Wjace falšowanjow
Wuradźuja wo žadanjach Ruskeje
Brüssel (dpa/SN). Wonkowni ministrojo 30 čłonskich statow NATO su dźensa popołdnju na widejowej konferency wo ruskich žadanjach za wěstotnymi garantijemi wuradźowali. Nimo toho chcychu wo najnowšej koncentraciji ruskich wojerskich jednotkow njedaloko ukrainskeje mjezy rěčeć. Po měnjenju tajnych słužbow steji to w zwisku ze žadanjemi za wěstotnymi garantijemi a ma NATO k přilubjenjam nuzować.
Konkretnje chce Ruska docpěć, zo so NATO zawjaza, so wšitkich wojerskich aktiwitow na teritoriju Ukrainy a druhich wuchodoeuropskich statow, na juhu Kawkaza a w centralnej Aziskej wzdać. Nimo toho měł zapadny wojerski zwjazk jasnje rjec, zo so na wuchod dale njerozšěri a zo Ukrainu do NATO njepřiwozmje. Wot USA sej Ruska žada, zo cofnje wšitke atomowe brónje z krajow zwonka swojeho teritorija, tež z Němskeje. Přichodny tydźeń chcedźa so zastupnicy Ruskeje w Genfje schadźować.
Płun wo 54 procentow dróši
Wobydlerjo Pólskeje bědźa so z wysokimi płaćiznami energije a inflaciju
Waršawa. Pólska zhladuje ze starosćemi na lěto 2022. W tym zwisku su wobydlerjo přiběrajcy hněwni na Waršawske knježerstwo, kotrež bě loni wulku dawkowu reformu „Pólski porjad“ připowědźiło. Z njej měješe so žiwjenski standard ludźi zasadnje polěpšić. Knježerstwo chcyše mzdy zwyšić a dawki znižić. Woprawdźitosć mjeztym cyle hinaša wupada. Spočatk lěta mějachu Polacy informaciju w listowym kašćiku, zo maja nětko wot januara za milinu 24 procentow wjace a za płun 54 procentow wjace płaćić. W susodnym kraju tradicionalnje wjele z płunom warja a tepja. Tež žiwidła su dźeń a dróše. Inflacija wučinja tam mjeztym nimale wosom procentow.
Čerwjena smuha Putina
Wuwzaćny staw zaso zběhnyć!
Vilnius (dpa/SN). W krizy wokoło ćěkancow na wonkownej mjezy Europskeje unije k Běłoruskej je so litawski prezident Gitanas Nausėda za to wuprajił, wuwzaćny staw w pomjeznej kónčinje zaso zběhnyć. Statny šef baltiskeho čłonskeho kraja EU rjekny w litawskim rozhłosu, zo je „problem migrantow tuchwilu rozrisany“. Tohodla dyrbjeli wo tym rozmyslować, zo wurjadne rjadowanje zběhnu.
Połoženje na mjezy k Běłoruskej nastupajo bě Litawska 10. nowembra wuwzaćny staw wukazała. Wón płaći hišće hač do 14. januara podłu mjezy a pjeć kilometrow hłuboko do kraja. Hižo měsacy dołho spytaja ćěkancy, so z Běłoruskeje do Pólskeje a baltiskich statow předrěć. Europska unija wumjetuje běłoruskemu mócnarjej Aleksanderej Lukašenkej, zo jich zaměrnje k mjezy sćele, zo by so za sankcije EU wjećił.
Litawscy namjezni škitarjo su dotal wjace hač 8 100 migrantow na mjezy wotpokazali. Wot spočatka noweho lěta pak tendenca jasnje woteběra. Po informacijach namjezneho škita njetrjebachu tónle tydźeń ani jeničkeho ćěkanca na mjezy wjace wotpokazać.
To a tamne (07.01.22)
Pře wšu měru sprócny bě paduch w Hannoveru. 25lětny je sej za čas njeskutka w cuzym łožu wusnył. Nimo toho bě chětro natutkany a steješe pod wliwom drogow. Wobydlerjo njeběchu w tym času doma. Susod pak bě zadobywarja widźał a policiju alarmował. Přiwołani sanitetarjo muža wubudźichu, njemóžachu pak žane strowotniske škody zwěsćić.
