Z wudaća: štwórtk, 29 apryla 2021

štwórtk, 29 apryla 2021 14:00

Krótkopowěsće (29.04.21)

Natyknjeni we wšěch komunach

Budyšin. W Budyskim wokrjesu njeje tuchwilu žaneje komuny bjez natyknjenych z koronawirusom. Wokrjes informowaše wčera wo 243 dalšich infekcijach, ličba smjertnych padow powjetši so wo štyri na 851. Tydźenska incidenca po RKI je tu dźensa 263,9. Wokrjes Zhorjelc zwěsći wčera 128 natyknjenjow, ličba zemrětych rozrosće wo jednoho na 1 058. Incidenca wučinja tam dźensa po RKI 215,6.

Filmowy festiwal přestorčili

Großhennersdorf. Aktualneho połoženja korony dla njehodźi so Nysowy ­filmowy festiwal kaž planowane wot 18. meje wotměć. Tohodla je so nawodnistwo rozsudźiło jón přestorčić. Filmy a dźěl wobłukoweho programa ma publikum nětko wot 16. do 19. septembra dožiwić. Potom chcedźa na dwaceći hrajnišćach w Němskej, Čěskej a Pólskej zarjadowanja přewjesć.

Zběhnu wobmjezowanja

wozjewjene w: Krótkopowěsće
Składnostnje dźensnišeho swětoweho dnja reje spřistupnja Serbski ludowy ansambl pod krótke wideja, ­w ­kotrychž čłonki a čłonojo baleta SLA rozłožuja, što reja za nich woznamjenja. Wot lěta 1983 je 29. apryl – narodniny to „wunamakarja moderneho baleta“ Jeana-Georgesa Noverra – na iniciatiwu Mjezynarodneho dźiwadłoweho instituta ITI-UNESCO swjedźenski dźeń. Z nim maja so „zadźěwki wotstronić a ludźo z uniwersalnej rěču reje hromadu wjesć“. Foto: SLA/Martin Pižga

wozjewjene w: Kultura
štwórtk, 29 apryla 2021 14:00

Zelena swěcaza manifestaciju

Wo lětušej 1. meji w Budyšinje z přistojnosću, wotstawkom a nahubnikom je Axel Arlt z jednaćelku regiona DGB wuchodna Sakska Danu Dubil porěčał.

Loni bě so dźeń dźěła wirtuelnje wotměł, kak lětsa wupada?

D. Dubil: Po dokładnym wotwažowanju smy so rozsudźili, mejski swjedźeń DGB za wšón region wuchodnu Saksku w Budyšinje wuhotować. Incidency korony dla běchu minjene dny kritiske, nětko pak smy zelenu swěcu za manifestaciju 1. meje w 12 hodź. na Žitnych wikach z hač do 200 wobdźělnikami dóstali.

Što tči za hesłom „Solidarita je přichod“?

D. Dubil: Tuchwilnu krizu jenož solidarisce, zhromadnje zmištrujemy. W přichodźe móžemy jenož wuspěšni być, hdyž hromadźe dźeržimy, zmysł za zhromadnosć widźimy a wědomje za zhromadne byće wobkedźbujemy.

Móžeće to z přikładom zwobraznić?

D. Dubil: Za čas pandemije so sam derje škitać je jedna stronka. Su pak ludźo, na přikład w starownjach, kotřiž podpěru wokoliny trjebaja.

