Hdyž rěča w Němskej wo energijowej změnje a wo wotpinjenju wšěch jadrowych a brunicowych milinarnjow, słyšiš stajnje zaso argument, zo dyrbi Němska druhim krajam, takrjec wšemu swětej, z přikładom być a dopokazać, zo móžeš wulki industrijny kraj bjez atoma, brunicy a zemskeho płuna spušćomnje z energiju zastarać. Kak jara sej w Francoskej přikład Němskeje česća, je prezident Macron wčera pokazał. Francoska planuje, system wobstejacych jadrowych milinarjow masiwnje wutwarić, dokelž z tym liči, zo po­trjeba miliny w kraju přichodne lěta wo 60 procentow přiběra. Němska čini dale tak, jako by w druhim swěće žiwa była. Njedawno na přikład su zdźělili, zo njeje kraj swój zaměr docpěł, přetrjebu energije znižić, ale zo nawopak potrjeba energije w Němskej dale přiběra. Ja namjetuju: ­Pěstujmy němsko-francoske přećelstwo, dokelž budźemy francosku atomowu milinu jara bórze nuznje trjebać, hdyž smy tu wšitko wotpinyli. Marko Wjeńka

Smorčenje muža je minjenu nóc w Drježdźanach zasadźenje wohnjoweje wobory wuwabiło. Něchtó bě so w zasadźenskej centrali přez nuzowe čisło přizjewił a wo mužu rozprawjał, kiž je epileptikar a kiž je we wulkim straše. Z wosebitym gratom móžachu pomocnicy durje bydlenja wočinić a namakachu měrnje spjaceho muža, kiž njebě w žanym času w straše. Hary na schodźe dla tukachu wobydlerjo na padustwo a wołachu policiju. Njedorozumjenje bě spěšnje wujasnjene.

Nabóčne wobhrodźenje zwjazkoweje dróhi přerězałoj staj mužej w Hornjej Pfalcy a měještaj za to kuriozne wopodstatnjenje: Pječa bě jeju wětřik z dróhi stłóčił. Na to běštaj podłu B85 dale jěłoj a njemóžeštaj skónčnje wjace dale. Tuž staj pjeć metrow dołhi kónčk wobhrodźenja z mašinu přerězałoj. Wobeju wočakuje nětko chłostanje.

Přednoški wo tak mjenowanych reichs­bürgerach běchu w nachilacym so semestrje Sakskeje krajneje centrale za politiske kubłanje hromadźe z ludowej uniwersitu derje wopytane. Nětko přihotuja nowy rjad, kotryž ma wid na prěkimyslerjow a dalšich rozšěrić.

Drježdźany/Budyšin (SN/at). Něšto wjace hač 40 webinaristow je wuwjedźenja na temu „Izolowani w rajchu – hibanje reichsbürgerow w Sakskej“ Drježdźanskeho politologi Sebastiana Trepta předwčerawšim doma na swojej wobrazowce sćěhowało. Kaž hižo často do toho, běchu mjez nimi mnozy, kotřiž dźěłaja w komunalnych zarjadnistwach. Tute su najbóle wot direktnych počinanjow reichs­bürgerow potrjechene.

Minsk (dpa/SN). Najebać kritiku zapada je Běłoruska dźensa wojerski manewer z ruskimi jednotkami zahajiła. Zwučowanje na juhu bywšeje sowjetskeje republiki njedaloko mjezy k Ukrainje ma dźesać dnjow trać. Zwučować chcedźa „wotwobaranje wonkowneje agresije“, zakitowanskej ministerstwje wobeju krajow zdźělatej. Po informacijach Krjemla maja so ruscy wojacy po zakónčenju manewra zaso do swojich kasernow wróćić.

Wopory wopominała

Jerusalem (dpa/SN). Wonkowna ministerka Annalena Baerbock (Zeleni) je dźensa we wopomnišću holocausta Jad Vashem wot němskich nacionalsocialistow morjenych šěsć milionow Židow wopominała. Zdobom namołwješe wona do konsekwentneho boja přećiwo antisemitizmej. W hali wopominanja je Baerbock wěnc połožiła. Bě to zazběh jeje wopyta na Bliskim wuchodźe. W běhu dnja wočakowaštaj ju wonkowny minister Jair Lapid a ministerski prezident Naftali Bennett.

Wjace pomocy potrěbnym