Z wudaća: wutora, 30 nowembera 2021

Dźewjeć schorjenych zemrěło

Budyšin. Incidenca 1 791,2 po Roberta Kochowym instituće dźensa w Budyskim wokrjesu je třeća najwyša po cyłym Zwjazku. Krajnoradny zarjad informo­waše tam wčera wo 1 667 natyknjenjach z koronawirusom a dźewjeć smjertnych padach. Gmejna Ralbicy-Róžant steji z 94 potrjechenymi na tysac wobydlerjow na čo­le. We wokrjesu Zhorjelc bě wčera 37 infekcijow, incidenca po RKI je 1 284,3.

Kwota zaso pod šěsć

Budyšin. We wuchodnej Sakskej bě w nowembrje 16 213 bjezdźěłnych, 314 mjenje hač w oktobrje. Z tym leži kwota bjezdźěłnosće pola 5,9 procentow a je dźakowano nazymskemu wožiwjenju prěni raz po lěće 2019 pod šěsć pro­centow padnyła, to Budyska wotnožka zwjazkoweje agentury za dźěło dźensa zdźěli. Kaž dale rěka, pak ludźo ze zbrašenjemi ćešo zaso přistajenje namakaja.

W zastojnstwje wobkrućenaj

W Budyskim wokrjesu su tři krute šćěpjenske stejnišća zarjadowane, hdźež móža so zajimcy wotnětka na dwěmaj dnjomaj wob tydźeń bjez termina šćěpić dać. W Kamjencu před wokrjesnej ludowej uniwersitu čakaše wčera dołhi rynk ludźi na šćěpjenje. Přichodny króć přijědźe tam šćěpjenski team štwórtk. W hali na Budyskim Třělnišću poskićuja injekciju stajnje srjedu a sobotu a we Wojerowskej žurli Vis-à-vis je tole wutoru a pjatk předwidźane. Foto: Matthias Schumann

Na Drježdźanskej Ludowej uniwersiće (VHS) maja mjeztym tři njedźele rěčny kurs serbšćiny. Milenka Rječcyna je so z Jadwiga Pjacec rozmołwjała, kotraž tam jědnaće zajimcow wuwučuje.

Kak je tutomu kursej serbšćiny w Drježdźanach dóšło?

J. Pjacec: Ludowa uniwersita je so pola nas w towarstwje Stup dale z.t. naprašawała. Kaž je nam Ludowa uniwersita zdźěliła, běchu so do toho hižo na Domowinu wobroćili, zwotkelž pak trěbnu podpěru dóstali njejsu. Jako běchu zwěsćili, zo je w sakskej stolicy towarstwo, kotrež ma Serbow jako čłonow, su so na nas wobroćili. Tak su prěni króć zwisk k towarstwje nawjazali.

Při wšěm, njeje to wšědne, zo w jednym měsće, w kotrymž su Serbja absolutna mjeńšina na VHS serbšćinu podawaja.

J. Pjacec: Haj, to je prawje. Sobudźěłaćerjo VHS su nam rjekli, zo maja wšě móžne rěče w poskitku. Serbšćina pak je pobrachowała, a to, runje w sakskej krajnej sto­licy. Maja za samozrozumliwe, zo so w Drježdźanach serbšćinowy kurs za dorosćenych poskići.

A kak to nětko funguje? Sama wšak njesće wukubłana za wuwučowanje rěče?

Wobswětowy zwjazk Zelena liga je Kamje­ničanskemu zarjadniskemu sudni­stwu skóržbu přećiwo Sakskemu wyšemu hórniskemu zarjadej zapodał, dokelž njeje informacije sposrědkowało a swoje nadawki spjelniło. Hórniski zarjad­ to napřećiwne twjerdźi.

Wojerecy (SN/MiR). Wubědźowanje Wojerow­skeje župa „Handrij Zejler“ pod hes­łom „Moja najlubša kamishibai­powědka“ je zakónčene. Třo zajimcy su so na nim wobdźělili, wšitcy chowancy Choćebuskeho Delnjoserbskeho gymnazija. Ani jenički wobdźělnik ze srjedźneje abo Hornjeje Łužicy njeje składnosć wužił so na wuměłskim projekće wuspytać. Přičiny su wšelakore. „Na jednym boku je korona kreatiwne dźěło w pěstowarnjach, wosebje pak šulach haćiło.“ Tak znajmjeńša posudźuje wuslědk inicia­torka wurisanja a rěčnica župy Sonja Hrjehorjowa. Wšako su wučerjo na jeje naprašowanje rjekli, zo koncentruja so w tymle šulskim lěće na jadrowe wu­wučowanje na šulach. Poprawom wšak měješe wubědźowanje hižo kónc apryla zakónčene być, ale korony dla bě je župa podlěšiła. „Po zdaću pak je nadawk tež trochu ćežki był, tak zo njejsu so dźěći a młodostni z kubłarjemi abo wučerjemi kaž tež dorosćeni wobdźělili. Běchmy wšak sej přeli, zo zajimcy wobrazy serbskeje baje abo bajki rysuja, štož bě tón lóši­ nadawk“, Hrjehorjowa rozłožuje.

