Po schwalenju husto diskutowaneje rentoweje reformy je minjenu nóc w ...
„Swójske zajimy zastupował“
Lipsk (dpa/SN). Tež Lipšćanska skupina SPD Lipsk-wuchod/sewjerowuchod je znapřećiwjenje přećiwo wobzamknjenju stronskeje změrcowskeje komisije zapodała, po kotrymž smě bywši zwjazkowy kancler Gerhard Schröder najebać swoje wuske zwiski k Ruskej w stronje wostać. „Zaměr měł być, zmylki strony nastupajo politiku z Ruskej přepruwować. Schröder ma zamołwitosć za swoje zadźerženje přewzać“, zdźěli zastupowacy předsyda Lars Klaus Aßhauer na naprašowanje. Wón wumjetuje kanclerej, zo je so za čas swojeho zastojnstwa za swójske financielne zajimy zasadźił. Z tym je wón SPD a Němskej bytostnje škodźał.
Lipšćanska skupina přizamknje so wobsahowje skupinje SPD badensko-württembergskeho Leutenbacha, kotraž bě spočatk měrca připowědźiła, znapřećiwjenje zapodać. Spočatk měrca bě změrcowska komisija wobwoda SPD Hannover wšitke próstwy wo sankcije strony přećiwo Schröderej wotpokazała.
Dalše rozmołwy Putina a Xi Jinpinga
Moskwa (dpa/SN). Ruski prezident Wladimir Putin a chinski statny a stronski šef Xi Jinping staj dźensa z rozmołwami w Moskwje pokročowałoj. Po wčerawšim zahajenju z wosobinskej rozmołwu wobeju politikarjow wo wójnje w Ukrainje, kotraž traješe dlěje hač štyri hodźiny, steja dźensa jednanja knježerstwoweju delegacijow w srjedźišću. Při tym dźěše předewšěm wo hospodarsku kooperaciju.
Po informacijach Krjemla chcychu dwě zrěčeni wo „wšo wopřijacym partnerstwje“ a „strategiskim zhromadnym dźěle“ podpisać. Na wuradźowanjach wobdźěli so tež ruski minister za zakitowanje Sergej Šojgu. Kaž Krjeml zdźěla, stejachu tež prašenja wojersko-techniskeho zhromadneho dźěła na programje. Na zapadźe so boja, zo móhła China Ruskej brónje za nadpadowu wójnu přećiwo Ukrainje dodawać.
Putinej je wopyt chinskeho hosća dobra składnosć, swětej pokazać, zo njeje mjezynarodnje izolowany. China njeje wójnu Ruskeje přećiwo Ukrainje dotal zasudźiła a chce měrowe jednanja.
Zakoń tež za serbske mjena
Jednaćelka Domowiny wita zakonske plany zwjazkoweho knježerstwa
Drježdźany/Budyšin (SN/MkWj). Zwjazkowy minister za justicu dr. Marco Buschmann (FDP) je připowědźił, zo chcył tuchwilu płaćiwy zakoń wo mjenach w Němskej změnić a w tym zwisku tež Serbam zmóžnić, tradicionalne swójbne mjena wužiwać, mjez druhim žónsku kóncowku „-owa“. Změnu zakonja chcedźa hišće lětsa w zwjazkowym sejmje wobzamknyć. Torsten Herbst, sakski zapósłanc FDP w zwjazkowym sejmje a parlamentariski jednaćel tamnišeje frakcije, je so k tomu wčera wuprajił: „Jako sakski zapósłanc witam, zo so wažna naležnosć serbskeho ludu w změnje zakonja wo mjenach wobkedźbuje. Bě to dołhi puć hač k rozrisanju tutoho problema, kotrež njeje předchadźace knježerstwo bohužel zwoprawdźiło. Wjeselu so tuž ćim bóle, zo bě zwjazkowy minister za justicu namjetam wot wšeho spočatka wotewrjeny a zo je nětko jednał. To je znamjo česćownosće napřećo Serbowkam a Serbam.
