Z wudaća: póndźela, 27 nowembera 2023

Kozarcy. Přichodny škotowy turněr serbskich seniorow wotměje so jutře, 28. nowembra, w Kozarčanskim hosćencu „Při kupjeli“. Započatk budźe kaž stajnje w 14 hodź. Nowačkojo su wutrobnje witani. Posledni lětuši turněr přewjedu 12. decembra w Budyšinje.

Wotewru wustajeńcu

Budyšin. Spěchowanski kruh za serbsku ludowu kulturu přeprošuje wšitkich zajimcow na wotewrjenje wustajeńcy „Dwórnišćo pisanosće“ jutře, wutoru, w 17 hodź. do Budyskeho Serbskeho domu. Wustajeńca pokazuje wuslědki molerskeje dźěłarnički lětsa w Radworju.

Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu ­přinošować chce naša serija z pokiwami z weterinarneje mediciny. (20)

Jako dyrbjachu konje w prjedawšich časach časćišo hišće na polu abo w lěsu dźěłać, je so chorosć husto a wosebje po swjatych dnjach jewiła.

Wokoło swjatych dnjow bu konjam hdys a hdys přidatna porcija dobreje picy přidźělena. To woznamjenješe wězo wjace energije za ćěło, kotruž pak kóń njepřetrjeba.

W Delnjej Kinje maja nětko knižnu budku. Undine Wowtscherk (na wobrazu) a wjesny předstejićer Norbert Haupt staj do Michendorfa jěłoj, zo byštaj tam ně­hdyšu telefonowu budku Telekom kupiłoj. Wuhotowana bu wona wot Norberta Haupta, za čož dochadźachu financy z Budyskeho wobydlerskeho pjenjeza. Krótko po wotewrjenju, na kotrymž bě tež Budyski wyši měšćanosta Karsten Vogt přitomny, pjelnješe so mini-biblioteka spěšnje z knihami, kotrež wobydlerjo darichu. Tež Robert Böhmer staji tam knihi, mjez kotrymiž bě wudaće „Puće rubjenych knihow“. Princip knižneje cele je, zo móže kóždy zajimc knihi nutř stajić a sej tajke tež z poskitka wubrać. To so mjeztym na mnohich městnach w měsće Budyšin, we wjesnych dźělach města a po cyłym Budyskim wokrjesu derje přiwza. Knižna budka je wšědnje wot 10 do 17 hodź. wotewrjena. Foto: Carmen Schumann

Swoju hłownu zhromadźiznu přewjedźechu Sokoljo z Ralbic minjenu wutoru. Něhdźe 30 čłonow delanskeho towarstwaa přichwataše do korčmy w stadionje „Jurij Frencl“. Prezident Dierk Šewc powita wšitkich přitomnych a formality poměrnje spěšnje přerěča. Wšitcy wobdźělnicy so za to wuprajichu, zo Šewc ze swojim teamom dale na čole Ralbičanskeho Sokoła dźěła. Kaž hižo staremu předsydstwu přisłušeja nowemu nimo Šewca tež wiceprezident Olaf Poldrack, sportowy direktor Steffen Frencl, pokładnik Roman Mjetaš-Wowčer a nawoda juniorow Jurij Bjeńš. Naposledk mjenowany jima so na to tež słowa. Wosebje wu­zběhnył je Sernjančan spore dźěło mjeztym 17 dorostowych trenarjow. W Ralbicach honi tuchwilu wjac hač 100 dorostowych koparjow za bulom – telko tam w zašłych lětdźesatkach njemějachu. 2008 na přikład bě jich mjenje hač 50.

Sudniska trójka Clemens Bětka, Andre Strelow a Michael Liebner (wotlěwa) měješe w sportowym formuje w Korzymje sobotu mało dźěła, wšako bě partija we wokrjesnej wyšej lize dosć fairna. Jenož wjedro njebě runjewon najlěpše koparske wjedro. Domjacy cyłk Horni kraj Sprjewja doby přećiwo hosćom z Kulowa ze 4:0. Foto: Jörg Stephan

Awtorka dźensa

Tereza Wićazowa

„Poćić so kaž bar w pjecy“, poćiš so jara, hdyž intensiwnje sportuješ. Serbska rěč ma mnoho rjanych rěčnych wobrotow a frazeologizmow. Tute wužiwaja so husto we wšědnym dnju. Zajimawe je přepytować, zo mamy tež někotre rěčne wobroty, kotrež z wobłuka sporta pochadźeja resp. ze sportom zwisuja. Rěčespytnicy mi njech prošu wodaja a mi nadźijomnje „žołtu kartu [nje]pokazaja“, jeli njejsym při někotrych swobodnych přełožkach němskorěčnych resp. mjeztym wobchadnorěčnych wobrotow do „čorneho trjechiła“. Dowolće mi małki eksperiment, wšako so tute „hodźa kaž pjasć na wóčko“. Dwójny zmysł podšmórnje pospyt: pak njepřitrjechi abo je njepřiměrjeny, snano „hinak trjech[ju] hač sy[m] so měrił[a]“ pak „tamna strona medalje“ so wuběrnje hodźi a wotpowěduje zmysłej. Tuž chcemy dale „při bulu wostać“ a sej dalše wobroty z wšelakorych sportowych družinow wobhladać.

SJ Chrósćicy II –

TSV Wjazońca 1:0 (1:0)

Zestawa domjacych: Škoda – M. Donat, Zynda, Dórnik, J. Donat (88. Mark), Domaška, Zahrodnik, Wencel (82. Klemenc), B. Donat (72. Liznar), Žur, Graf

Špatnych wobstejnosćow na domjacym trawniku w Chrósćicach dla wotmě so koparska hra mjez rezerwu Chróšćan sportoweje jednotki a přećiwnikom z Wjazońcy na sportnišću w Hórkach. Po bolostnej poražce w serbskim derbyju w Pančicach chcychu Chróšćenjo zaso raz swoju lěpšu stronku pokazać.

Regensburg (B/SN). Na adwentnym wěncu su po starej tradiciji tři fijałkojte a jedna róžojta swěčka. Fijałkojte swěčki wo­znamjenjeja rozmyslowanje a pokućenje, róžojta swěčka za třeći adwent pokazuje předwjeselo na bližace so hody. Tež měšnik třeću njedźelu adwenta w róžojtym abo swětłofijałkojtym ryzwje kemše swjeći. Kulojty wěnc symbolizuje ze zrowastanjenjom wěčne žiwjenje, zelenosć hałužkow same žiwjenje a swěčki přiběrace swětło hač do hód.

Adwentne wiki

Bonn (B/SN). Loni měješe adwentny čas 28 dnjow, lětsa jenož 22. Datum hód je kruty, jenož dźeń so měnja. Cyrkej předpisuje, zo ma adwentny čas štyri njedźele wopřijeć. Adwentne wiki nastachu spočatnje w protestantiskich městach. W katolskich kónčinach bě adwent zdobom póstny čas.

Nowy nawoda