Z wudaća: wutora, 05 julija 2022

Berlin (dpa/SN). Přiběracy wupad personala w chorownjach lětnjeje koronoweje žołmy dla so chorownje w Němskej jara starosća. „Ze wšitkich zwjazkowych krajow dóstawamy přizjewjenja, zo dyrbja jednotliwe stacije a wotrjady mało personala dla wotzjewić“, zdźěli šef předsydstwa Němskeje towaršnosće chorownjow Gerald Gaß. Sčasami su samo nuzowe přijimarnje wuchowanskich stražow wotzjewjene. „Tale situacija nas ­hladajo na nazymu chětro starosća.“

Ličba infekcijow je w minjenych tydźenjach zaso sylnje přiběrała. Roberta Kochowy institut je dźensa incidencu 687,7 nowych infekcijow na 100 000 wobydlerjow přizjewił. Fachowcy pak wuchadźeja z toho, zo je woprawdźita ličba wo wjele wyša, dokelž mnoho natyknjenych hižo PCR-test nječini a so tohodla njeregistruje. Wědomostny nawoda registra za intensiwne łoža Christian Karagiannidis měni, zo je wućeženje stacijow moderatne, ale za lěćo relatiwnje wysoke. Nastupajo pobrachowacy personal steji jasnje mjenje łožow k dispoziciji.

Janšojsku milinarnju za nuzowu situaciju přihotuja

Choćebuz (dpa/SN). Za wobšěrniše zasadźenje nastupajo wěstotnu hotowosć blokow E a F Janšojskeje milinarnje pobrachuje personal, zdźěli zawodna rada předewzaća Łužiska energija a milinarnje (LEAG). Wjace hač sto sobudźěłaćerjow bychu trjebali, wuswětli předsyda zawodneje rady Rolle minjenu sobotu w informaciskim radiju rbb. Situacija je wosebity pad a njebě wotwidźeć. „Smy zwólniwi a spytamy to zmištrować“, wón wuzběhny. LEAG tuchwilu wjele dźěłowych městnow wupisa. Po informacijach koncerna pytaja mjez druhim mašinistow a wodźacych technikarjow za wobhospodarjenje milinarnje.

Blokaj E a F Janšojskeje milinarnje stej w štyrilětnej tak mjenowanej wěstotnej hotowosći. Po płaćiwym zakonju je jich zasadźenje jenož w nuzowych situacijach předwidźany. Block F měł so k 1. oktobrej 2022 a blok E k 1. oktobrej 2023 do­skónčnje wotpinyć. Za čas wěstotneje ­hotowosće njewobdźělatej so blokaj na aktiwnym wikowanju.

Sedźeć pod hołym njebjom, sonić, kreatiwny być a při tym zmysłapołnje skutkować – njeje to přeće, kotrež wšitcy mamy, předewšěm nětko w tak rjanym počasu? Dźěći a młodostni maja tutu šansu, jeli su zapřimnyli, zo móža to wšitko w busu zdokonjeć. Fabmobil je bus z wosebitym wuhotowanjom. Highlight drje je, zo hodźi so třěcha wočinić. Nimo toho je jězdźidło wuhotowane z najnowšej techniku. Što pak to rěka? Je bus jeničce něšto za zabawu? Ně! Wotmysł projekta, kiž Serb Bosćij Pjaca nawjeduje, je, młodu generaciju sensibilizować za nowu techniku – a to je snadź najwažniši zaměr – jich zdobyć za nowe powołanja, wosebje tež holcy. Bjez dwěla je Fabmobil tež wulkotne dalekubłanišćo za staršu generaciju, mjez druhim wučerjow. Wšako zmóžnja zajimcam zwoprawdźić sej swójske sony. Abo njebyšće wy chcyli měć stejo sławnu wuměłsku twórbu abo twarjenje, kotrež was fascinuje w swojim by­dlenju? Z 3D-techniku so són zwoprawdźi. Milenka Rječcyna

„Lyriske počasy mjez zahrodami a cechowym domom“ bě hesło wuměłstwoweho swjedźenja, wuhotowaneho minjenu sobotu wot zetkawanskeho centruma Marga a Literarneho kolokwija Berlin w Brjazkach (Brieske). Mjez druhim čitaštaj w tym wobłuku basnica Lenka a spisowaćel Benedikt Dyrlich swójske teksty. Spěwytwórc Bernd Pittkunings předstaji zajimcam serbsce a němsce powěsće a bajki z Łužicy. Wolfgang Wache (na foće) rozjimaše poetisce a ze starymi rěčnymi wobrotami ­stawizny regiona, wobkedźbujo předewšěm zazběh wudobywanja brunicy a po­dawajo wuhlady do přichoda ze swójskeho wida. Foto: NC/Katalin Porackojc

Wojerecy/Budyšin (SN/at). Z hłodowym stawkom je Wojerowski farar Jörg Michel 23. meje před Budyskim krajnoradnym zarjadom njedostatkow w tamnišim zarjedźe za wukrajnikow dla protestował. 14. junija bě jemu krajny rada Michael Harig (CDU) list pósłał. Nastupajo tamniši pasus wo móžnym zranjenju datoweho škita bě so farar Michel na to na běrow sakskeho społnomócnjeneho za škit datow wobroćił. Tón piše 22. junija, „zo wobsteja ,masiwne dwěle‘ na wot krajnoradneho zarjada podatym prawniskim zakładźe za wozjewjenje datow přijimarja kredita“, kaž Michel krajnemu radźe 30. junija we wotmołwje na jeho list zdźěli. Złožujo so na stejišćo běrowa rěka tam dale, zo „wuprajenje 1. přirjadnika Uda Wićaza, zo ja (Michel – spřispom. red.) jako přirodna wosoba njepłaću a tohodla so na zakładne prawa datoweho škita powołać njemóžu, ,po datoškitnym prawje njepřitrjechi‘“. Mjeztym dyrbjał oficialnje wo tych wobmyslenjach informowany być kaž tež wo wočakowanju „wospjetneho pruwowanja prawniskeho połoženja“, zjima farar Michel dalše wuprajenje z běrowa społnomócnjeneho.