Hišće su prašenja
Změna trěbna
Drježdźany (dpa/SN). Sakske knježerstwo steji před wulkimi wužadanjemi w zwisku z politiku ćěkancow. Třěšny zwjazk organizacije za migrantow je wčera swoju pozicisku papjeru předstajił. Mjez druhim žada sej zwjazk decentralne zaměstnjenje ćěkancow, elektronisku strowotnisku kartku za potrjechenych, přistup k rěčnym kursam němčiny a dźěłowym wikam, wólbne prawo za migrantow kaž tež wojowanje přećiwo rasizmej.
Wjac hač 40 organizacijow je pozicisku papjeru podpisało. Ćěkancy měli so na zjawnym žiwjenju wobdźělić směć, měni jednaćelka sakskeje rady za ćěkancow Angela Müller. „Po cyłym swěće su hibanja ćěkancow“, wona wuswětli. Škita potrěbni njemóža po předstawach politikarjow jednać, wšako njeńdźe wo swójske derjeměće, ale wo zachowanje swójskeho žiwjenja. Migraciji njehodźi so tuž zadźěwać.
To a tamne (21.03.23)
Šćenjo je w porynsko-pfalcskim Germersheimje na třěše šěsćposchodoweho wysokodomu do dešćoweje ryny padnyło. Wuchowanscy pomocnicy móžachu małeho psyčka na zbožo wuswobodźić. Wobydlerjo běchu njezbožo zawčerawšim policiji přizjewili. Tak je Milow w njewobkedźbowanym wokomiku přez třěšnu terasu do ryny padnył. Wohnjowa wobora Germersheima bě tři jězdźidła a dźesać pomocnikow na zasadźenje pósłała.
Při pospyće swětoweho rekorda, su fanojo alpskeho hospodarstwa minjenu sobotu w Allgäuju sylne znamjo sadźili a z kruwjacymi zwonami wótře zwonili. „Nastajichmy wuběrny swětowy rekord z 2 357 zwonami“, wjeseleše so turistiski direktor Bad Hindelanga Max Hillmeier. „To wotbłyšćuje wuznam zwonow jako kulturne herbstwo we wokrjesu Oberallgäu a wučinja našu DNA.“
Rozdźělne měnjenja
Bonn (B/SN). Biskopja Němskeje su reformowy projekt katolskeje cyrkwje posledni raz wobjednali. Při tym wobzamknychu konkretne reformy: žohnowanje jenakosplažnych porow maja so dowolić, normy wobchada ze seksualnymi přeńdźenjemi maja so přiwótřić a bamž ma winowatosć celibata znowa pruwować. Tróšku zdźeržliwišo wupraji so Irme Stetter-Karp, prezidentka Centralneho komiteja katolikow Němskeje, zastupnistwa lajkow. Synodalny puć je po jeje měnjenju k nowej rozmołwnej kulturje wjedł, wona chwaleše. Na druhim boku měło pak so tež rjec: „Njeje so nam poradźiło, struktury katolskeje cyrkwje w Němskej woprawdźe změnić. Dobre tři lěta za to njedosahaja.“ Tohodla chcedźa přichodne tři lěta ze synodalnym wuběrkom synodalnu radu přihotować, w kotrejž duchowni a lajkojo zhromadnje rozsudźa. Vatikan tajki gremij wotpokazuje.
Zbožopřeća bamžej
Rada warnuje změny klimy dla
Interlaken (dpa/SN). Nowa rozprawa swětoweje klimoweje rady ma na strachi a rizika skedźbnjeć, jelizo so klima dale změnja. Gremij měješe dźensa w šwicarskim Interlakenje rozprawu předstajić. Hižo do toho bě znate, zo dyrbi so swět na dalše ekstremne wjedrowe podawki nastajić. Trěbne je, zo so emisije drastisce zniža, jelizo chce swětowa towaršnosć tomu zadźěwać.
Chinski šef pola Putina
Moskwa/Kijew (dpa/SN). Ruski prezident Wladimir Putin witaše dźensa chinskeho statneho šefa, Xi Jinpinga, do Moskwy. Hač do zajutřišim su rozmołwy předwidźane, w kotrychž ma so strategiska kooperacija mjez krajomaj wobjednawać. Za Putina je wopyt jara wažny, wšako móže wón dopokazać, zo pěstuje mjezynarodne kontakty a izolowany njeje. China njeje wójnu Ruskeje přećiwo Ukrainje zasudźiła a chce so za jednanje wo měr zasadźić.
Njeměr na financnych wikach