Mejska namołwa DGB mjenuje solidaritu přichod dźěłoweho swěta. Pod wuměnjenjemi pandemije drje to wosebje płaći?

wozjewjene w: Rozmołwa
štwórtk, 29 apryla 2021 14:00

Hygienowy koncept funguje

Hudźbne šule prezencnu wučbu nachwilnje wuspěšnje wuhotowali

Budyšin/Wojerecy (SN/bn). Po detailěrowanym a krutym koncepće móžachu hudźbne šule Budyskeho wokrjesa před tydźenjomaj wučbu za jednotliwcow zaso na městnje poskićeć (Serbske Nowiny rozprawjachu). Mjeztym zo běchu we Wojerecach na komunalnym kubłanišću „po dołhim rozmyslowanju rozsudźili, hodźiny přiwšěm dale jenož online wuhotować“, je tamniša priwatna hudźbna a wuměłstwowa šula Bischof swoje rumnosće zajimcam spřistupniła. „Wjetšina šulerkow a šulerjow bě jara wjesoła, skónčnje zaso na městnje wuknyć móc. Wirtuelna wučba pak bě tohorunja derje přiwzata, a někotři šulerjo sej přeja dale po tym wašnju postupować. Hygienowy koncept mam za kmany, tež hdyž so jemu horstka šulerjow a staršich přiměrić nochce. Štóž pak so testowanja wzdawa, tomu njemóžemy přistup dowolić“, šulski nawoda André Bischof zjima. Swojim wučerkam a wučerjam „njesměm drje ničo předpisać, dokelž njejsu jako na honorarnej bazy skutkowacy na naše wukazy wjazani.

wozjewjene w: Kubłanje
štwórtk, 29 apryla 2021 14:00

Impresije wobswěta we woliju

„Quo vadis“ rěka aktualna personalna wustajeńca z Oschatza pochadźaceje wuměłče Gabi Keil w Budyskej galeriji Budissin. Hač do kónca meje wustaja wona tam wuběr swojich najnowšich twórbow, přewažnje wolijowe mólby, nastate w lětach 2019 do 2021. Štóž chce sej přehladku wobhladać, měł so telefonisce pod 03591/422 23 přizjewić. Keil, mišterska šulerka Maxa Uhliga, je tudyšemu publikumej tež jako ­nawodnica molerskeho wobłuka lětnjeje akademije Budyskeho wuměłstwoweho towarstwa znata. Dowola-li to wobstejnosće, chce towarstwo 6. meje wuměłstwowu rozmołwu z njej a z dr. Susannu Kambach wuhotować. Foto: Steffen Unger

wozjewjene w: Kultura
štwórtk, 29 apryla 2021 14:00

Dyrbja lutować, njewědźa pak hdźe

Kak wudawki zalutować, rěkaše prašenje, z kotrymž je so wčera Budyska měšćanska rada zaběrała. Wšako njeje kasa města runje bujnje pjelnjena.

Budyšin (CS/SN). W diskusiji wo naćisku měšćanskeho etata su Budyscy radźićeljo wčera wšelake móžnosće rozjimali. Měnjenja frakcijow běchu runje tak rozdźělne. Katja Gerhardi (CDU) rjekny, zo dyrbjeli na dobrowólnych wukonach lutować. Roland Fleischer (SPD) pak znapřećiwi, zo njeměli w žanym padźe při wudawkach za dźěći a młodostnych lutować. Andrea Kubank (Lěwica) wobžarowaše, zo chcyli najebać koronu za socialne projekty mjenje pjenjez wudać.

wozjewjene w: Łužica
štwórtk, 29 apryla 2021 14:00

Pandemija haći spěchowanja

Budyšin (SN). We wuchodnej Sakskej je w aprylu 19 051 bjezdźěłnych, 531 resp. 2,7 procentow mjenje hač w měrcu. ­Kwota bjezdźěłnosće je na 6,8 procentow spadnyła, kaž Budyska wotnožka Zwjazkoweje agentury za dźěło dźensa informuje. Zo je so zaso wjace ludźi do dźěła dóstało, zwisuje z typiskim nalětnim ­wožiwjenjom dźěłowych wikow. „Předewzaća swojich sobudźěłaćerjow hłownje we wonkownych powołanjach zaso při­sta­jeja, na twarnišćach, w ratarstwje abo zahrodnistwje“, pisa Kathrin Groschwald, předsydka jednaćelstwa Budyskeje agentury.

