Z wudaća: srjeda, 21 septembera 2022

Towarstwo perspektiwa Hamor z. t. chce w regionje tworjene hódnoty zwyšić a jich direktne zwičnjenje zaměrnje sylnić. Jedyn tajki puć su prěnje přirodowe a regionalne wiki na Hamorskim přibrjohu Bjerwałdskeho jězora.

Hamor (AK/SN). Christine Zeidler, čłonka předsydstwa towarstwa Perspektiwa Hamor z. t., podšmórny sobotu na prěnich přirodowych a regionalnych wikach na Hamorskim přibrjohu Bjerwałdskeho jězora: „Regionalni wikowarjo trjebaja wjace móžnosćow, zo bychu swoje produkty předawali.“ 15 wikowarjow ze Zhorjelskeho a Budyskeho wokrjesa bě so na poskitku wobdźěliło. Woni su wopytowarjow z originelnej, luboznje přihotowanej snědanju witali. Zarjadowanje je start projekta „Přirodowe a regionalne wiki“ było. Zaměr je, kóždu třeću sobotu měsaca tajke wiki přewjesć. Nošny zaměr towarstwa je, wutworić małe wobchody, kotrež bychu wsy wožiwili a regionalnym wikowarjam šansu skićili, swoje produkty poskićeć a předawać.

Wuježk (SN). Přećeljo motorskich Hornja Łužica su sej zašły kónc tydźenja mjeztym 15. raz z dźěćimi a młodostnymi, kotřiž w dźěsćownjach bydla, wulećeli. Na 69 mašinach – mjez nimi motorske, triki, dwaj trabijej a přewodne jězdźidła – běchu hólcow a holcy, přebywacych we wobydlerskich skupinach Arche we Wuježku, Kočicy a Markkleebergu na zhromadnu jězbu přeprosyli. To zdźěli rěčnica za zjawnostne dźěło sakskeho towarstwa Kinderarche Sachsen e. V. Birgit Andert. „Za naše dźěći je jězba z bikerami wjeršk lěta“, rjekny ­nawodnica zarjadnišća we Wuježku Kristina Jöhling.

Zahajili su jězbu w Budyšinje, potom su we Wuježku snědali. Dźěći a młodostni mějachu praskotace jězdźidła za napjatu wěc. Po krótkim dešću su so wšitcy na turu po Hornjej Łužicy podali. Prěnju přestawku mějachu na Kulturnej kupje Einsiedel, hdźež bě chwile sej ležownosć wotkryć a hrajkać. Po swačinje dźěše dale do klóštra Marijiny doł pola Wostrowca. Po nawróće do Wuježka su dźěći z Markkleeberga z kulturnym programom zawjeselili. Z tradicionalnym zhromadnym grilowanjom je dźeń wuklinčał.

Sakski wuměłc Werner Juza we wysokej starobje zemrěł

Do mnohich wopomnišćow, kotrež dopominaja na kapłana Alojsa Andrickeho, słuša wulkoformatowa pomjatna tafla při jeho ródnym domje w Radworju. Na bywšej cyrkwinskej šuli, na kotrejž bě so měšnik 1914 do wučerskeje swójby narodźił, wotkrychu wopomnišćo składnostnje jeho posmjertnych 70. narodnin w lěće 1984. Do kopora ćěrjeny reliefowy wobraz bě w nadawku hłowneho předsydstwa strony CDU stworił moler a grafikar Werner Juza z Wachauwa pola Radeberga. Nětk je wuměłc 25. awgusta w starobje 98 lět zemrěł.

Werner Juza słušeše k wuznamnym sakskim tworjacym wuměłcam. W lěće 1924 bě so w Rodewischu we Vogtlandźe narodźił. Swój 1941 zahajeny studij architektury dyrbješe wójny dla po krótkim času zaso spušćić. Jako wojak w Ruskej a na zapadnej fronće dožiwi, kak móže čłowjek wšě etiske hódnoty zhubić a so ze zaničowanskej mašinu stać. Tute nazhonjenja jeho čas žiwjenja přewodźachu, jeho swětonahlad a jeho tworjenje wobwliwowachu.

Najprjedy raz dobra powěsć: Před ně­hdźe sto hosćimi su minjeny štwórtk w Kamjenskim měšćanskim dźiwadle wuchadźenje mjeztym 15. wudaća „Łužiskeho almanacha“ swjećili. Mjenje dobra je powěsć po dalewobstaću kóždolětnje wuchadźaceje regionalno-stawizniskeje knihi. „Podróšenja zhotowjenskich kóštow lětsa su dych wotražace. Almanach wudawace towarstwo a koło awtorow dźěła čestnohamtsce. Tola nowe płaćizny přichodne wudaće do prašenja stajeja“, zwěsći Norbert Schnabel, předsyda towarstwa, kotrež je po swojej hłownej publikaciji pomjenowane, we witanskej narěči. Su pak tež hišće hinaše přičiny: Tež Łužičenjo su před pozadkom stajnje stupacych kóštow za žiwjenje k lutowanju nuzowani. „Wotbytk knihow je w tychle časach dźeń a ćeši“, Schnabel wuzběhny.

ST 1922 Radwor – Biskopičanske KT 08 II 0:5 (0:2)

Za Radworske mustwo zasadźeni: Grenzemann – Wjeńka (46. Henka), F. Šěrak, Jendrewski, Reinecke, Glücklich, Krječmar (82. Kral), Schöne, Wjacławk (57. Šnajder), Paška, Schulze

Prjedy hač startowachu Łužiske lodohokejowe liški zašły štwórtk z dobyćom 4:3 přećiwo Sokołam z Heilbronna do noweje sezony, su so wone ze swójskimi fanami a jubilejnej hru na nowu sezonu nastajili.