Berlin (dpa/SN). Dobre lěto po tym zo je bywši zwjazkowy kancler Gerhard Schröder priwileg na swójski běrow a sobudźěłaćerjow přisadźił, zaběra tutón pad nětko justicu. Berlinske zarjadniske sudnistwo měješe dźensa pruwować, hač ma zwjazkowy sejm prawo, politikarjej SPD wurjadne prawa sćazać. Něhdyši zwjazkowy kancler skorži přećiwo wobzamknjenju etatoweho wuběrka sejma, jemu priwilegije sćazać a jeho běrow zawrěć. 79lětny sej žada, zo swój běrow a wotpowědnych sobudźěłaćerjow zaso dóstanje. Rozsud wočakowachu dźensa w běhu dnja. Podawk je jónkrótny a směrodajny. Poprawom je z wašnjom, zo maja něhdyši kanclerojo swójski běrow. Schröderej pak běchu tele prawo wotrjekli, dokelž pěstuje wuske styki k Ruskej a k prezidentej Wladimirej Putinej tež po nadpadźe Ruskeje na Ukrainu.

Bonn (dpa/SN). Bychu-li wšitcy ludźo na zemi samsny žiwjenski stil měli, kaž Němcy, bychu tři zemje trjebali, zo bychu swoju lětnu potrjebu na ressourcach kryli. Tohodla ma Němska dźensa swój tak mjenowany dźeń přećeženja zemje. Dary zemje, kotrež bychu, ryzy wobličene za lětsa k dispoziciji stali, su potajkim dźensa wučerpane. Tute wuprajenja złoža so na wobličenja US-ameriskeho zwjazka „Global Footprint Network“. Po wuprajenjach němskeho wobswětoweho zwjazka „Germanwatch“ zaleži nadwužiwanje ressourcow w Němskej wosebje na parnišćowych płunach, kotrež Němska w přewulkej ličbje wustorkuje. Ale tež wužiwanje surowiznow měło so drastisce redukować, chcyli zemju efektiwnje škitać. „Z grawěrowacymi wuskutkami tutoho lětdźesatki trajaceho nadwužiwanja dyrbja wosebje młódše, naslědne generacije, kaž tež chudźi čłowjekojo, wosebje w globalnym juhu, žiwi być“, praji Christoph Bals, jednaćel „Germawatch“. W mjezynarodnym přirunowanju wužiwa Katar najwjace ressourcow na wobydlerja.

Anonymny list wučerjow błótowskeje šule wo prawicarstwje zbudźa zajim

Wětošow/Choćebuz (dpa/SN). Turistiski zwjazk w błótowskich Bórkowach je prawicarske podawki na šuli města wobžarował. „Jako zamołwići turistiskeho zwjazka smy swětej wotewrjeni. Hosćo z tu- a wukraju su nam wutrobnje witani“, rjekny nawodnica zwjazka Annete Ernst powěsćerni dpa. Wo prawicarsko-ekstremnych njepočinkach je wona po swójskich wuprajenjach z medijow zhoniła.

W anonymnym lisće wučerjo Bórkowskeje šule skorža, zo su w šuli wšědnje z prawicarskim ekstremizmom, seksizmom a hidu na homoseksualnych konfrontowani. Dźe mjez druhim wo hokate křiže na meblach, prawicarsko-ekstremnu hudźbu w hodźinach a antidemokratiske parole na chódbach šule. Nimo toho dožiwjeja pedagogojo „murju mjelčenja“. Wučerjo skorža, zo nimaja žanu podpěru šulskeho nawodnistwa, šulskeho zarjada a politiki.

Z kolesom na dźěło přijěł je norwegski krónprinc Haakon (49). Składnostnje 50lětneho wobstaća akcije „Sykle til jobben“ (z kolesom na dźěło) je naslědnik norwegskeho krala naročnu čaru 20 kilometrow ze swojeje rezidency Skaugum hač ke kralowskemu hrodej w stolicy Oslu wčera při najrjeńšim słónčnym wjedrje na sportowym kolesu zmištrował. Poslednje kilometry přewodźachu jeho zastupnicy norwegskeho zwjazka zawodowych sportowych zjednoćenstwow, kiž akciju organizuja. We wobłuku kolesowarskeje akcije bě Haakon čaru lěta 2012 hižo raz ze swojej mandźelskej Mette-Marit (49) zmištrował.