Drježdźany (SN/CoR). Po lońšej premjerje wuměłstwowa iniciatiwa „Swobodny społk“ znowa protyku poskića. Wudaće za lěto 2022 nasta w kooperaciji z del­njoserbskej wuměłču Hellu Stoleckojc a wopřijima dwanaće wobrazow w formaće A2 jako offsetowy ćišć na mutnej papjerje. Njesignowana protyka płaći 40 eurow plus porto, wot wuměłče signowany eksemplar je za sto eurow na předań. Nakład je tu na 20 eksemplarow wobmjezowany. Zajimcy móža sej dwurěčnu hornjo- a delnjoserbsku protyku na internetnej stronje skazać.

Beneficne koncerty „Swingin‘ Santa“ njebudu projektowe spěwarki a spěwarjo kaž tež hudźbnicy kónc tydźenja w Budyskej „Krónje“ znatych přičin dla live prezentować móc. Zo bychu ludźom přiwšěm z woblubowanymi mjezynarodnymi hodownymi spěwami wjeselo wobradźić móhli, su minjenu sobotu wjacore titule w tachantskej cyrkwi ­natočili. Nahrawanja poskićuja digitalnje w formje streama, kotryž startuje 2. adwentnu njedźelu w 15 hodź. pod . Zdobom wjesela so koncert sobu zarjadowace Budyske serwisowe kluby nad pjenježnymi darami, za čož zarjaduja wosebitu telefonowu hotline z čisłom 03591 531 9967. Foto: Maćij Bulank

Riga (dpa/SN). Wonkowni ministrojo 30 čłonskich krajow NATO su so dźensa k dwaj dnjej trajacej konferency w letiskej stolicy Riga zešli. Pod nawodom generalneho sekretara Jensa Stoltenberga chcedźa mjez druhim wo połoženju ­na mjezy mjez EU a Běłoruskej kaž tež na mjezy mjez Ukrainu a Ruskej rěčeć. Ukraina Ruskej wumjetuje, zo planuje z koncentraciju ruskich wojakow na mjezy wojersku akciju přećiwo njej.

Produkuja wjace šćěpiwa

Mainz (dpa/SN). Farmaceutiske přede­wzaće Biontech w Mainzu chce hladajo na wulke naprašowanje za šćěpiwom Němskej přidatnje 2,8 milionow dozow seruma přewostajić. Tohodla chcedźa hišće tutón tydźeń 5,8 milionow dozow zhotowić. W běhu decembra chcedźa nimo toho 2,4 milionow dozow noweho seruma přepodać, z kotrymž móža dźěći přećiwo koronawirusej šćěpić.

Iniciatiwa: Dale ćišć wukonjeć

Z njewšědnje sylnej prezencu je policija wčera wječor planowanu demonstraciju přećiwnikow naprawow přećiwo koronawirusej w Budyšinje přewodźała. Po cyłym starym měsće stejachu policajske awta. W běhu wječora zastojnicy demonstraciju na Žitnych wikach rozpušćichu, dokelž bě wjace ludźi přišło hač bě dowolene. Foto: LausitzNews/ Jens Kaczmarek

Po třoch dnjach w zasněženej korčmje na sewjeru Jendźelskeje je něhdźe 60 hosći swój nachwilny kwartěr zaso wopušćić móhło, po tym zo bě so sněhowy płuh k wotležanemu domej předrěł. Ludźo běchu po koncerće w pubje wostać dyrbjeli, dokelž bě dróha sněhoweho wichora dla zaraćena. Korčmarka zaměstni někotrych hosći w pensiji, druzy dyrbjachu na matracach abo na zemi přenocować. Naje­bać to bě nalada mjez wopytowarjemi dobra. Nastachu samo nowe přećelstwa.

Jako pastyrjo wowcow su policisća w Sewjerorynsko-Westfalskej zaskočili. Swědcy běchu zastojnikow wo tym informowali, zo steji stadło něhdźe 150 wowcow na polu bjez kóždeho płota. Policisća na to k polu dojědźechu a njedohladowane stadło stražowachu. Akcija z „njewšědnym nazhonjenjom“ so skónči, jako wobsedźer stadła dojědźe.