TSG Neustrelitz –
Budissa Budyšin 0:0 (0:0)
Zestawa hosći: Große – Kolan, Patka, Pfanne, Heppner, Hausdorf (71. Šisler), Hoßmang, Rosendo (78. Němec), Barnickel (61. Žuljević), Hänsch, Salewski
Minjenu njedźelu bě regionalny koparski ligist Budissa Budyšin hósć TSG Neustrelitza, nošerja čerwjeneje latarnje. Dokelž bě sej tón do toho jenož jedne dobyće a dwaj remisaj nakopał, nadźijachu so Budyšenjo wažnych třoch dypkow. Před 257 přihladowarjemi započachu tež z dobrej móžnosću Ezequiela Rosenda, kiž pak njezamó z wólnym kopom wrotarja přewinyć (2.). Hosćo přewzachu hrajnu kontrolu, dyrbjachu pak přiwšěm kedźbować. W 10. min. dósta domjacy Solomon Okoronkwo wot sudnika čerwjenu kartu. Wón bě na zemi ležacemu Rosendźe bul do mjezwoča třělił. Wotnětka měješe Budissa muža wjace na kopanišću, Neustrelitz pak šěsnatku jara derje zakitowaše. W 31. min. přihra Martin Hoßmang bul Maikej Salewskemu, ale tón trjechi jeno žerdź. Nimale z wothwizdanjom połčasa prasny třělwa Luigija Campagna do žerdźe Budyskich wrotow.
Štóž je hižo raz jako coach na ławce w sportowej hali sedźał, tón wě, kak ćežko je, na kromje hrajnišća rozbudźeny być a ničo na hrajnym wotběhu změnić njemóc. Hišće ćešo bě to zašłu sobotu, jako dyrbješe poradźowar volleyballistow Worklečanskeje Viktorije hrajny dźeń swojich chowancow z 800 kilometrow zdaleneho Južneho Tirola sćěhować. Hakle po pjeć hodźinach dósta wón skónčnje Whatsapp-powěsć wo dwěmaj triumfomaj. Štož bě so do toho stało, wo tym je w detailu zhonił.
Viktoria Worklecy – JTVG Fitnes Koblicy 3:1 (26:24, 25:19, 19:25, 26:24)
SJ Njebjelčicy – ST Ćisk II 4:0 (2:0)
Zestawa domjacych: Hahn – Zeller, Šołta, Pawlik, Haška, Hrjehor, Lejnart, Kral, Hanuza, Šram, Korjeńk, Janca, Čornak, Hoelzel
Swój posledni test su koparjo Njebjelčanskeje SJ minjenu sobotu 4:0 dobyli, a to w Kamjencu na kumštnym trawniku přećiwo rezerwje z Ćiska. We woběmaj połojcomaj partije poradźichu so jim dwoje wrota.
Po někotrych derje wuhratych šansach docpě Robert Lejnart z wótrej třělwu nawjedowanje (28.). Wo 2:0 postara so Jakub Šołta. Wón bě so na lěwej stronje rjenje přesadźił a smokny kulowatu kožu z wótreho kuta do syće (38.).
Po přestawce wotzamkny Jurij Haška rjany nadběh, bul pak zleća nimo žerdźe. Na to slědowaštej dwaj dalšej nadběhaj přez Pawla Hrjehorja a znowa přez Hašku. Štwórć hodźiny do kónca bu Handrij Korjeńk z dołhej přihrawku pósłany a postara so wo 3:0. Štwórte wrota běchu tohorunja derje wuhrate. Lejnart bě Hrjehorja z rjanej přihrawku posłužił, a tón přetwori z niskej diagonalnej třělwu k 4:0. Hosćo z Ćiska Njebjelčanow lědma do wuskosćow přinjesechu. Škit steješe wěsće. Nimo toho pobrachowachu hosćom wjacori hrajerjo. Bjarnat Deleńk
FC Energija Choćebuz
– BFC Dynamo 1:0 (1:0)
Zestawa domjacych: Spahić – Stein, Matuwila, Schlüter, Baude, Putze, Kruse, Ziegenbein, Weidlich (77. Marcelo), Viteritti (88. Gehrmann), B. Förster (70. Mamba)
Po wulkotnych 90 hrajnych mjeńšinach mjez FC Energiju Choćebuz a FC Dynamo Berlinom běchu sej wšitcy přezjedni. Tónle 22. hrajny dźeń měješe wosebitu wobhladanjahódnu partiju w štwórtej lize, w kotrejž zetkaštej so mustwje na samsnej runinje. Najprjedy pak staraštej so dwě móžnosći hosći wo njepřijomne začuće na Choćebuskich tribunach. Hakle poněčim so domjacy lěpje do hry namakachu, bjez toho pak zo bychu sej někajke wjetše šansy za wrota wuhrali. Někotre sekundy do kónca prěnjeho połčasa pak nasta scena, kotraž bě pozdźišo za cyłu hru rozsudna. Kapitan Marcel Baude bě so na prawym křidle přesadźił a kulowatu kožu do směra na dołhi kut sunył. A Benjamin Förster docpě bjez problemow swoje dźesate wrota w aktualnej hrajnej dobje.
