Zo AfD w zjawnym lisće CDU dowěrliwe rozmołwy poskića, je drje groteskne. Jeli bychu pak njedźelu zaso wólby do sakskeho krajneho sejma byli, by – hdyž ma AfD dale „izolowana“ wostać, kaž sej wčera předsydka frakcije Lěwicy Susanne Schaper přeješe – po trendźe woprašowanjow jenož koalicija CDU a Lěwicy wyše wostała. Je to mjenje groteskne? Abo AfD dóstanje hnydom absolutnu wjetšinu mandatow. Štož by wjetšinje našich čitarjow zawěsće tohorunja znajmjeńša groteska była. Schaper widźi tak a tak hižo Trumpa před wrotami sakskeho politiskeho swěta, wšako je AfD wčera mjez druhim pawšalne skrótšenje přiražkow wšěm wysokim šulam w Sakskej wo pjeć procentow jako jedne swojich wuměnjenjow za přihłosowanje etatej mjeńšinoweje koalicije CDU/SPD prezentowała. Tuchwilu móžemy sej jenož wěsći być, zo politiski wobswět serbskeho ludu tajki njewostanje, kaž tuchwilu je. Štóž sej mysli, zo wšo někak dale póńdźe, njeje realist. Marcel Brauman

Běła Woda/Żary (JR/SN). Dźesać holcow a hólcow 7. lětnika gymnazija Lewa ­Landauwa w Běłe Wodźe a dźesać šu­lerjow a šulerkow 8. lětnika zakładneje šule w pólskich Żarach su so tele dny w Běłej Wodźe zetkali. Zaměr němsko-pólskeje šulerskeje wuměny bě, předsudki wottwarić, přećelstwa nawjazać a z nazhonjenjow druheho wuknyć.

„Što woni tam za mjezu poprawom hinak činja hač my“, so Marta wćipna praša. Zhromadnje z Elisu a Lenu wobdźěli so wona na projektowym dnju w Bě­łowodźanskim škleńčerskim muzeju. Dopołdnja mějachu składnosć, so kreatiwnje wuspytać a z jednoreje škleńčaneje wazy mały wuměłski objekt stworić. Popołdnju wopytachu muzej škleńčerstwa. Pedagogiska sobudźěłaćerka muzeja Steffi Loos chwaleše sej wotewrjenosć chowancow. „Woni su wšitcy njesměrnje zajimowani. To wšědnje nimamy.“ Z ćim wjetšim lóštom sobudźěłaćerjo muzeja wo stawiznach škleńčerjenja powědachu. Šulerjo sej tójšto zapisowachu a so noweje wědy nasrěbachu.

Podstupim (dpa/SN). Nutřkowny minister Braniborskeje René Wilke (bjezstronski) pruwuje tuchwilu móžne změny zakonja za škit wustawy. Přičina za to je zwada dla pušćenja nawody krajneho ­wustawoškita. Njejasne je, hač wostanje wustawoškit přichodnje dale wotrjad nutřkowneho ministerstwa abo hač je swójski krajny zarjad snano zmysłapołniši, rjekny Wilke na posedźenju wuběrka krajneho sejma za nutřkowne naležnosće.

Zakoń z lěta 1991/92 zdawa so jemu mjeztym zestarjeny, Wilke rjekny. Trěbne su dźensa „wěste kontrolne mechanizmy“. Za konkretny posudk pak wón po runje třoch tydźenjach w zastojnstwje hišće žadyn fachowy zakład nima.

Bywša nutřkowna ministerka Katrin Lange (SPD) bě nawodu wustawoškita Jörga Müllera w meji pušćiła, dokelž bě tón ju pječa přepozdźe wo tym infor­mował, zo so AfD jako zawěsćena prawicarskoekstremistiska strona zastopnjuje. Bórze pak jewjachu so dwěle na jeje wuprajenjach. Na to dyrbješe tež ministerka Lange swoje zastojnstwo złožić. Jeje ­naslědnistwo přewza René Wilke, bywši ­wyši měšćanosta Frankfurta nad Wódru.

Pokradnjena wóskowa figura francoskeho prezidenta Emmanuela Macrona steji zaso na swojim městnje w muzeju w Parisu. Aktiwisća wobswět škitaceje organizacije Greenpeace běchu postawu před centralu energijoweho koncerna EDF nastajili, zo bychu přećiwo dale trajacym stykam Macrona k ruskim energijowym koncernam protestowali. Direktor muzeja pa­ducham wobkrući, zo su jara kedźbliwje z wóskowym Macronom wobchadźeli.

Na wšěch 28 000 eurow pokuty nakopił je přistajeny italskeje kupnicy na sewjeru kraja. Šěsć měsacow bě wón wšědnje ducy na dźěło ze swojim awtom přespěšnje jěł a sej při tym do pasli derje schowaneho błyskača zalězł – bjez toho zo by to pytnył. Mjeztym chłostanki běžnje z póštu dochadźeja. Wšitke pospyty přistajeneho, sej w zarjadach smilnosć wuprosyć, su dotal zwrěšćili.