To a tamne (10.06.22)
Francoscy cłownicy su dweju Němcow při zapućowanju do Španiskeje zadźerželi a při kontroli w transporteru štyri aligatory namakali. Přiwołany fachowc za škit zwěrjatow zwěsći, zo jedna so wo družinu aligatorow, za kotruž płaća krute postajenja při mjezach. Dokelž Němcaj žanežkuli dokumenty za zwěrjata njeměještaj, jeju zajachu. Krokodile dowjezechu do zwěrjenca. Zwotkal mužej zwěrjata měještaj a dokal chcyštaj njebu znate.
Borisa Johnsona jako croissant móža sej wobydlerjo Kijewa słodźeć dać. W kofejowni Zavartailo mějachu ideju, so britiskemu premierministrej za wojersku pomoc Wulkeje Britaniskeje k zakitowanju Ukrainy přećiwo Ruskej inwaziji dźakować. Z baiserom a kulku lodu garněrowany croissant „Boris Johnsonjuk“ ma swojoraznu frizuru britiskeho politikarja napodobnić a so derje předawa.
Mašinotwarcy: Špatna powěsć
Frankfurt n. M. (dpa/SN). Zwjazk mašinotwarcow Němskeje je žadanje parlamenta EU, awta z bencinowym abo dieselowym motorom wot lěta 2035 zakazać, kritizował. Wothłosowanje w parlamenće EU je špatna powěsć za sylnosć industrije EU“, w zdźělence zwjazka rěka. EU wzdawa so tak swojeje wodźaceje róle na technologiskim polu. Nimo toho nastanje wotwisnosć wot Ruskeje a Chiny, kotrež swět ze žadnymi surowiznami za twar baterijow zastaruja, zwjazk zdźěla.
Duda kritizuje Scholza
Waršawa (dpa/SN). Pólski prezident Andrzej Duda je zwjazkoweho kanclera Olafa Scholza (SPD) a francoskeho prezidenta Emmanuela Macrona kritizował, dokelž najebać wójnu Ruskeje přećiwo Ukrainje přeco hišće z ruskim prezidentom Wladimirom Putinom telefonujetaj. „Tute rozmołwy scyła ničo njewunjesu“, rjekny Duda němskim nowinarjam. „Je něchtó w Druhej swětowej wójnje na tute wašnje z Adolfom Hitlerom rěčał?“
Norwegska sćele hawbicy
Muž kładźe kwětki na chódnik na Tauentzienskej dróze w Berlinje. ...
Dulig: Železnisku čaru wyše zastopnjować
Drježdźany (dpa/SN). Elektrifikowanje železniskeje čary mjez Drježdźanami a Zhorjelcom je jedne z najwažnišich předewzaćow sakskeje wobchadneje politiki. Wobchadny minister Martin Dulig (SPD) je wo tym wčera z krajnymaj radomaj Berndom Langu ze Zhorjelca a Michaelom Harigom z Budyšina (wobaj CDU) wo tym w Drježdźanach rěčał. Na rozmołwje wobdźělištaj so tež wyšej měšćanostaj Zhorjelca a Budyšina Octavian Ursu (CDU) a Alexander Ahrens (SPD).
Wojacy USA bórze stajnje w Pólskej
Daty korony lěpje wuhódnoćić
Rada fachowcow poruća so na móžne poćeženje strowotnistwa hotować
Berlin (dpa/SN). W boju přećiwo koronapandemiji trjeba Němska z wida zwjazkoweje lěkarskeje komory nuznje lěpši datowy zakład. „Smy minjenej lěće nastupajo daty runjewon slepy lět dožiwili, kiž njebě žadyn dobry zakład racionalnych rozsudow“, rjekny prezident komory Klaus Reinhardt dźensa nowinarjam. Jenož hdyž wobsteji jasnosć wo woprawdźitym infekciskim połoženju, je móžno wućeženje łožow w chorownjach a na intensiwnych stacijach realistisce posudźować. Zwjazkowe knježerstwo dyrbjało tuž skónčnje radźe fachowcow wotpowědować a systematisce daty wo dynamice infekcije, wo ćežkosći chorosće a wo poćežowanju strowotniskeho systema zběrać a wuhódnoćić.
