To a tamne (03.06.22)
Samsny dźeń dźěćo porodźiłoj stej sotře-dwójnikaj w Israelu. 31lětnej běštej wutoru do chorownje přišłoj, dokelž so porod bližeše a stej samsny dźeń syna porodźiłoj. Za wobě žonje bě to štwórte dźěćo, kóžda z njeju ma hižo dwě dźowce a syna. Wobě sotře ležitej nětko w samsnej stwě w porodowej chorowni.
Ničeji kenguru zaběra ludźi we Wegbergu w Heinsbergskim wokrjesu njedaloko nižozemskeje mjezy. Policija prosy wobsedźerja, so spěšnje přizjewić. Roznošowar nowin bě zwěrjo minjenu njedźelu wuhladał, jako po dróze skakaše. Policija njemóže sej rozkłasć, zwotkel kenguru přińdźe, wšako nimaja tam daloko a šěroko zwěrjency abo parki dźiwiny. Póndźelu su wobydlerjo kenguru znowa wuhladali a fotografowali. Zwěrjo pak je so w bliskim lěsu zminyło. Tam pak podarmo za nim pytachu.
Wojowanja dale traja
Kijew (dpa/SN). Wojowanja wo zarjadniski centrum Sjewjerodonjeck na wuchodźe Ukrainy dale traja. „Přećiwnik Sjewjerodonjeck dale nadběhuje“, ukrainski generalny stab zdźěla. Hižo wčera běchu ruske jednotki centrum města zdobyli, byrnjež wulke straty poćerpjeli. W nakromnych dźělach Bobrowe a Ustyniwka pak njemóžachu so přećiwo ukrainskim zakitowarjam přesadźić. Sjewjerodonjeck je strategisce wažne město.
Dalše etatowe wuradźowanja
Berlin (dpa/SN). Zwjazkowy sejm je dźensa ze swojimi wuradźowanjemi wo etaće Zwjazka za lěto 2022 pokročował. Při tym rěčachu mjez druhim wo etaće nutřkowneho, hospodarskeho a strowotniskeho ministerstwa. Jutře chce zwjazkowy sejm etat doskónčnje schwalić. Koalicija SPD, Zelenych a FDP chcyła 139 miliardow eurow nowych kreditow brać. Unija CDU/CSU knježerstwu wumjetuje, zo pjenjezy broji, zo nima ćežišća a žane ideje, hdźe móhło so lutować.
Štyrjo mortwi při třěleńcy
Z wotmachom hotuja so w Londonje na kónctydźenske swjatočnosće k ...
Madźarska dalše sankcije blokuje
Brüssel (dpa/SN). Madźarska žada sej dalše změny paketa sankcijow přećiwo Ruskej a je tak najprjedy raz blokuje. Konkretnje sej kraj žada, planowane chłostanske naprawy přećiwo nawodźe rusko-prawosławneje cyrkwje patriarchej Kyrilej zběhnyć. Tole su diplomaća wčera wječor powěsćerni dpa wobkrućili. EU bě planowała, wčera wječor wo mjeztym šestym pakeće sankcijow rozsudźić. W nocy na wutoru běchu w zwadźe wo embargo ruskeho zemskeho wolija kompromis docpěli. Madźarska bě přesadźiła, zo su wolijowody wot embarga wuwzate.
Patriarcha Kyrila chcychu toho podpěry za ruski nadpad na Ukrainu dla na sankcisku lisćinu napisać. Konkretnje by to rěkało, zo njesmě Kyril wjace do EU přińć. Madźarski ministerski prezident Viktor Orbán bě njedawno připowědźił, zo tole wotpokazuje, dokelž „njemóžeš takle z nawodu cyrkwje wobchadźeć“.
Rozsud witany
Wo miliardach so dojednali
Berlin (dpa/SN). Fachowi politikarjo amploweje koalicije a unije su so na wurjadnym posedźenju zakitowanskeho wuběrka zwjazkoweho sejma wo hišće wotewrjenych prašenjach nastupajo wužiwanje paketa sto miliardow eurow za Zwjazkowu woboru dojednali. Do toho su politikarjam wotpowědne podłožki wo wobstaranju nowych bróni předpołožili. Politikarjo CDU a CSU běchu sej podłožki žadali. Mjeztym je tež etatowy wuběrk paketej přihłosował. Tak móže zwjazkowy sejm jutře wothłosować.
