Berlin (dpa/SN). Ministerski prezident Sewjerorynsko-Westfalskeje Hendrik Wüst (CDU) je sej do dźensnišeho wuradźowanja Zwjazka a zwjazkowych krajow konsekwentne rozsudy w boju přećiwo dramatisce wulkim ličbam koronainfekcijow žadał. „Njesměmy na konferency ministerskich prezidentow žanym połojčnosćam přizwolić, ale dyrbimy infekcisku žołmu z rozsudźenosću přewinyć“, rjekny Wüst powěsćerni dpa.
Zwjazk a kraje chcychu dźensa razniše naprawy w boju přećiwo koronawirusej wobzamknyć. Prawdźepodobnje postajenja nastupajo wobmjezowanje kontaktow za nješćěpjenych dale přiwótřa. Powšitkowna winowatosć šćěpjenja njeje wuzamknjena. Tež wo mjenje přihladowarjach na wulkozarjadowanjach kaž w kopańcy chcychu rěčeć. Dokładne wuslědki hač do kónca redakciskeho časa hišće njepředležachu.
Moskwa/Riga (dpa/SN). Ruski prezident Wladimir Putin sej wot NATO žada so dale do směra na wuchod njerozšěrić. Jeho kraj trjeba „sylne, spušćomne a dołhodobne wěstotne garantije“, rjekny Putin wčera wukrajnym wulkopósłancam w Moskwje. Runočasnje wuradźowachu wonkowni ministrojo NATO w letiskej stolicy Rize z Ukrainu, kotraž nadźija so sylnišeje podpěry. Lěta trajacy konflikt mjez Kijewom a Moskwu zbudźa tuchwilu nowe napjatosće. USA Ruskej wumjetuja, zo přihotuje „agresiwnu wojersku akciju přećiwo Ukrainje“, štož Moskwa wotpokazuje.
Kaž Putin wukrajnym diplomatam zwurazni, chce Ruska w dialogu z USA na tym wobstać, zo zdźěłaja konkretne dojednanja, kotrež dalšemu rozpřestrěću zapadneje wojerskeje aliancy na wuchod a zaměstnjenju strašnych wojerskich systemow w bjezposrědnim susodstwje Ruskeje federacije zadźěwaja. Tele garantije měli zawjazowace być. Něhdyše ertne připrajenje, zo so NATO na wuchod njerozšěri, njebu dodźeržane.
Drježdźany/Podstupim (dpa/SN). Snadneho wothłosa dla před měsacomaj zawrjeny šćěpjenski centrum na Drježdźanskich wikach zaso dźěła. Dołho do wotewrjenja čakaše wčera rano wjace hač sto ludźi před durjemi. Mjez zajimcami za šćěpjenje přećiwo koronawirusej bě tójšto staršich wosobow, ale tež młodych.
Započeć chcedźa po informacijach Němskeho čerwjeneho křiža ze 700 šćěpjenjemi wšědnje, hišće bjez internetneho termina. „Móžemy hišće wjace šćěpić, chcemy pak najprjedy raz započeć“, rěčnik zdźěli. Zasadźeć móža serum firmow Biontech/Pfizer, Moderna a Johnson&Johnson.
K wčerawšej powěsći „Rub ze serbskim napisom přepodał“ ma Hartmut S. Leipner z Choćebuza tule porjedźenku:
Parament z napismom w slepjanšćinje „Bóh žohnuj a zwarnuj tebje na wšitkich twojich pućach“ nima ničo činić z Choćebuskim Serbskim muzejom. Je to dar Spěchowanskeho towarstwa za serbsku rěč w cyrkwi z. t. Slepjanskej wosadźe. Wobzamknyło bě to delnjoserbske cyrkwinske towarstwo na swojej wólbnej zhromadźiznje, kotraž wotmě so do prěnjeho adwenta.
Ústí nad Labem (dpa/SN). W čěskej pomjeznej kónčinje wokoło Ústíja nad Labem su chorownje štwórteje žołmy koronawirusa dla na hranicy swojich móžnosćow. Třoch intensiwnych pacientow dyrbja z chorobnym awtom a helikopterom z přećeženych chorownjow w Ústíju a Teplicach do Prahi a Plzenja přepołožić, kaž narodny koordinaciski centrum za rozdźělowanje pacientow zdźěla. Přichodne dny chcedźa přidatne kapacity na stacijach koronapacientow wutworić. Ústí nad Labem leži něhdźe połsta kilometrow južnje Drježdźan.
W Čěskej su w běhu sydom dnjow 1 193 infekcijow z koronawirusom mjez 100 000 wobydlerjemi zwěsćili, kaž z najnowšich ličbow strowotniskeho ministerstwa w Praze wuchadźa. Najbóle potrjechene su wuchodne dźěle kraja. Nimale 6,4 miliony z cyłkownje 10,7 milionow wobydlerjow Čěskeje su mjeztym dospołnje pře koronu šćěpjene.
Strowotniski system čłonskeho kraja EU ćerpi hižo přez lěta pobrachowaceho personala dla, dokelž derje kwalifikowani lěkarjo a hladarjo niskich mzdow dla do zapadnych krajow wotchadźeja.
Grodk (JoS/SN). Jako so Eckbert Kwast 1958 w Grodku narodźi, drje njeby jemu nichtó wěšćił, zo wón raz po cyłej Łužicy takrjec muzejowe slědy zawostaji. Ale žiwjenje je w dwěmaj towaršnostnymaj systemomaj swójske puće šło. Wuchodźiwši rozšěrjenu wyšu šulu studowaše Kwast mašinotwar a dźěłaše na to w płunokombinaće Čorna Pumpa. Po politiskim přewróće pak wón tam hižo žadyn přichod njewidźeše a započa 1990 jako přidružnik w tehdyšim Grodkowskim domizniskim muzeju. Tam je dlěje hač 30 lět skutkował, hač do 2002 pod muzejowym nawodu Manfredom Ihle, wot toho časa jako nawoda. Nětko so wón na wuměnk poda.
Dźěwin (AK/SN). Rozsud wo wohnjowobornych wustawkach a wo wustawkach k wotrunanju wobornikow su gmejnscy radźićeljo Dźěwin na swojim wčerawšim posedźenju přestorčili. Šesćo z nich chcychu wo wustawkach pozdźišo rozsudźić, pjećo bychu předležacej naćiskaj najradšo schwalili.
„Wo wohnjowobornych wustawkach hižo dlěje rěčimy. Wjesnej woborje Dźěwin a Brězowka stej intensiwnje přidźěłałoj, rjekny nawodnica hłowneho zarjada Marion Mudrina. Najwjetša diferenca z nawodomaj wobeju woborow wobsteji w prašenju, hač trjebaja zakonsce předpisaneho nawodu cyłkowneje gmejnskeje wobory. Tón ma so wolić a postajić. Jónu wob lěto zwoła wón po wustawkach lětnu hłownu zhromadźiznu. Dotal tajkeho nawodu njemějachu. „Wobaj wjesnaj nawodaj w Dźěwinje a Brězowce so derje wothłosujetaj“, podšmórny wjesnjanosta Helmut Krawc (SPD). „Wot lěta 1999, potajkim dołhož naša gmejna wobsteji, to takle praktikujemy. Hdyž je hłowna zhromadźizna w Brězowce, su zastupjerjo Dźěwina pódla a nawopak.“