Berlin (dpa/SN). Čłonojo CDU debatuja dźensa na tak mjenowanym „Kongresu přichoda“ wo splećenju temow kaž škita klimy, hospodarstwa a dźěłowych wikow. Sylne hospodarstwo a do přichoda sahacy škit klimy njejstej žadyn přećiwk, zdźěla předsyda CDU Friedrich Merz w přeprošenju na zarjadowanje pod hesłom „Němska móže to lěpje: Hospodarstwo sylnić, klimu škitać, dźěłowe městna wutworić“ w Berlinje. K tomu su sej wjacorych fachowcow přeprosyli. Merz rjekny dźensa rano w rańšim telewizijnym magacinje ZDF, zo ma Němska w technologijach přichoda wulke móžnosće. „Tute potency wužiwać je wunošniše, hač ludźi ze stajnje nowymi zakazami zludać.“

Kijew (dpa/SN). Telefonat ukrainskeho prezidenta Wolodymyra Zelenskeho a chinskeho statneho prezidenta Xi Jinpinga su mjezynarodnje jako pozitiwny signal wuzběhnyli. Wotpowědne reakcije su z Berlina a Washingtona znate.

Ukrainski prezident sam rěči wo „dołhej a chětro rozumnej rozmołwje“. Xi a Zelenskyj staj wčera wječor prěni króć po ruskim nadpadźe na Ukrainu telefonowałoj. Z ruskim prezidentom Wladimirom Putinom je Xi porno tomu hižo wospjet rěčał. Kritikarjo Chinje wumjetuja, zo njeje w konflikće mjez Ruskej ­a Ukrainu neutralna, kaž so stajnje zaso twjerdźi a zo njeje inwaziju hač do dźensnišeho hišće zasudźiła.

Zwjazkowe knježerstwo chwaleše telefonat jako dobry signal. China ma jako kruty čłon Bjezstrašnostneje rady UNO „wosebitu zamołwitosć za skónčenje ludowe prawo ranjaceho wójnskeho nadpada Ruskeje na Ukrainu“, zdźěli rěčnik knježerstwa. Němska pozicija k wójnje je znata: „Zakład sprawneho měra w Ukrainje je cofnjenje ruskeho wójska.“

Sakski krajny sejm wo wuwićowej pomocy na juhu Afriki debatował

Drježdźany (dpa/SN). Sakska chce swoju wuwićowu pomoc dale wutwarić a w tym zwisku projekty towarstwow podpěrać. We wusko splećenym swěće njeje hižo žanych izolowanych problemow wjace, nawopak, rjekny šef statneje kenclije Oliver Schenk (CDU) wčera w krajnym sejmje. „Štož so dźensa w Africe a na tak mjenowanym globalnym juhu – potajkim we wuwićowych a prohowych krajach – stawa, nas cyle bjezposrědnje po­trjechi.“ Wuwića w Europje so na druhim boku na globalnym juhu hnydom wuskutkuja. Jako přikład mjenowaše wón wuskutki wójny w Ukrainje na dodawanje žita do afriskich krajow. „Swět započina so před našimi durjemi. Jenož tón, kiž wostawa wotewrjeny za wuwića w druhich krajach, móže wliw a strategije wuwić, zo móhł na to reagować“, Schenk rjekny. “ Dźe wo to, wuwiće na městnje podpěrować, zo bychu tam puć do směra stability a perspektiwy do přichoda namakali. Za to měło so zrozumjenje za wužadanja globalneho juha sylnić.

Ignoranca z Berlina nastupajo woprawnjene, znajmjeńša lětdźesatkaj stare žadanje za elektrifikaciju hłowneju železniskeju čarow w Hornjej Łužicy je wosebity dopokaz njekmanosće. A wona je zawěsće swój dźěl k tomu přinošowała, zo ludnosć we wokrjesomaj Budyšin a Zhorjelc swoju njespokojnosć při wólbnej urnje zwura­znja. Zetkanje wodźacych komunalnych politikarjow wčera w Biskopicach bě dalši pospyt, ze zhromadnej mocu zjawnje na fatalne połoženje skedźbnjeć. Hornjołu­žiski pomjezny kraj nastupajo železnicu k susodomaj Pólskej a Čěskej kompatibelny njeje. A to so zdobom jako wohroženje na hospodarskim polu wopokazuje. Kak dołho budźe twarc kolijowych wozydłow Alstom swoje w Budyskej tworni produ­kowane elektriske ćahi hišće z dieselowej lokomotiwu do Drježdźan wlec? Pólska je pokazała, kak wobsah ze susodnym krajom podpisaneho statneho zrěčenja zeskutkowniš. Zo Němska tole w Hornjej ­Łužicy njedočini, wohańbja. Axel Arlt