To a tamne (14.08.23)
W durjach tčacy wostał je paduch w durinskim měsće Bad Langensalza. 25lětny pospyta pozdatnje so přez wokno do pincy wjaceswójbneho domu zadobyć. Při tym so wón wobsuny a zaklini so w durjach. Wobydlerjo wołachu policiju wo pomoc. Tuta přichwata a jeho wuswobodźi. Nětko ma so wón z jednanjom wosebje ćežkeho padustwa dla bědźić.
Jako wódna knježna zasłuži sebi 40lětna Andrea Wolfert swoje pjenjezy. Poprawom wšak chcyše so wona z babu stać, před lětami pak spjelni sej wona jako wódna knježna žiwjenski són. Cyłe lěto wustupuje mać třoch dźěći w kupjelach abo na dźěćacych narodninach. Trend, kotremuž sćěhuje tež Wolfert, mjenuje so mermaiding (mermaid=wódna knježna). Přiwšěm njeje powołanje jeno wjeselo, Wolfert wuzběhny. Powołanje je ćělnje napinace a strašne.
Kraj reparatury bórze podpěra
Drježdźany (SN/at). Sakske knježerstwo z toho wuchadźa, zo móža wobydlerjo wot 1. oktobra próstwu wo tak mjenowany bonus reparatury dla zapodać. To wuchadźa z wotmołwy na małe naprašowanje zapósłanca Franza Sodanna (Lěwica) nastupajo „zwoprawdźenje financneje podpěry za wuporjedźenje elektriskich a elektroniskich nastrojow“. Po sakskim dwójnym etaće 2023/2024 je za kóžde lěto 1,25 milionow eurow předwidźanych. Tónle bonus móža jenož połnolětni wobydlerjo a połnolětne wobydlerki z hłownym bydlenjom w Sakskej wužiwać.
Ručež je reparatura za elektriske a elektroniske nastroje dokónčena a zličbowanka předleži, móže so próstwa na bonus w spěchowanskim portalu Sakskeje natwarneje banki zapodać, rěka dale we wotmołwje knježerstwa. Minimalna suma zličbowanki je 75 eurow. Maksimalna podpěra wučinja 200 eurow za jednu reparaturu. Połojcu wudawkow za dźěłowy čas, narunanki a nadhódnotowy dawk spěchuja. Firmy, kotrež chcedźa so na reparaturowym bonusu wobdźělić, měli so přizjewić. Čłonstwo w IHK abo rjemjeslniskej komorje je za to jeničke wuměnjenje.
Zestajeja wojersku jednotku
Abuja (dpa/SN). Po hodźiny trajacych jednanjach su so statni šefojo zjednoćenstwa statow zapadneje Afriki Ecowas dojednali, zo zestajeja „hnydom“ zhromadnu wojersku jednotku za móžne zasadźenje w Nigeru. Wojacy maja tam wustawowy porjad zaso natwarić, rěka w zhromadnej kónčnej deklaraciji wjerškoweho zetkanja w stolicy Nigerije Abuja. Ecowas sej hladajo na puč w Nigeru „wšitke móžnosće“ wobchowa, porjad z měrniwymi srědkami zaso postajić.
FBI pomha po atentaće
Quito (dpa/SN). Po smjertnym atentaće na ecuadorskeho prezidentskeho kandidata Fernanda Villavicencija ma zwjazkowa policija USA pomhać. Prezident Ecuadora Guillermo Lasso je FBI wosobinsce wo pomoc prosył, palast prezidenta zdźěla. FBI je próstwje wotpowědował a sćele delegaciju fachowcow. Kandidat opozicije Villavicencio bu srjedu zatřěleny. Skućićeljo běchu po prěnich dopóznaćach policije „wukrajnicy“.
Wočakuja nowu žołmu gripy
Na centralnym torhošću Piazza Loreto sewjeroitalskeho Milana su ...
Dalše miliardy wojerskeje pomocy Ukrainje
Kijew (dpa/SN). Wot Ruskeje nadpadnjena Ukraina móže so dalšeje pomocy wjacorych miliardow dolarow nadźijeć. Wysokorjadni zastojnicy knježerstwa USA su wčera připowědźili, zo chcył prezident Joe Biden kongres wo něhdźe 13 miliardow dolarow (11,8 miliardow eurow) wojerskeje pomocy prosyć. Z pjenjezami chcedźa składy zakitowanskeho ministerstwa USA zaso napjelnić, z kotrychž dźěl wojerskeho materiala za Ukrainu pochadźa. USA su najwažniši zwjazkar Ukrainy w boju přećiwo ruskej inwaziji. Po informacijach Pentagona su USA wot spočatka wójny w februaru 2022 jenož za wojersku pomoc na dobro Ukrainy wjace hač 43 miliardow dolarow (35 miliardow eurow) Kijewej přewostajili abo přilubili.