Amplowa koalicija SPD, Zelenych a FDP kaž tež CDU/CSU běchu so njedźelu wječor po tydźenje trajacej ćahańcy na zakonske zakłady za planowane „wurjadne zamóženje“ dojednali. Z tym je zasadnje zelena swěca za skazanje nowych bróni pola brónjenskeje industrije we wulkim stilu data. Mjez druhim chcedźa moderne bojowe lětadła F-35 w USA kupić. Dokelž ma wurjadne zamóženje na dobro Zwjazkoweje wobory w Zakładnym zakonju zakótwjene być, trjebaja w zwjazkowym sejmje wjetšinu dweju třećinow.
Partnerstwo kultury a turizma
Branša so poněčim zhraba, dźakowano tež spěchowanju ze stron stata
Drježdźany/Zhorjelc (SN/bn). Po informacijach statistiskeho zarjada Sakskeje je ličba w turistiskej branši swobodneho stata přistajenych porno lětu 2020 wo něhdźe tři a poł procenta spadnyła. Mnóstwo přenocowanjow je wo nimale 40 procentow woteběrało, dohromady zličichu cyłkownje něhdźe jenož połojcu wopytowarjow. „To zwisuje předewšěm z wobmjezowanjemi koronapandemije dla. Hakle wot lětušeho nalěća bě nowostart móžny“, kaž statna ministerka za kulturu a turizm Barbara Klepsch (CDU) předwčerawšim wozjewjenu lisćinu zarjada komentuje. Zo by so branša „spěšnje zaso zhrabała, podpěramy ju mjez druhim ze spěchowanskej směrnicu ‚Nowostart turizm‘ we wobjimje 5,6 milionow eurow kaž tež z kampanju ‚Turistiske talenty za Saksku‘ za přiwabjenje nowych fachowych mocow“, ministerka podšmórny.
To a tamne (02.06.22)
Wulki kenguru je so w Awstralskej wosrjedź dróhi do muža dał a je šěsć mjeńšin z nim wojował. Při tym so muž snadnje zrani. Zwěrjo bě psy 59lětneho na toho ležownosći atakowało. Na to hrabny sej muž retl a chcyše kenguruwa wućěrić. Tón pak do muža kopaše a biješe a jemu do porsta kusny. Po njeskónčnych šěsć mjeńšinach so zwěrjo skónčnje wotsali. Muž jemu ani zły njeje: „Smy swoje sydlišća na jich kraju twarili“, wón rjekny. Nawuknył při wšěm je, zo móže kenguru chětro njemdry a agresiwny być.
Za padustwo su so paduši w Nottulnje pola Münstera zamołwili. Tući běchu so do předawanskeje budki za truskalcy zadobyli a marmeladu a sekt spakosćili. Dwaj dnjej pozdźišo tu rubizna zaso bě, wobsedźerka zdźěli. Připołoženy bě papjerka ze zamołwjenjom za „hłuposć“. Policija pyta nětko za swědkami.
Wólbny bój 1990 w fokusu
Nowy minister z programom
Drježdźany (dpa/SN). Nowy nutřkowny minister Sakskeje Armin Schuster (CDU) je dźensa w krajnym sejmje prěnju knježerstwowu deklaraciju w zastojnstwje wotedał. Po hesłom „Wjace na dobro wobydlerjow – za sylnu, wěstu a žiwjenja hódnu Saksku“ chcył so Schuster předewšěm wo sylnjenje policije a skrućenje wěstoty zasadźić, wón rjekny. Po jeho měnjenju su policisća w Sakskej sylnišo wužadani hač druhdźe, mjez druhim mjezy k Pólskej a Čěskej a wjele zarjadowanjow dla.
Faeser žadanja wotpokazuje
Berlin (dpa/SN). Zwjazkowa nutřkowna ministerka Nancy Faeser je žadanja Bayerskeje wotpokazała, dźesać miliardow eurow za škit před katastrofami wudać. „To je jara, jara wulka suma“, rjekny politikarka SPD dźensa w rozhłosu. Bayerski nutřkowny minister Joachim Herrmann (CSU), kiž tuchwilu konferencu nutřkownych ministrow nawjeduje, bě tute žadanje do dźensa so zahajaceho zetkanja ministrow nastajił. Wón chcył tak pomocne organizacije a wohnjowe wobory technisce lěpje wuhotować.
Weber za nawodu EVP woleny
