Z wudaća: štwórtk, 02 decembera 2021

Hory (AK/SN). Srědki z komunalneje pawšale Swobodneho stata Sakskeje za spěchowanje wjesneho ruma gmejna Halštrowska Hola zaměrnje wužiwa. Tole podšmórny komornica Stefanie Arndt na zašłym posedźenju gmejnskeje rady. Wot 2018 do 2020 dóstachu runja druhim komunam wob lěto 70 000 eurow. Tež lětsa smědźachu so nad samsnej sumu­ wjeselić. Tak su w Blunjanskej pěstowarni za 4 900 eurow kuchnju za­twarić dali. Za twarski zawod gmejny kupi­chu transporter za 25 000 eurow. A za Židźinsku dobrowólnu wohnjowu woboru wobstarachu za 9 500 eurow wohnjowoborne jězdźidło.

Na Hórčanskim sportnišću njejsu tele dny za bulom honili abo so w konjacym sporće wubědźowali. Tam bě ćežka technika zasadźena, štož pak měješe přiwšěm z jěchanjom činić.

Hórki (aha/SN). W lěće 1992 załožene konjace sportowe towarstwo Při Klóšterskej wodźe ze swojimi tučasnje něhdźe 50 čłonami wobdźěla so mjeztym na turněrach po cyłej Němskej. Hač do lěta 2005 organizowaše wone wjacore tajke ze swójskimi mocami tež w Chrósćicach, pozdźišo pak kóždolětnje na sportowym arealu w Hórkach a na płoninach njepo­srědnje wokoło tamnišeho stadiona.

Přihoty na turněry su wulke wuža­danje čłonam towarstwa a mnohim dalšim jich čestnohamtsce podpěrowacym. Tola tež dźěło po turněrje žada sej dokładne postupowanje. Wosebje strapacěrowany trawnik sportnišća ma so po turněrje zaso wuporjedźeć, zo bychu tam mjez druhim tež koparjo sportoweho towar­stwa Módro-běli Hórki dobre wuměnjenja měli a zo njeby strach hrozył znjezbožić, abo so zranić.

Wojerecy. Štož w Budyšinje a druhich městach hižo maja, chce Lionsowy klub Wojerecy tež w swojim měsće nastajić: bronzowu miniaturu měšćanskeho na­pohlada za slepych a špatnje widźacych. Mjeztym su z wuměłcom kontakt na­wjaza­li a z měšćanskim zarjadnistwom móžnu městnosć na kromje torhošća před starej radnicu wujednali. Nětko chcedźa so wo financowanje projekta starać. Za to su njedawno darowansku akciju zahajili.

Přidatny helikopter zasadźeny

Budyšin. Wot wčerawšeho zasadźeja w Sakskej přidatny helikopter, z kotrymž móža koronapacientow po wšej Němskej do druhich chorownjow přepołožić. Na te wašnje zawěsćeja na městnje wažne kapacity za dalše nuzowe pady, kaž na př. infarkt wutroby. Přidatny helikopter steji na Lětońskim lětanišću, zwotkelž na zasadźenja startuje. Hižo před lětom­ su na te wašnje pacientow pře­połožili. Wot kónca decembra 2020 hač do měrca 2021 bě jich dohromady 177.

W rostlinarni so paliło

Hlina. K hašenju wołachu wohnjowych wobornikow předwčerawšim do Hliny (Gleina) pola Malešec. Na ležownosći 69lětneho bě woheń w rostlinarni wudyrił. Po wšěm zdaću běchu kachle tak jara za­tepjene, zo so wšelake blisko ležace a stejace wěcy zapalichu. Čłonojo dobrowólnych wohnjowych woborow wokolnych wsow kaž tež Budyskeje powołanskeje wobory běchu zasadźeni. Hašensku wodu klumpachu woni z bliskeje Kotołki (Kotitzer Wasser). Po informacijach policije so nichtó zranił njeje. Wěcnu škodu pak trochuja na něhdźe 7 000 eurow.

Wojerowski kulturny zwjazk je hižo wjele lět w starym měsće prezentny

Město Wojerecy chce dźěło towarstwa kulturny zwjazk zaměrnje podpěrać. Předewšěm na polu spěchowanskich srědkow chce pomhać a kmanych kooperaciskich partnerow sposrědkować. To je wyši měšćanosta Torsten Ruban-Zeh (SPD) towarstwu přilubił.

