Žitawa (dpa/SN). Po strašnej situaciji minjeny štwórtk w Žitawje je nětko dale a wjac detailow znate. Na demonstraciji přećiwo planowanemu přebywanišću za azyl pytacych z něhdźe 350 wobdźělnikami běchu so někotři z nich, zdźěla agresiwnje, na zjawne posedźenje měšćanskeje rady podali. „Policija je warnowała, zo móhła tajka situacija nastać“, wujasni Žitawski wyši měšćanosta Thomas ­Zenker (Zittau kann mehr). Tež w časach z napjatosćemi chcedźa zamołwići wobydlerjow zapřijeć a jim přistup k zjawnym posedźenjam zmóžnić. Zenker je na prašenja demonstrantow wotmołwjał. Nimo toho pak skedźbni wón na to, zo prawicarske skupiny ludźi znjewuži­waja. K demonstraciji běše strona „Freie ­Sachsen“ namołwjała.

„Wjele ludźi so powšitkowneje situa­cije dla starosća a su njewěsći“, Zenker rozkładźe. Přebywanišćo začuwaja jako wohroženje. Wyši měšćanosta prosy wo zrozumjenje a chce tež tajke situacije w Žitawje zmištrować.

Berlin (dpa/SN). Sydom tydźenjow po wospjetnych wólbach w Berlinje stej CDU a SPD dźensa koaliciske zrěčenje předstajiłoj. Tři tydźenje su zastupjerjo zhromadnje jednali. W mjezyčasu chwalachu woni dobru atmosferu rozmołwow.

K ćežišćam noweho knježerstwa słušeja twar bydlenjow, program za škit klimy a reforma zarjadnistwa. Tež policija a wohnjowa wobora měłoj lěpše wuhotowanje dóstać. Woběmaj stronomaj je wažne pokazać, zo je město Berlin pisane a mnohostronske.

Hišće minjeny kónc tydźenja stej CDU a SPD na koaliciskim zrěčenju dźěłałoj. Naposledk dyrbjachu čłonojo wo financowanju rěčeć. Tež wšelake ressorty sej rozrjadowachu. Tak zamołwja CDU ressort wobswět, mobilita a škit klimy. Dale přewza strona senatne zarjady za kubłanje, financy, justicu a kulturu. SPD dósta zamołwitosć za wobłuki nutřkowne naležnosće, bydlenje a twarstwo, dźěło, socialne, hospodarstwo, strowotnistwo a wědomosć. Jako nowy wyši měšćanosta Berlina je krajny šef CDU Kai Wegner předwidźany.

Diskusija a z njeje wuchadźacy kompromis „zakład demokratije“

Budyšin (CS/SN). Referent najmłódšeje „Budyskeje narěče“ bě minjeny pjatk z Wiena do Budyšina přijěł, zo by w tachantskej cyrkwi porěčał. Znaći běchu Hasnainej Kazimej prajili: „Ow božo, ty pojědźeš do Budyšina ... ?“ – jakož by so do „krizoweje kónčiny podał, hdźež drje něšto njetrjechi“. Tohodla chcyše „něšto wo Budyšinje zhonić“.

Po swojej zawodnej narěči bě tójšto prašenjow a statementow. Referent rjekny, zo so wón tež rady w socialnych medijach z wužiwarjemi rozestaja. To jemu woznamjenja, rozdźělne argumenty wotwažować a swójsku poziciju ewentualnje znowa postajić. „Njeměli so konflikta bojeć, přetož zwada je něšto dobre, dołhož njedóńdźe k skřiwdźenjam abo nadpadam. Diskusija je zakład demokratije. Njech pytamy za wurunanjom mjez ­wolu wjetšiny a mjeńšinu wobydlerstwa kaž tež mjez indiwidualnymi zajimami. Njeń­dźe wo to, zo jedna strona ‚dobudźe‘, ale wo kompromis.“

Prapremjera twórbow wjele lubjaceho młodeho komponista w Serbskim ludowym ansamblu, comeback drje najwažnišeje wobstajnje aktiwneje serbskeje band tohole lěttysaca w Kamjentnym domje – minjeny kónc tydźenja bě publikumej wospjet wužadanje so rozsudźić, dokal so nětkle podać. Podobne ćeže wujewichu so hižo wčera tydźenja z prěnim předstajenjom dźiwadłoweje skupiny Kulowskeho Bratrowstwa a prezentaciju wuslědkow dźěłarnički LAB F. Mjenowane eksemplariske přikłady pokazuja, zo su sej zarjadowarjo nadal předewšěm přezjedni, sej přihladowarstwo mjez sobu po móžnosći njepopřeć – cyle njehladajo na sep „němskich“ eventow, kotrež so paralelnje wotměchu a wotměwaja. Zawěsće by wuměłcam kaž tež wopytowarjam přihódnišo było, so takrjec roztorhać njedyrbjeć. Najskerje pak so na aktualnym postupowanju přespěšnje ničo njezměni, ale městno za nadpismo wšak dowola wjacecyfrowe pokročowanje ... Bosćan Nawka