Uvalde (dpa/SN). Atentatnik Salvador Ramow z texaskeho Uvalde, kotryž je minjenu wutoru na tamnišej zakładnej šuli 19 dźěći a dwě wučerce zamordował, je po oficielnych ­informacijach něhdźe jednu hodźinu w rjadowniskej stwě zachadźał. Hakle potom su dalše zastojnicy do šule přišli a 18lětneho nadpadnika zatřělili. Mjeztym je w USA znowa wulka diskusija wo krućišich prawidłach hladajo na wobsydstwo brónjow. Dźensa zahaji so lětne zeńdźenje brónjoweje lobby, kotraž je jara mócna a krućiše postajenja wotpokazuje.

Bitwa wo Donbas dale traja

Kijew (dpa/SN). Ukrainski prezident ­Wolodymyr Zelenskyj starosća so wo ­wuchod kraja, kotryž Ruska tuchwilu masiwnje nadběhuje. W Donbasu su kónčiny lědma hišće wobsydlene. „Ruska ofensiwa wjedźe k tomu, zo njeje w regionje ani čłowjeka. Města so zniča, wobydlerjo so morja abo wotwjeduja. To je ludomordarstwo“, Zelenskyj wčera wječor we widejowej narěči wuzběhny.

Tesla chce twornju rozšěrić

Moskwa (dpa/SN). Ruska je hladajo na eksport žita z Ukrainy „zapadne kraje“ znowa namołwiła, sankcije wotstronić. Tak su zwólniwi, žita a hnojiwa transportować a k tomu přinošować, zo so kriza ze žiwidłami złahodnja. „Wuměnjenje je zakónčenje politisce motiwowaneho wobmjezowanja ze stron zapada“, ruski prezident Wladimir Putin wčera po te­lefonaće z italskim šefom knježerstwa Mariom Draghijom wuzběhny. Ministerski prezident w Romje je wo rozmołwje rozprawjał a situaciju rozłožował. Nětko chce wón z ukrainskim prezidentom ­Wolodymyrom Zelenskym rěčeć a so wo jeho měnjenju wobhonić. Po słowach Draghija njeje tuchwilu žaneje nadźije na měr w Ukrainje.

Tež rěčnik Krjemla Dmitri Peskow je hižo wo móžnym eksporće žita z Ukrainy rěčał a sej wotstronjenje sankcijow přećiwo Ruskej žadał. Ukrainske knježerstwo je „zapadne kraje“ namołwiło, so nic wunućić dać.

Kristiansand (dpa/SN). Němska chce při wutwarje wětrnikowych parkow w Baltiskim morju z druhimi krajemi regiona wušo hromadźe dźěłać. Wonkowna mi­nisterka Annalena Baerbock (Zeleni) je předwčerawšim, srjedu, na prěnim zetkanju Rady krajow při Baltiskim morjom w norwegskim Kristiansandźe připowědźiła, zo chcyła Němska prěni park w morju zhromadnje z druhimi krajemi natwarić. To njeje jenož trěbne za docpěće klimoweje neutrality, ale słuži tež zaručenju energijoweho zastaranja.

Němska chcyła za to swoje 1. julija so zahajace předsydstwo rady wužiwać, do kotrejež słuša jědnaće statow a Europska unija. Z Norwegskej a Islandskej stej w njej tež krajej zastupjenej, kotrejž bjezposrědnje při Baltiskim morju njeležitej. Minjeny tydźeń bě zwjazkowe knježerstwo podobnu kooperaciju při twarje parkow wětrnikow w Sewjernym morju připowědźiło. Zetkanje w Kristiansandźe bě prěnje po wuzamknjenju a wustupje Ruskeje z gremija po nadpadźe na Ukrainu. Wuše zhromadne dźěło ma pomhać, so z wotwisnosće wot ruskich energijowych žórłow a fosilnych srědkow scyła wuswobodźić.

Lózyski ganzor z mjenom Günther poćežuje ludźi w Northeimje pola Göttingena. Wjacekróć je zwěrjo hižo z burskeho statoka twochnyło, dokelž je płót prawdźepodobnje přeniski. Dokal ganzor chce znate njeje. Wobydlerjo su jeho hižo ­někotre razy zetkali a policiju zawołali. Zastojnicy ganzora hižo derje znaja a spožčichu jemu mjeno Günther. Kaž pak policija wčera rano zdźěli, so zwěrjo po wšěm zdaću z tamnymi husycami burskeho statoka njeznjese, štož je najskerje přičina ćěkanja.

Z jenož hišće tři fungowacymi kolesami na jězdźidle bě zawčerawšim pjana 56lětna šoferka w porynsko-pfalcowskim wokrjesu Westerwald po puću. Swědka, kotraž w awće za njej jězdźeše a njewěste wodźenje wobkedźbowaše, zawoła policiju. Zastojnicy zwěsćichu pola 56lětneje hódnotu 1,67 promilow.