Nastupajo dźěłowe wiki druhe faktory pozitiwny wliw nalětnjeho wožiwjenja wobmjezuja. „Naprašowanje za personalom je so porno časej do koronapandemije wosłabiło. Nimo toho móžemy pod tuchwilnymi wobmjezowanjemi pandemije dla mjenje spěchowanskich naprawow přewjesć“, Groschwald zwěsća.

Porno aprylej 2020 je tak mjenowana poddźěławosć – ličba wosobow, kotrež su bjezdźěłne abo wobdźěleja so na dźěłowičnych naprawach –, wo 1,6 procentow na nětko 23 048 woteběrała.

wozjewjene w: Hospodarstwo
štwórtk, 29 apryla 2021 14:00

Maas přilubja pomoc Němskeje

Kabul (dpa/SN). Zwjazkowy wonkowny minister Heiko Maas je Afghanistanej na wopyće w stolicy Kabulu dalšu podpěru tež po cofnjenju wojakow NATO přilubił. „Němska wostanje spušćomny partner ludźom w Afghanistanje“, rjekny politikar SPD tam dźensa po přizemjenju. Maas wopyta Afghanistan runje dwaj dnjej do oficialneho zahajenja cofanja jednotkow NATO z Afghanistana. W běhu dnja wočakowaše jeho prezident Ashraf Ghani. Planowany bě tež wopyt němskeho pólneho lěhwa Masar-i-Sharif.

Kritizuja wobkedźbowanje

Stuttgart (dpa/SN). Hibanje prěkimyslerjow kritizuje, zo je wustawoškit dźělnje wobkedźbuje. Zarjad ma „wočiwidny problem ze swojim politiskim systemom koordinatow“, zdźěli protestne hibanje „Prěki myslić 711“ minjenu nóc. Wobdźělnicy demonstracijow pochadźeja z byrgarskeje srjedźizny towaršnosće a njejsu „ani ekstremisća ani kriminelni“. Wustawoškit bě zdźělił, zo jednotliwych akterow a dźěle hibanja ze srědkami tajneje słužby wobkedźbuje.

Biden: Dajće so šćěpić

wozjewjene w: Kraj a swět
China je dźensa swójsku swětnišćowu staciju twarić započała. Za to wotleća raketa typa „Dołhi pochod 5B“ na swětnišćowym centrumje Wenchang na juhochinskej kupje Hainan. Wona transportuje 22 tonow ćežki centralny modul swětnišćoweje stacije, kotraž ma „wokoło 2022“ dotwarjena być, informuja oficialne chinske žórła. Foto: dpa/Koki Kataoka

wozjewjene w: Kraj a swět
štwórtk, 29 apryla 2021 14:00

To a tamne (29.04.21)

Dwanaćelětny hólc je w južnej Hessenskej twochnjene małe dźěćo pola toho wowki wotedał. Štyrilětny vietnamski pachoł bě w Viernheimje pola Mannheima z bydlenja twochnył, na čož mać hnydom policiju alarmowaše. Po dwaceći mjeńšinach móžachu alarm zaso zběhnyć. Dwanaćelětny bě płakaceho hólčka za radnicu města wuhladał. Po tym zo bě jemu adresu wowki mjenował, jeho dwanaćelětny tam woteda.

Dospołnje njetrjebawši je wohnjowa wobora 700 schodźenkow katedrale w Münsteru běžała, zo by přičinu pozdatneho kura na 140 metrow wysokej wěži wuslědźiła. Swědcy běchu wčera wo mróčeli kura rozprawjeli. Na městnje pak njemóžachu ničo zwěsćić. Tež trut ze specialnej kameru njemóžeše pomhać. Po dwěmaj hodźinomaj bě zasadźenje nimo.

wozjewjene w: To a tamne

Serbska debata

nowostki LND