Poradźene zhromadne zarjadowanje su minjenu sobotu Drježdźanske towarstwo Stup dale a serbscy studenća skupiny „Bjarnat Krawc“ přewjedli. We wosadnicy swj. Měrćina předstajichu nałožki kaž ptači kwas, křižerjow, mejemjetanje, Měrćina spěwanje a přazu. Za to su dźěći serbsku narodnu drastu woblekli. Kak to činja, nawuknychu w dźěłarničce. Po małym přećahu po měsće zahudźi popołdnju kapała Serbska reja k rejam. Foto: Jadwiga Pjacec

Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym ­pčołkam a pčołarjam wěnujemy. (1)

Zo by sej pčołar dźěło wolóžił, trjeba za to prawy grat. Za wobstaranje tajkeho je Buderjec wobchod za pčołarsku potrjebu w Njeswačidle prawa adresa. Mjeztym ­sydom lět je tam wosebite předawanišćo, hdźež kóždy pčołar mjez šěrokej paletu poskitkow to trěbne za swoje dźěło ­nańdźe.

Po tym zo staj Buderjec mandźelskaj po towaršnostnym přewróće objekt bywšeho burskeho wikowanskeho zjednoćenstwa – tehdy znaty pod skrótšenku BHG – kupiłoj, je tam Christian Buder jako wučeny blidarski mišter swoju blidarnju zarjadował. Swójba z bliskeho Šešowa sej z druhimi wjesnjanami hłowu łamaše, čehodla běchu wunoški swojich sadowcow přewšo snadne. Wotmołwa bě jednora. W Šešowje mějachu lědma pčołki a popróšenje bě njedosahace. Tuž je sej dźensa 63lětny Christian Buder před dźesać lětami dwaj ludaj pčołkow wobstarał. Kołćej je sej blidar wězo sam natwarił.

Boža słužba dopominaše na wotměnjate stawizny Miłoraza

Miłoraz (AK/SN). Šuler a konfirmand Til Kowalick a wuměnkar Günter Zech čita­štaj předwčerawšim na swjedźenskej Božej słužbje „645 lět Miłoraz“ z biskopom Christianom Stäbleinom z ewangelskeje cyrkwje Berlin Braniborska Šleska Hornja Łužica hnujacej próstwje. „Rozžohnowanje a nadźija“ rěkaše hesło kemšow. Něhdźe sto ludźi z Miłoraza a dalšich wsow Slepjanskeje wosady bě přišło. Juliana Kaulfürstowa z towarstwa Kólesko čitaše bibliske teksty hornjoserbsce. Na kemšach zaklinčachu tež kěrluše a psalmy w Slepjanskej serbšćinje.

Budyšin (bry/SN). Jeno z wulkim zbožom njeje předwčerawšim dopołdnja na Budyskej Walskej k njezbožu dóšło, jako so tam wot lisćowca wulka hałza wotłama. Štom steji bjezposrědnje na kromje ležownosće kubłanskeho centruma, hnydom pódla toho je chódnik. Runje jako so hałza wotłama, běchu tam tři žony w bliskosći. Zranił pak so nichtó njeje. Hałza blokěrowaše wobě jězdni Walskeje a wobškodźi tohorunja parkowace wosobowe awto. Po rozprawje swědkow je so hižo před něšto tydźenjemi ze samsneho štoma wjetša hałza wotłamała.

Durje domu wotewrjene

Njechorń. W Domje Měrćina Nowaka-Njechorńskeho změja sobotu, 9. julija, dźeń wotewrjenych duri. Wot 14 do 17 hodź. poskića tam wodźenja po domje, pisany program Cyžec mandźelskeju kaž tež kofej a tykanc. Zastup je darmotny.

Swójbna njedźela k jubilejej

Smochćicy. Na swójbnu njedźelu přeprošuje Smochčanske kubłanišćo swj. Bena njedźelu, 10. julija, wot 14 do 17 hodź. Kubłanišćo swjeći při tej składnosći swoje 30lětne wobstaće. Na jewišću poskićuja pisany program a kołowokoło njeho dalšu zabawu.

Z wulkej party su minjeny kónc tydźenja w Smječkecach 25lětne wobstaće tamnišeho młodźinskeho kluba swjećili. Za to mějachu stanaj natwarjenej, do kotrejuž pjatk a sobotu 400 resp. 900 ludźi na techno-hudźbu přichwata. Wo nju starachu so wjacori DJjojo. Wopytowarjo chwalachu sej dobru organizaciju a wuběrne zastaranje. Mjez druhim poskićichu při barje słódne drinki a dalše napoje. Z dobytkom swjedźenja chcedźa mjez druhim přetwar swojeho kluba sobu financować. Foto: Lea Kralec