Z wudaća: wutora, 23 nowembera 2021

wutora, 23 nowembera 2021 13:00

Studij mediciny tež w Madźarskej móžny

Drježdźany (SN). W Sakskej pobrachuje hižo nětko wjele domjacych lěkarjow, předewšěm we wjesnych kónčinach. Naje­bać to, zo je wjele zajimcow za studij mediciny, wukubłanske kapacity w Němskej njedosahaja, zo móhli wšitkim abiturientam, kotřiž chcyli so z lěkarjom stać, studij zmóžnić. Tohodla je sakske zjednoćenstwo chorobnych kasow (KV) modelowy projekt wuwiło. Pod hesłom „Studować w Europje – přichod w Sakskej“ chcedźa zajimcam přistup na uniwersitu w madźarskim měsće Pécs zmóžnić, zo bychu tam humanu medicinu studowali. Za čas regularneho studija jim studijne popłatki spušća. Po studiju absolwuja wobdźělnicy dalekubłanje na fachoweho lěkarja za powšitkownu medicinu w Sakskej. Pozdźišo zasadźa jich znajmjeńša pjeć lět w praksach domjacych lěkarjow, ale zwonka Lipska/Markkleeberga a Drježdźan/Radebeula. Zo móhli sej dźěło domjaceho lěkarja zbližić, maja studowacy praksu za partnera, hdźež wob lěto dwanaće dnjow hospituja.

wozjewjene w: Socialne
wutora, 23 nowembera 2021 13:00

Sakska planuje nowe naprawy

Drježdźany (dpa/SN). Sakska ministerka za strowotnistwo Petra Köpping (SPD) a nutřkowny minister Roland Wöller (CDU) chcyštaj dźensa popołdnju wo dalšich naprawach hladajo na tuchwilnu ­koronapandemiju w swobodnym staće informować. Wöller chcyše wosebje kontrole we wobłuku wot wčera płaćiweho nuzoweho wukaza wuhódnoćić. Minis­terski prezident Michael Kretschmer (CDU) bě minjeny pjatk při předstajenju wukaza tež konsekwentne kontrole připowědźił. Pandemija sej to prosće žada.

Sakska je dale z wotstawkom wot pandemije najbóle potrjecheny zwjazkowy kraj. Tydźenska incidenca bliži so mjeztym hódnoće 1 000. Dźensa ležeše wona po informacijach Roberta Kochoweho instituta pola 969,9. Po cyłej Němskej wučinješe incidenca dźensa rano 399,8, po wčerawšim nowym rekordźe 386,5.

W běhu dnja chcychu we wjacorych zwjazkowych krajach wo dalšich naprawach přećiwo koronawirusej wuradźować, mjez druhim wo winowatostnym šćěpjenju.

wozjewjene w: Kraj a swět
wutora, 23 nowembera 2021 13:00

Tež lětsa zaso „čorne ličby“

Zaměrowy zwjazk Łužiska jězorina efektiwnje a solidnje hospodari

Kóšyna (AK/SN). Zaměrowy zwjazk Łužiska jězorina Braniborskeje wobchod­nistwo wuspěšnje wjedźe a móže kónc lěta na „čorne ličby“ zhladować. Najebać koronapandemiju je zwjazk w lěće 2021 solidnje a efektiwnje hospodarił, wu­zběhny jeho předsyda Detlev Wurzler minjeny štwórtk, hdźež je wón kónclětne wotličenje předstajił. „Jednanskeje swobody pak je mjenje“, Wurzler rozłoži. „Naši hosćo z Čěskeje njejsu lětsa scyła přišli. Do pandemije wučinješe jich ­podźěl něhdźe štyri procenty wopy­towarstwa. Nadźijamy so, zo so situa­cija w přichodnych lětach zaso stabili­zuje.“

wozjewjene w: Hospodarstwo
wutora, 23 nowembera 2021 13:00

Zmylki njewospjetować

Wot přizwolenskeho wuběrka za łužiski rewěr w Sakskej dotal přizwolene projekty strukturneje změny su rozdźělny wothłós zbudźili. Jedyn kritiski aspekt ma tam wosebitu wahu: Wot brunicownistwa direktnje potrjechene komuny so při tym w swojim połoženju dosć wobkedźbowane nječuja. Samsnemu zmylkej chcedźa Do­mowinske župy zadźěwać, dźe-li wo přichodne „serbske“ projekty strukturnu změnu nastupajo. Čłonojo Zwjazkoweho předsydstwa Domowiny su drje tule starosć minjeny pjatk na swojim wuradźowanju znowa tematizowali, ale mysl bě hižo w ste­jišću prezidija třěšneho zwjazka Załožbje za serbski lud zakótwjena. Domowina ma za trěbne, zo separatny gremij, w kotrymž su potrjechene župy sobu zastupjene, wo přizwolenju serbskich projektow strukturneje změny rozsudźi. Zo nima wona załožbowu radu za prawe městno rozsuda, zwisuje z tym, zo regiony tam zastupjene njejsu. Njeje trjeba jónu spó­znate zmylki wospjetować. Axel Arlt

wozjewjene w: Towarstwa
wutora, 23 nowembera 2021 13:00

Powěsć z Brjesta

Po prezidentskich wólbach w Běłoruskej a raznych demonstracijach přećiwo Aleksanderej Lukašenkej je nimale lěto zašło. Kraj pak wostawa we wizěru zjawnych medijow, a to hłownje w Němskej, Pólskej, Litawskej, hač do najwyšich gremijow w Brüsselu, OSZE a hač do hłowneho sydła UNO w New Yorku. Nětko knježi nowa rozhorjenosć nawala ćěkancow na běłorusko-pólsku hranicu dla, kotřiž spytaja so přez nju na teritorij ­Europskeje unije předrěć. Za tym tči běłoruski „mócnar“ Lukašenko. Spochi so wospjetowaše, zo wjedźe Lukašenko hybridnu wójnu přećiwo EU a zo ma Němska wšitke srědki přećiwo tomu zasadźeć. Lukašenko da tysacy ćěkancow ­nastupić, zo by sej z tutej žiwej masu wunuzował legitimaciju jako prezident a tak připóznaće Europskeje unije za prawosć poslednich prezidentskich wólbow w Běłoruskej. Žada sej, zo ma EU sankcije přećiwo Běłoruskej cofnyć.