Přidatnje k nowemu pomocnemu paketej přińdu hišće 7,3 miliardy dolarow (6,6 miliardow eurow) humanitarneje pomocy za Ukrainu a druhe potrjechene kraje. Dalše miliardy chcedźa přez swětowu banku wobstarać.
Płomjenja sej 53 woporow žadali
To a tamne (11.08.23)
Hoberski had je w małym šwicarskim městačku Kriens pola Luzerna po chódniku łazył a njeměr mjez ludźimi zbudźił. Přiwołana policija móžeše nimale dwaj metraj dołhu Woma Python popadnyć. Had, kiž bě z priwatneho terarija twochnył, je mjeztym zaso pola swojeho wobsedźerja. Tomu hrozy skóržba ranjenja zakonja za škit zwěrjatow dla.
Swojeho zajateho syna z rukow policije wuswobodźić spytała, je žona w badensko-württembergskim Achernje. 21lětneho běchu po zwadźe ze žonu zajeli. Při tym bě so muž masiwnje wobarał. Po tym zo běchu jeho zastojnicy do policajskeho awta tyknyli, přińdźe nadobo mać, zo by syna wotewzała, podarmo. Po dopóznaću policije je 21lětny předchłostany z drogami wikował. Zo by so jastwu wuwinył, je so muž za drogowu terapiju přizjewił. Statne rěčnistwo to pruwuje.
Chwali sej wěstotne mocy
Berlin (dpa/SN). Zwjazkowa nutřkowna ministerka Nancy Faeser (SPD) je dźěło wěstotnych zarjadnišćow hladajo na zajeće sobudźěłaćerja wotrjada zwjazkoweje wobory za wobstaranje materiala chwaliła. Muž bě so Ruskej pječa jako spion poskićił. „Tutón pad pokazuje, zo naše wěstotne institucije rusku spionažu w Němskej wobkedźbuja a přećiwo njej postupuja“, Faeser nowinarjam rjekny. „Smy jara kedźbliwi. Zjednoćamy mocy, zo bychmy na wohroženja reagowali.“
Boja so wopačnosćow
Gütersloh (dpa/SN). Zaměrne zasadźenje wopačnych informacijow a falšowanych fotow wulki dźěl wobydlerjow EU znjeměrnja: Tola z runje 44 procentami je mjenje hač połojca ludźi w Europje po swójskim wuprajenju informacije z interneta hižo raz přepruwowała. To je wuslědk přepytowanja Bertelsmannoweje załožby. Za studiju běchu so w měrcu 2023 wjace hač 13 000 wobydlerjow woprašeli. Po tym je 54 procentow njewěstych, hač su powěsće w interneće wěrne.
Niger w srjedźišću wjerška
Tonuški wuwiwaja so w centrumje nižozemskeho Amsterdama přiběrajcy ...
Pólska sćele wojakow k mjezy
Waršawa (dpa/SN). Pólska chce swoju mjezu k Běłoruskej z 2 000 přidatnymi wojakami zawěsćić. To je dwójce telko, kaž bě sej pomjezny škit žadał. Wojacy chcedźa přichodnej tydźenjej k mjezy dojěć, rjekny zastupowacy zakitowanski minister Maciej Wasik powěsćerni PAP. Spočatk tydźenja bě pomjezny škit wo tysac dalšich wojakow prosył. Waršawa so runja Litawskej aktiwitow ruskich zóldnarjow skupiny Wagner w Běłoruskej dla starosća.
Pólska ma jako čłon EU a NATO 418 kilometrow dołhu mjezu k Běłoruskej. Tam je mjeztym 5 000 pólskich hranicarjow a 2 000 wojakow zasadźenych. Pólska boji so prowokacijow, po tym zo su so wojowarjo skupiny Wagner po zwrěšćenym zběžku přećiwo Moskwje w Běłoruskej zasydlili. Pječa woni tam běłoruskich wojakow wukubłuja. Pólska so boji, zo móhli woni mjezu kraja překročić.