Po dobyću 4:0 pola Freiburgskich wjelkow su Łužiske liški magisku hranicu 80 dypkow překročili. Lodohokejowe statistiki předkołow zašłych lět pokazuja, zo docpěwaja cyłki z 80 a wjac dypkami tak mjenowane playoff-hry, hdźež so bój wo mišterstwo rozsudźa.
Ale je to tež najlěpša sezona po změnje? Tele prašenje hodźi so hakle po kóncu hłowneho koła wotmołwić. Přiwšěm móžemy hižo raz na „dobru“ lišču dobu pohladać. Lěto, w kotrymž měješe Běła Woda 80 a wjac dypkow na swojim konće, bě sezona 2004/2005. To je team wokoło trenarja Horymíra Sekery 84 ličakow nahromadźił. Tehdom bě jeho syn Martin Sekera wusahowacy hrajer Łužiskich liškow. Dirk Rohrbach a Matthias Wikström jemu při tym pomhaštaj. Tale trójka natřěla 192 scorer-dypkow, štož dosahaše za sedme městno w tabulce po hłownym kole. W štwórćfinalu pak bě přećiwo pozdźišemu mištrej a postupnikej z Duisburga spěšnje kónc: štyri hry – štyri poražki.
Awtor dźensa
Clemens Šmit
W dźensnišej kolumnje wěnuju so tróšku tym koparskim mustwam, kotrež poprawom přeco jenož w sćinje swojich „wulkich bratrow“ steja. W přichodnych linkach wobswětluju tuž aktualnu situaciju rezerwow našich serbskich koparskich mustwow.
Započinam w Chrósćicach. Nastupajo tamniše druhe mustwo njebě do spočatka sezony ani jasne, hač so scyła dosć ludźi hromadźe namaka. Cyłk hrožeše rozpadnyć, a samo wo wotzjewjenju mustwa bě skrótka rěč. Po tym zo bě trójka Bosćij Klimant, Michał Wowčer a Mathias Dórnik nazwučowarnje prowizorisce přewzała, chodźi nětko zaso wjace hrajerjow na trening. Płody angažementa nowych trenarjow pak njepokazuja so jeno na skrućenym mustwowym duchu. Tež aktualne zaměstnjenje w lize – wokrjesna klasa, stafla II – wupokazuje pozitiwnu tendencu. Jako tučasnje prěni tabulki wojuje SJC II samo wo mišterstwo a postup.
Ralbicy. Stara koparska garda Sportoweje jednotki Njebjelčicy přewjedźe minjeny pjatk w Ralbicach swój halowy koparski turněr, na kotryž bě sej štyri cyłki přeprosyła.
Dokelž běchu Pančičenjo jeno z dwěmaj hrajerjomaj přijěli, rozsudźichu so wjacori koparjo jim pomhać. Tak hrajachu z nimaj třo koparjo Zeleno-běłych z Hórkow, dwaj wot Sokoła Ralbicy/Hórki a jedyn Njebjelčan. Tale wubranka wobsadźi za Njebjelčanskej SJ druhe městno. Na dalšich pozicijach slědowachu Hórki, Ralbicy a Chrósćicy. Maik Brězan
TSV 90 Wjazońca
– Sokoł Ralbicy/Hórki 0:7 (0:1)
Zestawa hosći: J. Bjeńš – Šewc, Zynda (70. Bogusz), B. Bjeńš, Lulak (62. Schultz), S. Bjeńš, D. Gloxyn, Korjeńk, Wałda, Kurjat, Domaška (57. Matka)
We wosmifinalu wokrjesneho pokala hrajachu koparjo Sokoła Ralbicy/Hórki sobotu we Wjazóncy. Na krasnym arealu na horje woni wot wšeho spočatka na wuběrnym kumštnym trawniku dopokazachu, zo su jasny faworit. Přez cyłu partiju mějachu bul w swojich rjadach a hru stajnje zaso wotzady natwarjachu. Dołhe třělwy běchu cyle zrědka widźeć. W prěnim połčasu docpěchu najebać wjacore stoprocentne móžnosće jeničke wrota přez Fabiana Korjeńka. Rjanu flanku na dołhu žerdź přez Stefana Bjeńša zamó wón direktnje do saka sunyć (17.). Pětr Domaška docpě z hłójčku jeno žerdź, samlutki na wrotarja běžo wón na nim zwrěšći, Gabriel Kurjat prasny bul z krótkeje distancy wyše wrotow a dalše dobre móžnosće Sokoljo wuwostajichu. Chrystof Gloxyn, kiž steješe tónkróć jako sokołski trenar při liniji, swarješe na njekoncentrowanosć před wrotami, chwaleše pak hrajny natwar hač k přećiwniskej šěsnatce.