wozjewjene w: Kraj a swět
Za lětušu pomocnu akcije Towarstwa swj. Filomeny su darićeljo wčera w Smjerdźacej prěnje pakćiki wotedali. Norbert Róbl zastupowaše při tym swojeho nana, iniciatora Gerata Róbla, a je dary přijimał. Hač do štwórtka móža ludźo pakćiki ze słódkosćemi, hrajkami, pisanskim materialom kaž tež z poćehnjenjemi a hygieniskimi tworami stajnje wot 17 do 18 hodź. w Smjerdźečanskim kulturnym domje wotedać. Foto: Feliks Haza

wozjewjene w: Łužica
wutora, 23 nowembera 2021 13:00

Wjace za kolesowarjow činić

W Běłej Wodźe ma so přichodnje wjele na dobro kolesowarjow změnić, a město chce so nětko sylnišo z naležnosću zaběrać. Jedne wosebite towarstwo ma při tym wobsahowje kaž tež pjenježnje pomhać.

Běła Woda (CK/SN). Kolesowanje ma w Němskej dźeń a wjetši wuznam. Kaž nawodnica twarskeho referata města Běłeje Wody Dorit Baumeister na zašłym posedźenju tamnišich radźićelow rjekny, ma kolesowanje při zdźěłanju měšćanskeho wuwićoweho koncepta wažnu rólu hrać. „Běła Woda drje je nadregionalnje derje přizamknjena, w měsće samym pak ma so wjele nachwatać“, wona wu­zběhny. Zo njebychu čas brojili, přistupi město dźěłowemu zjednoćenstwu sakskich komunow za spěchowanje wobchada kolesowarjow a pěškow. To su Běłowodźanscy radźićeljo jednohłósnje wobzamknyli.

wozjewjene w: Łužica
wutora, 23 nowembera 2021 13:00

Dróhotwarski projekt hotowy

Při wobnowjenju puća z Nuknicy do Lejna něšto eurow wuzbytkowali

Chrósćicy (JK/SN). Gmejnska dróha mjez Nuknicu a Lejnom je hotowa a prezen­tuje so w nowym šaće. Gmejnu Chrósćicy wosebje wjeseli, zo su při wobnowjenju porjadnje něšto wuzbytkowali, a to, hačrunjež je twarska firma na dlěšim wotrězku podłohu dróhi dale wu­kmaniła, hač bě planowane. A wušěrjenja su tohorunja wo něšto wjetše, hač bě wotpohladane. To wjeseli mnohich wužiwarjow za gmejnski wobchad wažneje dróhi. To su gmejnje napřećo hižo zwuraznili, wuprajejo dźak za skónčnje zwoprawdźeny projekt, kotryž bě tež radźićelej Romanej Nukej wutrobna naležnosć. Wón so tuž radźićelam a wjesnjanosće za zwoprawdźenu naprawu ­podźakowa.

wozjewjene w: Łužica
wutora, 23 nowembera 2021 13:00

Saněruja šulu cyle po planje

Wulke Ždźary (AK/SN). Łazowska gmejna chce časowy plan saněrowanja Zakładneje šule „Při Hórnikečanskim jě­zoru“ Wulke Ždźary dodźeržeć. To podšmórny wjesnjanosta Thomas Leberecht (CDU) na zašłym posedźenju gmejnskeje rady. W zymskich prózdninach klětu w februaru maja wuknjacy z tuchwilnych kontejnerow wróćo do šulskeho twarjenja přećahnyć.

Posedźenje gmejnskeje rady wotmě so w awli zakładneje šule. Do toho móžachu so radźićeljo wo tuchwilnym twarskim stawje na městnje wobhonić. Na jich prašenja wotmołwještaj twarski nawoda gmejny Wolfgang Tietze a domownik Steffen Müller.

Nimo přizamknjenja Koblic a Wulkich Ždźarow k wopłóčkowej syći je saněrowanje Wulkoždźarowskeje zakładneje šule tuchwilu najwjetše twarnišćo Łazowskeje gmejny. Dotal su fasadu kubłanišća energetisce saněrowali a mjez druhim nowe wokna a durje zatwarili. Dalši krok bě sportowu halu wobšěrnje ponowić. Nětko je dospołny nutřkowny wobłuk šule na rjedźe. Zahajili běchu tónle wotrězk w awgusće 2020.

wozjewjene w: Łužica
wutora, 23 nowembera 2021 13:00

Wo wukubłanju informowali

Mjeztym dźesaty raz su na Wojerowskim powołanskošulskim centrumje Konrada Zusy studijny informaciski dźeń přewjedli. Organizaciju w horšći mějachu čłonojo šulerskeje agentury za zažnu powołansku orientaciju pod nawodom Martiny Wolf (nalěwo). Gymnaziasća dóstachu dohlad do móžnych wukubłanskich pućow po šulskim času. Zdźěla su tež bywši šulerjo wo swojim tuchwilnym powołanskim a studijnym wukubłanju rozprawjeli. Foto: Silke Richter

wozjewjene w: Łužica

Serbska debata

nowostki LND