Zaso demonstracije korony dla
To a tamne (15.12.21)
310 kilogramow ćežki módry safir su na Sri Lance našli. Drohotny kamjeń ma 1,5 milionow karatow, kaž zarjad za drohokamjenje a debjenki zdźěli. Zarjad bě safir přepytował a certifikował. Wobsedźer chce jón muzejej předać, zo by tajki wostał, kaž je. Muž bě safir na priwatnej ležownosći w Ratnapura, sto kilometrow wuchodnje stolicy Colombo namakał a jón „Queen of Asia“ mjenował.
Z čerwjenej barbu su aktiwisća na dobro klimy wčera spytali, žadanja zwjazkowemu kanclerej Olafej Scholzej (SPD) na kanclerski zarjad w Berlinje napisać. Policija pak zakroči a hesło hnydom zaso wotstroni, kaž bě na internetnym portalu Instagram widźeć. Skupina „Zběžk poslednjeje generacije“ bě so po tydźenje trajacym hłodowym stawku do wólbow zwjazkoweho sejma załožiła a žada sej zakoń přećiwo znjewužiwanju žiwidłow.
Baerbock Ruskej hrozy
Brüssel (dpa/SN). Wonkowna ministerka Annalena Baerbock je Ruskej w padźe wojerskeho zasaha na Ukrainje znowa z raznymi konsekwencami hrozyła. Europska unija ma jasne zhromadne stejišćo w padźe dalšeho agresiwneho zadźerženja Ruskeje, rjekny politikarka Zelenych wčera po wuradźowanju wonkownych ministrow EU w Brüsselu. Ruska je po dopóznaćach NATO sylne wojerske jednotki njedaloko Ukrainy koncentrowała. Moskwa wumjetowanja móžneje agresije dla wotpokazuje.
Chcedźa zakoń změnić
London (dpa/SN). Po brexiće chce so Wulka Britaniska tež juristisce sylnišo wot EU wotmjezować a wjele diskutowany zakoń wo čłowjeskich prawach změnić. Zaměr je ilegalnje zapućowanych ludźi jednorišo wotsunyć móc. Kritikarjo knježerstwu premierministra Borisa Johnsona wumjetuja, zo ma wotpohlad njewotwisny prawniski system wotstronić. Justicne ministerstwo chcyło wukrajnych kriminelnych wotsunyć, kotřiž so na čłowjeske prawa powołuja.
Mortweho na morju našli
Po zahubnych tornadach w zwjazkowym staće USA Kentucky je ličba ...
Woidke złoži zastojnstwo koordinatora
Podstupim (RD/SN). Braniborski ministerski prezident Dietmar Woidke (SPD) je swoje zastojnstwo jako „koordinator za němsko-pólske mjezytowaršnostne a pomjezne zhromadne dźěło“ njewočakowano złožił, kaž bu hakle wčera wječor znate. Woidke bě nowu wonkownu ministerku Annalenu Baerbock (Zeleni) hižo minjenu srjedu – na dnju jeje powołanja – pisomnje wo tym informował, zo zastojnstwo społnomócnjeneho zwjazkoweho knježerstwa za poćahi k Pólskej spušći. W swojej zdźělence wón potwjerdźi, zo je zastojnstwo stajnje z wulkim wjeselom wukonjał. Nětko pak ma wonkowne ministerstwo nowu šefowku, kotraž Zelenym přisłuša. Je tradicionalnje tak, zo ministerki a ministrojo koordinatora pomjenuja, štož je stajnje ze stronu zwjazane.“ Tohodla wón zastojnstwo k dispoziciji staji. Jeho bě tehdyši wonkowny minister Frank-Walter Steinmeier (SPD) w lěće 2014 powołał. Tuž přiznawa, zo je nětko „dobry wokomik za nowe impulsy“.
Awstriska za Nord Stream 2
Berlin (dpa/SN). Awstriski zwjazkowy kancler Karl Nehammer so za to wupraja wjele diskutowany płunowód Nord Stream 2 aktiwizować. „Wočakuju, zo započnje Nord Stream 2 po planje bórze płun dodawać“, rjekny Nehammer nowinje Welt. Dołhož kraje EU tež płun a wolij trjebaja, je wažne energetiske zastaranje z wjacorych žórłow zaručić a wotpowědne rołowody k dispoziciji měć. „To płaći wězo tež za Awstrisku. Nord Stream 2 je wažny projekt, kotryž dawa Europskej uniji wěstotu zastaranja w prašenju energije“, Nehammer wuzběhny. Zdobom wón žadanja USA wotpokaza, płunowód jako srědk ćišća přećiwo Moskwje w konflikće na Ukrainje wužiwać. „To by sej Europska unija jeno sama škodźała.“
Němska wonkowna ministerka Annalena Baerbock porno tomu na tym wobstawa płunowód dale blokować. Kaž wona w telewiziji ZDF zwurazni, je w nowym koaliciskim zrěčenju zakótwjene, zo maja energijowe projekty europskemu energetiskemu prawu wotpowědować. To w padźe płunowoda pječa date njeje.
