Ruska na list z USA wotmołwiła
Washington (dpa/SN). Ruska je pisomnje na wotmołwy Washingtona ruske wěstotne žadanja nastupajo wotmołwiła. Wonkowne ministerstwo USA je wobkrućiło, zo je pismo z Moskwy dóšło. Wo wobsahu pak ničo njezdźělichu. Mjeztym so dale prócuja, konflikt Ukrainy dla diplomatisce rozrisać. Ruski wonkowny minister Sergej Lawrow a jeho kolega z USA Antony Blinken chcyštaj w běhu dnja telefonować a mjez druhim wo lisće z Moskwy rěčeć. Runočasnje chcyše so britiski premierminister Boris Johnson z ukrainskim prezidentom Wolodymyrom Zelenskim w Kijewje zetkać.
Wonkowne ministerstwo USA potwjerdźi, zo čuje so dialogej dale zawjazane a zo chcyło so ze swojimi zwjazkarjemi a Ukrainu wothłosować. USA běchu Ruskej minjeny tydźeń na jeje žadanje wěstotu w Europje nastupajo wotmołwili.
Wo tójšto mjenje migrantow
Połoženje w Eisenhüttenstadtskim centrumje mjeztym zaso normalne
Berlin/Eisenhüttenstadt (dpa/SN). Ličba ćěkancow, kotřiž na njedowolene wašnje z Běłoruskeje a Pólskeje přez mjezu do Braniborskeje přichadźeja, je tež w januaru dale woteběrała. Po informacijach zwjazkoweje policije su prěni měsac noweho lěta 155 wosobow zadźerželi. Loni w oktobru bě ličba z 2 791 migrantami nowy rekordny staw docpěła. Registraciski centrum w Frankfurće nad Wódru je po informacijach rěčnika zwjazkoweje policije we wotpočnym modusu. Móža pak jón spěšnje zaso aktiwizować, dyrbjała-li ličba migrantow zaso widźomnje přiběrać.
Frankfurtski registraciski centrum běchu zarjadowali, po tym zo bě jich ličba na němsko-pólskej mjezy loni drastisce rozrostła. Zo bychu centralnemu zarjadej za prěnju registraciju ćěkancow w Eisenhüttenstadće dźěło wolóžili, je Frankfurtski centrum migrantow po wěstym klučowym systemje na druhe zwjazkowe kraje rozdźělił.
To a tamne (01.02.22)
Jědojty pawk – tak wulki kaž čłowječa ruka – je w kupnicy žiwidłow w Krefeldźe zasadźenje wohnjoweje wobory zawinił. Sobudźěłaćerjo discountera běchu čłonkonohača w kisće bananow z Dominikanskeje republiki wuhladali a přikładnje reagowali. Woni tyknychu kistu scomt bananami a pawkom do plastoweje tity, po tym zo běchu jeho fotografowali. Fachowcy móžachu jeho tuž spěšnje identifikować. Tale družina z Južneje Ameriki je drje jědojta, njeje pak smjertna.
Na wšě 70 lět bjez jězbneje dowolnosće a zawěsćenja po puću był je muž w Jendźelskej. Lěta 1938 rodźeny muž bě so njedaloko Nottinghama do kontrole dóstał, njeměješe pak ani papjery ani zawěsćenje za swój Mini One. Zastojnikam wón rozłoži, zo wot 12. žiwjenskeho lěta bjez njezboža awto wodźi. Jězbnu dowolnosć njeje nihdy wobsedźał.
Politika ma sobu dźěłać
Düsseldorf/Frankfurt (B/SN). Po předstajenju posudka prawizniskeje kenclije Westpfahl Spilker Wastl (WSW) k wobchadej ze seksualnym znjewužiwanjom w biskopstwje Mnichow a Freising kopja so žadanja, wobdźěłanje seksualizowaneje namocy njepřewostajić cyrkwjam samym. Politika měła wjace zamołwitosće přewzać. Předsydka Centralneho komiteja němskich katolikow Irme Stetter-Karp namjetowaše komisiju sprawnosće w zwjazkowym sejmje wutworić. Nutřkopolitiska rěčnica Lamya Kaddor zwjazkoweje frakcije w sejmje so tohorunja za tajki gremij wupraja.
Wažne sej dowěru wróćo zdobyć
Lang a Noutipur wuzwolenaj
Berlin (dpa/SN). Zeleni su po zahajenju sobudźěła w amplowym zwjazkowym knježerstwje noweju předsydow wuzwolili. Na internetnym zjězdźe su delegaća socialnu politikarku Ricardu Lang a wonkowneho politikarja Omnida Nouripoura za předsydow postajili. Digitalny wotum dyrbja nětko hišće z listowymi wólbami wobkrućić. Dotalnaj předsydaj Annalena Baerbock a Robert Habeck staj ministraj w nowym knježerstwje.
Meuthen šwika „zacpěwanje“
Berlin (dpa/SN). Z AfD wustupjeny bywši předsyda strony Jörg Meuthen je politiski kurs swojeje něhdyšeje strony znowa kritizował a jej zacpěwanje hinak myslacych wumjetował. Wosebje zludace za njeho je, zo dyrbješe „mjez mnohimi čłonami strony hłuboko sahace a tež werbalnje zwuraznjene zacpěwanja hinak myslacych, ale tež zakótwjenych mechanizmow parlamentariskeje demokratije dožiwić“, Meuthen piše. Dźěle strony su so „za dźeń a bóle radikalniši kurs rozsudźili“.
Čakaja na wuslědk wólbow
Po nimale pjeć lět trajacych twarskich dźěłach su sławny ...
Benedikt namołwjeny
Policistaj zatřělenaj
Ukraina zaběra nětko UNO
Wolóženja hižo přihotować
Politikarjo rozmysluja wo zběhnjenju wobmjezowanjow korony dla
Berlin (dpa/SN). Najebać dale přiběrace ličby infekcijow z koronawirusom su hłosy w politice dźeń a sylniše, kotrež žadaja sej koncept k zběhnjenju wobmjezowanjow. Zwjazkowy minister za financy Christian Lindner (FDP) rjekny nowinarjam: „Nimamy žołmu omikrona drje hišće za sobu, dyrbimy pak hižo nětko na tym dźěłać, hdy a pod kotrymi wuměnjenjemi móžemy krok po kroku wolóženja zwoprawdźić.“ Mjeztym so pokazuje, zo je zwjazkowe knježerstwo swój zaměr šćěpjenja jasnje misnyło.
Kaž z ličbow Roberta Kochoweho instituta wuchadźa, je hač do kónc tydźenja 75,7 procentow ludźi w Němskej znajmjeńša jónu přećiwo koronawirusej šćěpjenych. Zaměr zwjazkoweho knježerstwa bě, hač do kónca januara 80 procentow ludźi znajmjeńša jónu šćěpić.
Lindner rjekny, zo trjebaja ludźo skutkowny škit přećiwo wirusej. „Natykliwa warianta omikron je wulke wužadanje. Za nas liberalnych pak płaći, zo měli wobmjezowanja swobody jenož tak dołho zastupujomne być, dołhož sej połoženje to žada.“
