Rozdźělne reakcije na nowe wobzamknjenja
Berlin (dpa/SN). Najnowše wobzamknjenja Zwjazka a zwjazkowych krajow, kak koronapandemiju přewinyć, zbudźeja rozdźělne reakcije.
Prezident zwjazka intensiwnych lěkarjow Gernot Marx žada sej hišće razniše wobmjezowanje kontaktow za nješćěpjenych. Prezident zwjazkoweje lěkarskeje komory Klaus Reinhardt ma wobzamknjenje konferency ministerskich prezidentow za njedosahace. Nimo toho města a gmejny na tym dwěluja, zo je wot politiki podaty zaměr, hač k hodam 30 milionow ludźi šćěpić, realistiski.
Zwjazk a kraje rozjimachu wčera nowe naprawy, z kotrymiž chcedźa rozšěrjenje koronawirusa wobmjezować. K tomu słušeja předewšěm wobmjezowanja kontaktow za nješćěpjenych. Jim chcedźa runje w dohodownym času přistup do najwjace wobchodow znjemóžnić. Předań praskotakow a silwesterski wohnjostroj stej zakazanej.
Lawrow chcył USA zapřijeć
Stockholm (dpa/SN). Ruska je w konflikće z Ukrainu wotewrjena za rozmołwy z wobdźělenjom USA. „Smy na tym zajimowani wšitke napinanja k rozrisanju konflikta zwjazać“, rjekny wonkowny minister Ruskeje Sergej Lawrow wčera k zahajenju rozmołwow ze swojim kolegu w USA Antonyjom Blinkenom. „Naši ameriscy kolegojo su wospjet rjekli, zo chcedźa pomhać.“ Ruska je k tomu zwólniwa, byrnjež dotal stajnje wuzběhowała, zo dotalny format dosaha.
W tak mjenowanym Normandiejowym formaće dotal jenož Francoska a Němska w konflikće mjez Ruskej a Ukrainu posrědkuja. Při tym pak nima so Ruska sama za konfliktnu stronu. „Ruska nima zajim na konfliktach“, rjekny Lawrow na kromje zetkanja wonkownych ministrow Organizacije za wěstotu a zhromadne dźěło w Europje w Stockholmje. Wón potwjerdźi žadanje ruskeho prezidenta Wladimira Putina, zo njesměła so NATO dale na wuchod rozpřestrěwać.
Přećiwo naprawam demonstrowali
Mokry kónc tydźenja
K wosobje:
Dr. Arndt Freytag von Loringhoven, wot 2020 wulkopósłanc Němskeje w Pólskej
To a tamne (03.12.21)
Najebać kur w bydlenju je muž w sewjerorynsko-westfalskim měsće Soest před swojej hrajnej konsolu sedźo wostał. Ani wohnjowi wobornicy w bydlenju jeho njepohnuchu so kompjutera wzdać. Pěšcy běchu wohnjowu woboru wołali, dokelž z kuchinskim woknom kur stupaše. Tam so jědź w horncu smudźeše. Muž před konsolu njebě ani alarmowu připrawu ani kur ani wobornikow registrował. Woni pak su jeho z bydlenja přewodźeli.
Hamtski kołk za koronatest su njeznaći z testowanskeho centruma we Wernigerodźe pokradnyli. Kaž tamniša policija informuje, rozrězachu skućićeljo w nocy na štwórtk stanowu płachtu na zadnim boku prowizoriskeho centruma a so tak do njeho zadobychu. Po tuchwilnym stawje spakosćichu woni kołk, kotryž hamtski test na koronawirus wobswědča. Policija nětko swědkow pyta.
Giffey ma program
Berlin (dpa/SN). Ze stodnjowskim programom chce přichodna Berlinska knježaca měšćanostka Franziska Giffey (SPD) po zahajenju swojeho zastojnstwa wažne předewzaća senata nastorčić. Plan ma mjez druhim etat města, naprawy k wožiwjenju wot koronakrizy potrjecheneho hospodarstwa a iniciatiwu za zapłaćomne podruže w stolicy wopřijeć, rjekny politikarka SPD powěsćerni dpa. Giffey chcedźa 21. decembra za nowu knježacu měšćanostku Berlina wuzwolić.
Liča z wulkimi stratami
Berlin (dpa/SN). Institut němskeho hospodarstwa (IW) liči w drobnowikowanju a w gastronomiji z wulkimi stratami wobrota, dyrbjeli-li prawidło 2G po wšej Němskej wukazać. Institut z toho wuchadźa, zo přisadźa wobchody jenož w decembru 5,3 miliardy eurow, kaž fachowc IW Christian Rusche nowinarjam rjekny. Měli wobkedźbować, zo ćerpja zawody mjeztym hižo druhe lěto w dohodownym času pod wobmjezowanjemi korony dla. Z 2G maja jenož hišće šćěpjeni a wustrowjeni přistup do wobchodow.
Smjertne plany dokumentował
Z tradicionalnym zapinjenjom wjace hač 50 000 pisanych swěčkow na ...
Planuja razniše naprawy
Berlin (dpa/SN). Ministerski prezident Sewjerorynsko-Westfalskeje Hendrik Wüst (CDU) je sej do dźensnišeho wuradźowanja Zwjazka a zwjazkowych krajow konsekwentne rozsudy w boju přećiwo dramatisce wulkim ličbam koronainfekcijow žadał. „Njesměmy na konferency ministerskich prezidentow žanym połojčnosćam přizwolić, ale dyrbimy infekcisku žołmu z rozsudźenosću přewinyć“, rjekny Wüst powěsćerni dpa.
Zwjazk a kraje chcychu dźensa razniše naprawy w boju přećiwo koronawirusej wobzamknyć. Prawdźepodobnje postajenja nastupajo wobmjezowanje kontaktow za nješćěpjenych dale přiwótřa. Powšitkowna winowatosć šćěpjenja njeje wuzamknjena. Tež wo mjenje přihladowarjach na wulkozarjadowanjach kaž w kopańcy chcychu rěčeć. Dokładne wuslědki hač do kónca redakciskeho časa hišće njepředležachu.
Putin za dojednanje z NATO
Moskwa/Riga (dpa/SN). Ruski prezident Wladimir Putin sej wot NATO žada so dale do směra na wuchod njerozšěrić. Jeho kraj trjeba „sylne, spušćomne a dołhodobne wěstotne garantije“, rjekny Putin wčera wukrajnym wulkopósłancam w Moskwje. Runočasnje wuradźowachu wonkowni ministrojo NATO w letiskej stolicy Rize z Ukrainu, kotraž nadźija so sylnišeje podpěry. Lěta trajacy konflikt mjez Kijewom a Moskwu zbudźa tuchwilu nowe napjatosće. USA Ruskej wumjetuja, zo přihotuje „agresiwnu wojersku akciju přećiwo Ukrainje“, štož Moskwa wotpokazuje.
Kaž Putin wukrajnym diplomatam zwurazni, chce Ruska w dialogu z USA na tym wobstać, zo zdźěłaja konkretne dojednanja, kotrež dalšemu rozpřestrěću zapadneje wojerskeje aliancy na wuchod a zaměstnjenju strašnych wojerskich systemow w bjezposrědnim susodstwje Ruskeje federacije zadźěwaja. Tele garantije měli zawjazowace być. Něhdyše ertne připrajenje, zo so NATO na wuchod njerozšěri, njebu dodźeržane.