Wobchodowy detektiw móžeše tomu zadźěwać, zo je Berlinjan wjetše mnóstwo šokolody we wobchodźe w Neustreelitzu spakosćił. Wón wobkedźbowaše, kak muž 70 taflow šokolody do nachribjetnika styka a so zminy, bjez toho zo by płaćił. Detektiw jeho zadźerža. Rozhladujo so wuhladachu přiwołani policisća dweju čakaceju muži w awće, w kotrymž ležachu sta taflow šokolody w hódnoće 1 100 eurow. Zwotkel je mějachu, njemóžachu paduši policiji wězo rjec.
Mortwi při protestach
Almaty (dpa/SN). Při nowych zražkach mjez demonstrantami a policiju w Kazachstanje su wjacorych protestowacych morili. Woni běchu spytali zarjadniske twarjenja a policajske straže w metropoli Almatach wobsadźić. Prezident Kasym-Žomart Tokajew je hladajo na trajace njeměry wo pomoc ze stron wot Ruskeje nawjedowaneho wojerskeho zwjazka prosył. Ruska je mjeztym parašutistow do Kazachstana přepołožiła. Nastork protestow běchu drastisce zwyšene płaćizny płuna.
Demonstrantow zadźerželi
Mnichow (dpa/SN). W nutřkownym měsće Mnichowa je wčera wječor něhdźe 3 000 ludźi přećiwo statnym naprawam koronu nastupajo protestowało. Policija je wjacore dróhi zawrěła a demonstrantow zadźeržała. Z městnami ludźo spytachu rjećazy policije přełamać. Zastojnicy zasadźichu gumijowe retle. Policija bě z něhdźe tysac zastojnikami na městnje. Tež w druhich městach Bayerskeje běchu t. mj. „wuchodźowanja“.
Baerbock: Demokratiju škitać
Wukubłanski płachtak němskeje mariny „Gorch Fock“ kótwi ...
Wobmjezowanja demonstracijow wostanu
Drježdźany (dpa/SN). Sakski krajny sejm je wčera wotpokazał, wšitke wobmjezowanja za zhromadźizny w tuchwilnej koronapandemiji zběhnyć. AfD wosta z wotpowědnym žadanjom izolowana. Jeje frakciski šef Jörg Urban knježerstwu wumjetowaše, zo z tuchwilnym wobmjezowanjom ličby wobdźělnikow zjawny protest kriminalizuje. Po aktualnym nuzowym wukazu smě so najwjace dźesać wosobow k demonstracijam zhromadźić.
Nutřkowny minister Roland Wöller (CDU) zwurazni swoje starosće hladajo na trajace protesty přećiwo wobmjezowanjam koronawirusa dla. Wón kritizowaše, zo prawicarscy ekstremisća a prějerjo wirusa měrniwe protesty znjewužiwaja. Přećiwo naprawam protestować je to jedne, wón rjekny. Protesty za to wužiwać, stat a demokratiju wotstronić, něšto hinaše. Roland Wöller stronu AfD nadběhowaše a jej wumjetowaše, zo hraje tuchwilu „chudušku rólu“. Spočatnje bě strona koronawirus jako gripu złahodniła, nětko wona naprawy přećiwo njej wotpokazuje, minister kritizowaše.
Namjetuja změny pola karanteny
Berlin (dpa/SN). Zwjazkowy minister za strowotnistwo Karl Lauterbach (SPD) je móžne změny nastupajo prawidła karanteny konkretizował. Wotpowědny koncept, kotryž bě ministerstwo z Roberta Kochowym institutom zdźěłało, Lauterbach wčera předstaji. Za powšitkowne wobydlerstwo ma přichodnje pječa płaćić, zo móža karantenu po kontakće z natyknjenymi hižo po sydom dnjach skónčić. Wuměnjenje pak je negatiwny PCR- test abo hinaši „wysokohódnotny“ antigenowy spěšnotest. Po dźesać dnjach měli izolaciju tež bjez testa skónčić. Za přistajenych tak mjenowaneje kritiskeje infrastruktury kaž w chorownjach a hladarnjach móža potrjecheni karantenu z negatiwnym testom po pjeć dnjach skónčić.
Dźěći, kotrež su w šulach a hortach jako kontaktne wosoby zastopnjowali, móža so po pjeć dnjach „swobodne testować“. W šulach poručeja dale škitne nahubniki wužiwać.
Dotalne rozeznawanje mjez hižo dominowacymi wariantami koronawirusa a nowymi wariantami ma wotpadnyć.
