych a přećiwniskich wrotow. Za playoff-hry so wosom naj­lěpšich mustwow kwalifikuje. Hdy ­tele partije přewjedu, njeje hišće jasne.

Na polu sporta dale a bóle wobkedźbujemy, zo so žony do poslednich muskich domenow zadobywaja. Tak startuja na runinje wysokeho wuko­noweho sporta w disciplinach, kotrež běchu lětdźesatki dołho jenož mužam přewostajene. K tomu słušeja spor­to­we družiny ze sylnymi ćělnymi kon­tak­ta­mi, kaž american football abo lodohokej, bojowe družiny z Dalokeho ranja,­ kaž taek­wondo abo karate, ale tež ekstremne pruwowanja wutrajnosće, kaž pjećkrótne triatlonowe wubědźowanje Ironman, a dalše. Z tymle fenomenom so wědomostnicy hižo něšto lět zaběraja, wo čimž čitach tele dny na internetowej stronje Zwjazkoweho instituta za sportowe wědomosće (BISp) pod titulom „Muski sport za žony z wida wědomosće“. Tam pytaja za wotmołwami na prašenje, čehodla so dźeń a wjace žonow za tajke sportowe discipliny rozsudźa, kotry wužitk z toho maja a tež, kajke wopory dyrbja za to přinjesć. Slědźerski projekt, kotremuž dachu mjeno „Muski sport – žónska identita“, spyta tele wuwiće wujasnić.