Zakituje nowe naprawy
Braniborski krajny sejm epidemiske rozpřestrěće koronawirusa zwěsćił
Podstupim (dpa/SN). Braniborski krajny sejm je hladajo na přiběrace wućeženje chorownjow puć za hišće razniše naprawy přećiwo rozšěrjenju koronawirusa runał. Parlament je wčera z wjetšinu hłosow konkretny strach epidemiskeho rozšěrjenja wirusa zwěsćił, zo móhło krajne knježerstwo krućiše naprawy wukazać. To je w zwjazkowych krajach na zakładźe změnjeneho zakonja wo škiće před infekcijemi Zwjazka móžno. AfD hłosowaše přećiwo namjetej SPD, CDU a Zelenych. Lěwica bě za namjet, Swobodni wolerjo so hłosa wzdachu. Koalicija SPD, CDU a Zelenych planuje, kluby a diskoteki zawrěć a wulkozarjadowanja po ličbje wobdźělnikow wobmjezować.
Bjez wole njeńdźe
Dźěći poboku prawicarjow
Erfurt (dpa/SN). Předsydka durinskeho dźěłarnistwa policije (GdP) Mandy Koch je zludana na postupowanje přećiwnikow politiki koronapandemije dla, kaž njedawno w Greizu, reagowała. Je njeznjesliwe, zo su tam zdźěla tež dźěći pódla a zo je cyle wědomje instrumentalizuja, rjekny Koch powěsćerni dpa. „Ja njebych ze swojim dźěsćom nihdy do tajkeje situacije šła.“ Na demonstraciji přećiwo naprawam korony dla we wuchododurinskim Greizu su minjeny kónc tydźenja 14 zastojnikow policije zranili, kotraž tam z městnami sylzopłun zasadźi. Mandy Koch bě jako dźěłarnica na městnje, zo móhła sej sama wobraz wo zasadźenju tworić. Wona widźeše, kak demonstranća bleše na zastojnikow mjetachu a praskotaki wužiwachu. Dwaj policistaj njeběštaj po zasadźenju wjace kmanaj słužbu wukonjeć, zranjenu zastojnicu dyrbjachu w chorowni zastarać.
„Kolegojo su tam wulkim napjatosćam wustajeni“, rjekny Koch. Na demonstracijach wobdźěleja so swójby z dźěćimi poboku prawicarskich ekstremistow. Policisća dyrbja wotwažować, dokelž njemóža přećiwo dźěćom płun zasadźić.
Wabja za „boosterowanje“
Berlin (dpa/SN). W tuchwilnej koronakrizy su strowotniscy ministrojo Zwjazka a zwjazkowych krajow dźensa wo cyłozwjazkowych wolóženjach za třeći króć šćěpjenych wuradźowali. Zwjazkowy minister za strowotnistwo Karl Lauterbach (SPD) bě so za to wuprajił, zo móhł při płaćiwych prawidłach 2Gplus we wobchodach přidatnje předpisany test za tych wotpadnyć, kotřiž su hižo „boosterowani“. Někotre zwjazkowe kraje hižo tak postupuja. Tež strowotniska fachowča FDP Christine Aschenberg-Dugnus ma tajke wolóženja za móžne. „Wězo nima nichtó z třećej sykawu žadyn stoprocentowski škit. Ale samo, jeli so natyknje, njetrjeba so ćežkeje chorosće bojeć“, wona rjekny. Rada fachowcow zwjazkoweho knježerstwa je so dźensa tohorunja prěni króć schadźowała. Gremijej přisłušeja tež wirologojo a zastupnicy intensiwnych medicinarjow Roberta Kochoweho instituta.
Wčera wječor běchu zaso tysacy ludźi po cyłej Němskej přećiwo naprawam knježerstwa w boju přećiwo koronawirusej protestowali. Při tym dóńdźe k masiwnym zasadźenjam policije.
