Z wudaća: pjatk, 17 nowembera 2023

Kermušna kopańca w Delanach

Kermušnu njedźelu wočakuje prěnje koparske mustwo Sokoła Ralbicy/Hórki w Delanach zastupnistwo SC Großröhrsdorf. Před chětro ćežkim nadawkom steji Radworske mustwo. Wone dyrbi do Biskopic k načolnikej. Koparska partija hrajneho zjednoćenstwa Huska/Hodźij přećiwo Pančičanam we wokrjesnej lize hraje so w Dobruši na kumštnym trawniku.

18.11.  13:30  Biskopičanske KT II –

  ST Radwor

18.11.  13:30  HZ Huska/Hodźij –

  ST Marijina hwězda

18.11.  13:30  SJ Chrósćicy II –

  TSV Wjazońca

18.11.  14:00  SJ Njebjelčicy –

  ST Lubuš II

19.11.  13:30  Sokoł Ralbicy/Hórki –

  SC Großröhrsdorf

19.11.  14:00  SJ Chrósćicy –

  Drježdźanski SC

Derbyjej we Worklecach

Z wšěch šowow pukać budźe so jutře snano Worklečanska ćěłozwučowarnja. Tam stej mjenujcy přećiwnikaj prěnjeho wolejbuloweho mustwa muži cyłkaj z Wojerec a Budyšina. Z tym maja přihladowarjo hnydom dwaj derbyjej na jednym dnju. Wojerowčenjo su w aktualnej sezonje wobě hrě dobyli, mjez druhim pola aktualneho načolnika w Žitawje a wolejbulisća z města su w dotalnych hrach jeničce jednu sadźbu dobyli. Derbyje pak maja zwjetša swójske zakonje.

Wodorunje: 3 tekstilny wudźěłk, 5 hwězdno-, 6 rehabilitacija, 7 posłowny tekst, 10 spłóšiwe lěsne zwěrjo, 13 politiske zjednoćenstwo, kraj, 14 grjekski pismik, 15 přitok rěki Mosel

Padorunje: 1 wulki porst, 2 hospodarski plan, 3 pjenjez za posyłk, 4 grjekska stolica, 8 nutřkowno-, 9 ameriski bohačk, 11 hłowna wosoba, 12 jězor w Aziji

Trjebin (AK/SN). Wot noweho lěta chce gmejna Trjebin centralne wopłóčkowe popłatki zwyšić. Popłatk za mnóstwo postupi wot dotal 2,48 eurow na 4,53 eurow na kubikny meter, zakładny popłatk pak wot pjeć na 12,50 eurow. Za to je gmejnska rada kalkulaciju a wustawki njedawno jednohłósnje wobzamknyła.

Worklečanske kapałkowe towarstwo ma nowe předsydstwo. Wčera wječor staj Rejzka Krügerowa (2. wotl.) po wosom lětach ­spomóžneho skutkowanja na čole towarstwa kaž tež Andreas Ošika (3. wotpr.) zamołwitosć wotedałoj. Čłonojo noweho předsydstwa su dr. Beno Wałda (2. wotpr., předsyda), Mónika Ošikowa (napr., zastupjerka), Syman Bjarš (3. wotl., financnik) a Claudia Čornakowa (nal., pisarka). Najebać čas korony zhladuje towarstwo na wuspěšne dźěło a chce nadal nabožne žiwjenje we wsy podpěrować. Wulki dźak słuša tež wšitkim tym, kotřiž su so čestnohamtsce wo słužby w kapałce starali. Foto: Andreas Ošika

Budyšin. Spěchowanski kruh za serbsku ludowu kulturu z. t. přeprošuje wutoru, 28 . nowembra 2023, w 17 hodź. do Serbskeho domu w Budyšinje na wotewrjenje wustajeńcy „Dwórnišćo pisanosće“. Wustajeńca pokazuje wuslědki molerskeje dźěłarnički, kotrež nastachu lětsa pod nawodom Maje Nageloweje w Radworju a wokolinje. Wobdźělnicy dźěłarnički wěnowachu so wšelakorym wuměłskim technikam. Jedne ćežišćo běše, zwobraznić młodej žonje w serbskej drasće. ­Widźeć budu tohorunja ćišna a pohlady na krajinu kaž tež markantne twarjenja w Radworju.

Serbski krosnowar z přećelemi wjeršk swjećił

Achim Mič – znaty serbski krosnowar, pućowar a dyrdomdejnik ze Sulšec pola Kulowa – zmištrowa minjeny kónc tydźenja swój posledni wjeršk w Sakskej Šwicy. Po tym zo steješe jako prěni Serb na 8 035 metrow wysokej horje Gasherbrum II, je so jemu po 52 lětach skónčnje poradźiło, sej na wšěch 1135 wjerškow w Połobskich pěskowčinach zalězć. Dotal je to hakle něhdźe 350 krosnowarjow zmištrowało.

Prewencija seniorow

Wojerecy. Wobydlerscy policisća su wutoru w zarjadnišću za seniorow při Lipjecskim naměsće we Wojerecach mjez druhim wo temach: šokowy telefonat, trik wnučkow, kradnjenje tobołkow informowali. 77 seniorow běše připosłuchało.