Na přirodu so spušćeć?
To a tamne (26.01.22)
Žadyn dobry poměr k swojemu telefonej nimaja Francozojo. Na telefonaty w krutej syći 17 procentow ludźi zasadnje njereaguje a dalšich 26 proc. jenož, jeli wołaceho na telefonowym čisle spóznawaja, zdźěli statistiski zarjad w Parisu. Telefonat na handyju dwaj procentaj ludźi zasadnje ignorujetej, 30 procentow reaguje jenož pola znatych čisłow. 77 procentow žonow hnydom na telefon dźe, ale jeno 69 muži.
Pobrachowaca plaketa při čisłowej tafličce bě zahuba za Kölnjana, kiž bě na wšě 30 lět bjez jězbneje dowolnosće po puću. 63lětny zastojnikam wuzna, zo bě swoje „papjery“ hižo 1992 přisadźił a zo je wot toho časa „bjez njezboža“ po měsće jězdźił. Policistam bě pobrachowaca plaketa napadnyła. Dokelž njemóžeše šofer při kontroli jězbnu dowolnosć pokazać, čaka nětko chłostanje na njeho.
Slědźa za motiwom třělca
Heidelberg (dpa/SN). Po wčerawšim amoku na Heidelbergskej uniwersiće z dwěmaj mortwymaj a třomi zranjenymi slědźi policija za motiwom skućićela a za pochadom jeho dweju brónjow. Młody muž bě wčera w awli na studowacych třělał, při čimž 23lětnu studentku smjertnje zrani. Po tym je so muž sam zatřělił. Budyski wyši měšćanosta Alexander Ahrens je hišće wčera wječor wyšemu měšćanosće partnerskeho města dr. Eckartej Würznerej telefonisce swoje sobužarowanje wuprajił, kaž město zdźěli.
Sakska z nowym wukazom
Drježdźany (dpa/SN). Sakske krajne knježerstwo chcyše dźensa w běhu dnja mězniki noweho nuzoweho wukaza w boju přećiwo koronawirusej předstajić. Kaž bu hižo do toho znate, planuja dalše wolóženja, kotrež pak su na wućeženje chorownjow wjazane. Tak hodźa so wjetše zarjadowanja kaž wiki zaso wotměć. Sakski minister za hospodarstwo Martin Dulig (SPD) chce z pomocnym programom „Sakska plus“ małe předewzaća a samostatnych w pandemiji podpěrać.
Žurnalisća nadpadnjeni
Njewšědnje wjele sněha je so w grjekskej stolicy Athenje a po ...
Ruska warnuje před eskalaciju
Moskwa (dpa/SN). Ruska wumjetuje USA a NATO w zwisku z konfliktom na Ukrainje strašny kurs eskalacije. Wuchadźišćo napjatosćow njeje Ruska, ale stej to „informaciska kampanja a hysterija“ w USA, rjekny rěčnik Krjemla Dmitrij Pjeskow hladajo na dodawanje bróni zapada Ukrainje a na cofnjenje sobudźěłaćerjow zapadnych wulkopósłanstwow z Kijewa. Kampanja je přewodźana wot wulkeje ličby „prostych łžow“. Přepołoženje jednotkow NATO na wuchod k tomu wjedźe, „zo napjatosće přiběraja“.
Krjeml warnuje před přiběracym strachom nadpada ukrainskeje strony na wot proruskich separatistow kontrolowane kónčiny na wuchodźe Ukrainy. Kijew tuchwilu po słowach Pjeskowa sylne mocy a techniku podłu mjezy mjenowanych kónčin koncentruje. Strach nadpada ze stron Ukrainy je mjeztym „jara wulki“. Dodawanje ameriskich bróni „zachadźakow“ w Kijewje přidatnje pohonja sej wotpadnjene kónčiny namócnje wróćo zdobyć. NATO měła Kijewej wot namocy chutnje wotradźić.
Dalše mocy NATO na wuchod
Zapadna wojerska alianca přeměstnja wojakow – EU chce Ukrainje pomhać
Brüssel (dpa/SN). Hladajo na napjatosće z Ruskej chce komisija Europskeje unije Ukrainje krótkodobnje dalšu miliardu eurow pjenježneje pomocy přewostajić. „Kaž přeco je EU Ukrainje w tajkim ćežkim połoženju poboku“, rjekny prezidentka komisije EU Ursula von der Leyen wčera w Brüsselu. Němska politikarka namjetowaše mjez druhim nuzowy pomocny kredit 1,2 miliardow eurow. Wona so nadźija, zo rada čłonskich krajow EU a Europski parlament tomu ručež móžno přihłosujetej.