Podobnje kaž Reinhardt wupraji so tež šef předsydstwa towaršnosće chorownjow Němskeje Gerald Gaß. Wón politiku namołwješe, prašenje rozrisać „štó kóšty za nuznje trěbne inwesticije na digitalnym polu“ přewozmje.
To a tamne (09.06.22)
„Pomhajće! Smy nadpadnjeni“ – z tutym tekstom na displayju je bus po badiskim Endingenje po puću był. Wjacori šoferojo policiju wo tym informowachu. Po tym zo běchu zastojnicy bus zadźerželi, zwěsćichu, zo je šofer busa powěsć mylnje aktiwizował. Po informacijach policije ma najwjace busow za nuzowy pad knefl, kotryž ćichi alarm zawinuje.
Powostanki hoberskeho dinosawriera su slědźerjo na britiskej kupje Isle of Wight namakali. Je to jedyn z najwjetšich hdy w Europje namakanych rubježnych dinosawrierow scyła. Wón bě dlěši hač dźesać metrow. Namakane fosilije – kosće pónoje a rjapa – pochadźeja wot dwunohateho dinosawriera z hłowu krokodila. Namakanka podpěruje hypotezu, zo pochadźa „Spinosawrus“ ze zapadneje Europy. Z pomocu wědomostnych metodow chcedźa nětko starobu zwěrjeća zwěsćić.
„Łužica je wosrjedź Europy“
Łužiski cyrkwinski dźeń wot 24. do 26. junija w Zhorjelcu Serbow kruće zapřija. Serbski centrum namakaš direktnje na Delnim torhošću. Chór Łužyca z Choćebuza a Serbski superintendent Christoph Rummel z Hodźija zahajensku božu słužbu na Hornim torhošću sobu wuhotujetaj.
Zhorjelc (AK/SN). Tele aspekty stej Theresa Rinecker, generalna superintendentka w Zhorjelskej wulkowosadźe Ewangelskeje cyrkwje Berlin-Braniborska-šleska Hornja Łužica (EKBO), a Antje Pech, superintendentka w cyrkwinskim wobwodźe Lubij-Žitawa Ewangelsko-lutherskeje krajneje cyrkwje Sakskeje, wčera při prezentaciji programa podšmórnyłoj.
Awto do ludźi zrazyło
Berlin (dpa/SN). W zapadnym Berlinskim nutřkownym měsće je dźensa awto do skupiny ludźi zrazyło. Při tym je znajmjeńša jedna wosoba žiwjenje přisadźiła, 30 ludźi je so zraniło. K njezbožu dóńdźe dopołdnja na Kurfürstendammje njedaloko Cyrkwje wopominanja. Policija spočatnje njewědźeše, hač jednaše so wo njezbožo abo wo nadpad. Šofera awta su zajeli. Na samsny městnje bě 2016 ke krawnemu atentatej dóšło.
Wo ukrainskim žiće rěčałoj
Istanbul (dpa/SN). Ruski wonkowny minister Sergej Lawrow a toho turkowski kolega w zastojnstwje Mevlüt Çavuşoğlu staj so dźensa w turkowskej stolicy Ankara zetkałoj. Při tym dźěše mjez druhim wo transport ukrainskeho žita. Ruska w zwisku z wójnu ukrainske přistawy blokuje. Dokelž je Ukraina jedyn z najwjetšich dodawarjow žita, fachowcy mjeztym před globalnej krizu žiwidłow a wulkej hłodowej nuzu w mnohich dźělach swěta warnuja. Płaćizny žita raznje přiběraja.
Ruska ze swójskim manewrom