Wobłuk spěchowanskich srědkow je dźeń a njepřewidniši. Tohodla „je pod­­pěra nuznje trěbna“, Wojerowski měšćanosta podšmórnje. Nimo toho wón namjetuje, přirjadować towarstwu městno zwjaz­koweje dobrowólneje słužby abo dobrowólneho socialneho lěta. Tak móhło „młodym ludźom temy domizniskich stawiznow zbližić“. Ruban-Zeh dale wu­zběhnje, zo chce „spěchowanski management města z programom ‚Aktiwne město a wjesne dźěle‘ na stare runje tak kaž na nowe město wusměrić“.

We wobłuku swjedźenskeho lěta „1 700 lět židowske žiwjenje w Němskej“ je njedawno znaty dźiwadźelnik Roman Knižka hromadźe z dujerskim kwintetom Opus 45 literarno-komorny hudźbny program „Ich hatte einst ein schönes Vaterland“ w Budyšinje předstajił. Něhdźe 130 ludźom poda wón w tamnišim wopomnišću dohlad do žiwjen­skich poměrow Židow mjez Němca­mi wot 18. lětstotka hač do přitomnosće. Cordula Ratajczkowa je so z 51­lětnym rodźenym Budyšanom wo dźens­nišich politiskich poměrach rozmołwjała.

Knježe Knižka, na kóncu zarjadowanja sće wuzběhnył, zo je Wam tale literarno-koncertna tura naležnosć wutroby, wo­sebje předstajenje w Budyšinje. Čehodla?

Hižo wčera je sportowa redakcija Serbskich­ Nowin prěnje tabulki dorostowych mustwow wozjewiła, kotrež na te­ritoriju Zapadołužiskejo kopar­skeho zwjazka za bulom honja. Dźensa slěduje pokročowanje. Wosebje napadne je při tym zaměstnjenje młodźiny D Sportoweje jednotki Chrósćicy w stafli 2 wokrjesneje ligi. Wona je wšitke dotalne hry dobyła.

młodźina D, wokrjesna liga, stafla 1

1. Budissa Budyšin III 7 36 : 15 15

2. Motor Kumwałd 6 23 : 15 13

3. Póst Germ. Budyšin II 5 21 : 11 12

4. Módro-běli Minakał 5 23 : 8 10

5. TSV 1859 Wjernarjecy 4 14 : 7 9

6. HZ ST Wulka Dubrawa 6 20 : 16 9

7. Motor Kumwałd II 7 16 : 36 6

8. ST Horni kraj-Sprjewja II 5 6 : 21 4

9. TSV Wóspork/Hrodźišćo 5 15 : 19 3

10. ST Huska 6 12 : 38 1

młodźina D, wokrjesna liga, stafla 2

1. SJ Chrósćicy 1981 7 60 : 8 21

2. HZ Wjazońca/Wjelećin 7 49 : 14 15

3. Biskopičanske KT 08 II 6 36 : 11 12

4. ST Marijina hwězda 6 29 : 12 12

5. HZ Drohotka Ramnow 7 22 : 29 12

6. ST Porchow II 6 24 : 39 7

7. ST Postup Großharthau 6 16 : 23 6

8. SZ Zemicy-Tumicy  7 17 : 46 6

9. HZ Hlinowc/Halštrow 7 24 : 59 4

10. HZ Huska/Hodźij 5 1 : 37 0

młodźina D, wokrjesna liga, stafla 3

1. SC 1911 Großröhrsdorf 8 81 : 5 24

2. HZ Hermsdorf 5 36 : 8 15

3. HZ Kinspork/Łužnica 7 17 : 14 15

4. Liegau-Augustusbad II 5 32 : 5 13

5. Lomnitzski SV 5 10 : 17 6

6. SV Haselbachtal 6 7 : 32 6

7. SC Großröhrsdorf II 7 14 : 24 4

8. FV Ottendorf-Okrilla II 6 5 : 34 3

9. SG Großnaundorf 6 5 : 30 1

10. Zeleno-běli Sepicy 5 8 : 46 1