Von der Leyen zdobom připowědźi, zo chcyła komisija EU prawje bórze plan dołhodobneje pomocy za modernizaciju Ukrainy zdźěłać. Nimo toho chcył Brüsselski zarjad přiražki na dobro Ukrainy wo 120 milionow eurow rozšěrić a tak nimale podwojić. Cyłkownje su EU a jeje financne zarjady krajej wot lěta 2014 wjace hač 17 miliardow eurow kreditow a přiražkow přewostajili. Kaž von der Leyen potwjerdźi, je Ukraina swobodny a suwereny kraj, kiž móže sam wo swojich naležnosćach rozsudźić.
To a tamne (25.01.22)
Z hašišowej cigaretu w hubje sam z mobilnym telefonom fotografował je so muž na dwórnišću w hornjobayerskim Moosburgu, byrnjež zwjazkowy policist pódla njeho stał. Tón čakaše na ćah k Mnichowskemu dwórnišću, hdźež měješe słužbu. Zastojnik je personalije 38lětneho registrował. Na to jědźeštaj wobaj z ćahom. Hižo po jednej staciji 38lětny spěšnje wulěze, při čimž je za policista dalši joint a nóž ležo wostajił.
Z wotpadkami dospołnje zanjerodźene awto je policija w Essenje zadźeržała. Jězdźidło bě zastojnikam napadnyło, dokelž sedźeše šofer jara blisko za wodźidłom. Na to so wukopa, zo je wóz połny njerjada, tež tam, hdźež dyrbi šofer z nohomaj borzdźić a kuplować. To móhło w nuzowym padźe strašne być. Šofer ma wěsty čas chwile njerjad zrumować a swoje awto znowa předstajić.
Modlenje wo jednotu křesćanow
Vatikan (B/SN). Bamž Franciskus je njedźelu tydźenja při tradicionalnym modlenju wo jednotu křesćanow na Pětrowym naměsće znowa wuzběhnył: „Tež my křesćenjo w mnohotnosći konfesijow a tradicijow smy putnicy po puću k połnej jednoće.“ Jednota so poradźi, hdyž so sylnišo na Jězusa wusměrimy, jeničkeho Knjeza. Skedźbni na lubosć Božu, kotraž so často schowana pokazuje, kaž dźiw z winom w měsće Kana. Tydźeń modlenja wo jednotu křesćanow wotměwa so ekumenisce po cyłym swěće, w sewjernej hemisferje wot 18. do 25. januara a w južnej mjez swjatkami a Božim spěćom. 25. januara, na swjedźenju nakazanja japoštoła Pawoła, swjeći bamž w Romskej bazilice swj. Pawoła ekumenisku nutrnosć.
Mać Boža w tučeli
Diplomaća EU dale w Kijewje
Brüssel (dpa/SN). Europska unija njewidźi – hinak hač USA – tuchwilu žanu přičinu, wulkopósłancow a swójby diplomatow namołwjeć, zo měli Ukrainu wopušćić. „Njetrjebamy ničo dramatizować“, rjekny społnomócnjeny EU za wonkowne naležnosće Josep Borrell dźensa na wuradźowanju wonkownych ministrow EU w Brüsselu. USA běchu do posedźenja připowědźili, zo chcedźa napjatosćow mjez Ukrainu a Ruskej dla ličbu diplomatow w stolicy Kijewje pomjeńšić.
Wuradźuja zaso wo koronje
Berlin (dpa/SN). W času raznje přiběracych ličbow infekcijow z koronawirusom chcychu zastupnicy Zwjazka a zwjazkowych krajow dźensa wo dalšim postupowanju w pandemiji wuradźować. Hižo do zahajenja konferency so wotbłyšćowaše, zo dotalny kurs dale pěstuja: žane přiwótřenja dotalnych naprawow, ale tež žane wolóženja. Změny wočakowachu skerje při testowanju. Tak nochcedźa přichodnje wjace při kóždym podhladnym padźe PCR-test přewjesć, ale jenož hišće mjez wosebje wohroženymi skupinami.
Přećiwo dodawanju bróni
