Mnichow (dpa/SN). Jědnaće lět po wotkryću prawicarskoekstremneje teroroweje skupiny NSU zaběra so w bayerskim krajnym sejmje dalši přepytowanski wuběrk z rasistisce motiwowanymi mordarstwami skupiny. Wšitke frakcije su wčera zasadźenju gremija přihłosowali. Zaměr je, mjez druhim móžne styki NSU k bayerskej neonacistiskej scenje wuswětlić. Neonacistiska trójka NSU, Beate Zschäpe, Uwe Mundlos a Uwe Böhnhardt, bě lěta dołho mordujo po Němskej ćahnyła. Wopory běchu dźewjeć předewzaćelow turkowskeho a grjekskeho pochada kaž tež němska policistka. Mundlos a Böhnhardt staj zamołwitaj za bombowej atentataj z dźesatkami zranjenych. Wobaj běštaj sebje 2011 moriłoj, zo byštaj so zajeću wuwinyłoj. Sudnisce předźěłali su mordarstwa dlěje hač pjeć lět před Mnichowskim wyšim kranym sudnistwom. Zschäpe, jeničku přežiwjenu trójki, běchu w juliju 2018 jako sobuskućićelku k jastwu na čas žiwjenja zasudźili, byrnjež žane dopokazy njeměli, zo bě wona sama na městnach njeskutkow. We wjacorych zwjazkowych krajach su swójske přepytowanja přewjedli.

Mucha w kabinje šofera nakładneho awta je w Porynsko-Pfalcy zasadźenje policije zawinowała. Šofer bě spytał, muchu z kabiny wuhnać a bě tohodla na awtodróze 65 po seklojtej čarje jěł. Druzy šoferojo tukachu na pjaneho wodźerja a wołachu policiju. Při kontroli zastojnicy ani alkohol ani mučnotu njezwěsćichu. Policija radźi, w tajkim padźe radšo pozastać a zwěrjo z awta wuhnać.

Jeno na drjewjanym stólčku sedźo je šofer wosoboweho awta po puću był, jako jeho zastojnicy w sewjerorynsko-westfalskim Güterslohu kontrolowachu. Stólčk steješe na drjewjanej podłoze, zamk za wěstotny pas tež njeměješe. 33lětny njemóžeše zastojnikam rjec, hdźe je sedło šofera wostało. Nimo toho njeměješe jězbnu dowolnosć. Policisća jemu dalše jězdźenje zakazachu. Muž dyrbi nětko z chłostanskim jednanjom ličić.

Njebjelčicy (SN/JaW). Bjezradnosć, trochu přesłapjenja a zdźěla tola škrička spokojnosće nad rozmołwu, takle móhli wčerawši wječor w Njebjelčanskej „Bjesadźe“ zjimać. Něhdźe 60 wěriwych ze wšitkich serbskich katolskich wosadow – mjez nimi tež sydom serbskich duchownych – bě so tam z Drježdźansko-Mišnjanskim biskopom Heinrichom Timmereversom rozmołwjało. Ćežišćo běchu dalši puć a móžne změny w tak mjenowanym serbskim pastoralnym rumje a z tym tež w serbskich wosadach.

Štóž bě wočakował, zo dóstanje wěsty mjezystaw w lěće 2013 nastorčeneho tak mjenowaneho namakanskeho procesa, bu přesłapjeny. Drje móžachu zajimcy za dźesać blidami temy, starosće abo tež dobroty tajkich změnow wobrěčeć, we wulkim kruhu pak je skerje njetematizowachu. Biskop a sobudźěłaćerjo ordinariata tak žanych wotmołwow na palace prašenje, mjenujcy za konkretnymi změnami w serbskich wosadach wot lěta 2025 a za wotpowědnymi namjetami Timmereversa, přitomnym skićić njemóžachu.

Wojerecy (KD/SN). Demokratija je w digitalnym kaž w analognym rumje žiwa, hdyž ludźo so za nju zasadźuja. Tak rěka facit žurnalista a knižneho awtora Thomasa Ammanna, medijoweho pedagogi Jonasa Witschela a jeju wosom hosći po rozmołwje na temu „Kak nowe medije demokratiju přeměnjeja?“. Zarjadowanje wčera wječor we Wojerowskej Kulturnej fabrice bě wobstatk zhromadneho rjadu „Kontrowersnje na městnje“ Sakskeje krajneje centrale za politiske kubłanje, Sakskeho zwjazka ludowych uniwersitow a sociokulturnych centrumow.

Hišće před 30 lětami rozšěrjachu powěsće jenož přez ćišćane medije, telewiziju, kino a rozhłós, wužiwarjo běchu jeničce konsumenća, rjekny online wobdźěleny Thomas Ammann. Dźensa so přidatnje miliardy ludźi w socialnych syćach kaž Facebook wo najwšelakorišich temach zwuraznjeja a husto žane tamne měnjenje njeakceptuja. Tajke zadźerženje nastanje, hdyž so něchtóžkuli wo temje w interneće kaž w pucherje jenož jednostronsce informuje, wujasni organizator z Kufy Dirk Lienig.