Maja noweho sekretara
Vatikan (B/SN). Amtěrowaceho generalneho sekretara Ekumeniskeje rady cyrkwjow (ÖRK) Ioana Saucu je bamž Franciskus na priwatnej awdiency přijał. Běše to nastupny wopyt rumunsko-ortodoksneho měšnika, kiž je 1. apryla naslědnistwo norwegskeho lutherskeho teologi Olava Fykse Tveita přewzał. Wón dósta wšitke prawa a cyłkownu zamołwitosć generalneho sekretara, zo by dźěło jako hłowny jednaćel ÖRK dale wjesć móhł. Pandemije dla njebě dotal móžno, jeho na hłownej zhromadźiznje oficialnje wuzwolić. Ekumeniskej cyrkwinskej radźe přisłuša 349 cyrkwjow.
Lětsa Boži narodk z Peruwa
Vatikan (B/SN). Bamž Franciskus dźakuje so lětsa za Boži narodk, kotryž pochadźa z Andow w Peruwje, a za božodźěsćowy štom ze sewjeroitalskeho Trentina. Mjeztym so na nim hižo lampki swěća. Na priwatnej awdiency wón peruskej delegaciji zwurazni: „Jězus je na swět přišoł, so mały sčinił, zo bychmy jeho přiwzać a něžnosć Božu přijimać móhli.“ Hody dótkatej so žiwjenje Boha a čłowjekow. „Prošu njedajće nam kumštne komercielne hody swjećić“, bě próstwa hłowy katolskeje cyrkwje.
Scholz na wopyće w Italskej
Berlin (dpa/SN). Po swojich nastupnych wopytach w Parisu, Brüsselu a Waršawje je zwjazkowy kancler Olaf Scholz (SPD) dźensa do Roma wotlećał, hdźež wočakowaše jeho italski ministerski prezident Mario Draghi. Italska je jedyn z najwažnišich partnerow Němskeje a jedyn ze štyrjoch europskich krajow w skupinje sydom wodźacych zapadnych industrijnych statow. W tej skupinje změje Italska wot 1. januara předsydstwo. Zetkanje z bamžom Franciskusom njeje planowane.
Razne naprawy w Awstriskej
Wien (dpa/SN). W boju přećiwo warianće koronawirusa omikronej dla je Awstriska prawidła zapućowanja drastisce přiwótřiła. Wot połnocy płaći zasada 2G plus. Bjeze wšeho smě jenož hišće tón do kraja, kiž je trójce šćěpjeny. Za dwójce šćěpjenych a wustrowjenych płaći přidatna winowatosć testa PCR. Štóž tajki test nima, dyrbi so registrować dać a hnydom do karanteny. Ta je nimo, ručež negatiwny PCR-test předleži.
Johnson dale we wuskosćach
Dźesaćitysacy ludźi protestowachu wčera po wšej Pólskej ...
Přepytowanski wuběrk Scholza dla rozhorjeny
Hamburg (dpa/SN). Dotal njeznate spočatne přepytowanja přećiwo bywšemu měšćanosće a nětčišemu zwjazkowemu kanclerej Olafej Scholzej (SPD) rozhorjeja opoziciju w parlamentariskim přepytowanskim wuběrku Hamburgskeho měšćanskeho parlamenta k tak mjenowanemu „Cum-ex“-skandalej. Hamburgske statne rěčnistwo bě powěsćerni dpa minjeny pjatk wobkrućiło, zo bě wot februara hač do septembra 2020 spočatne přepytowanja přećiwo Scholzej podhlada njeswěry dla wjedło. Zakład běchu wjacore wozjewjenja chłostajomneho njeskutka dla. Dokelž njebě so podhlad wobkrućił, su přepytowanja zastajili, kaž rěčnica zdźěli. Do toho běštej magacin ARD „Panorama“ a Manager Magazin wo naležnosći rozprawjałoj.
Zo njejsu wuběrk wo přepytowanjach informowali, je „lózyskosć“, rjekny zastupnik Lěwicy we wuběrku Norbert Hackbusch dpa. By nadawk prezidialneho wotrjada senatneje kenclije było, wotpowědne informacije posrědkować. Zastupnik CDU Richard Seelmaecker rěčeše wo wědomym za-nós-wodźenjom parlamenta. „Je skandal, zo su akty před wuběrkom chowali.“
Demonstracija namócnje wušła
Brüssel/Saarbrücken (dpa/SN). W Belgiskej su so protesty přećiwo politice knježerstwa koronawirusa dla wčera znowa na namócnosće wuwili. Policija je w stolicy Brüsselu wjace hač 50 ludźi zajała, kaž rěčnica policije zdźěli. W parku njedaloko twarjenjow EU zasadźichu tež wodomjetaki a sylzopłun. Do toho bě po informacijach policije 3 500 ludźi měrniwje demonstrowało. Zarjadowarjo rěčachu wo 50 000 wobdźělnikach.
Přizjewjene zarjadowanje bě hač do kónca měrniwje wotběžało. Po tym pak bě mała skupina „policiju wotpohladnje prowokowała“. Jednoho z demonstrantow dowjezechu do chorownje. Hižo minjene kóncy tydźenja bě we wobłuku akcijow přećiwo statnym naprawam koronawirusa dla k namócnym rozestajenjam a k zajećam dochadźało.
Něhdźe 5 000 ludźi je wčera w Saarbrückenje přećiwo naprawam k přewinjenju koronapandemije demonstrowało. Přizjewjene zarjadowanje bě měrne. Policija dyrbješe někotrych namołwjeć, nahubnik wužiwać.
Fachowcy: Spěšnje jednać
Nowa warianta koronawirusa omikron zamołwitych znjeměrnja
Berlin (dpa/SN). Krótko do hód zawinuje razantne rozšěrjenje noweje warianty koronawirusa omikron w mnohich europskich krajach – tež w Němskej – wulke znjeměrnjenje a ćišć na politiku powjetša. Nowa rada fachowcow zwjazkoweho knježerstwa warnuje před dramatiskim połoženjom. Omikron přinjese „nowu dimensiju“ do pandemiskeho połoženja, rěka we wčera wozjewjenym stejišću. Tuž je hižo přichodne dny nuznje trjeba jednać. Boosterowe šćěpjenja njejsu jenički srědk, žołmu omikron zadźeržeć. Trěbne su „přidatne naprawy“, kaž wobmjezowanje kontaktow. Fachowcy žadaja sej najspěšniše wuradźowanje Zwjazka a zwjazkowych krajow. Po słowach ministerskeho prezidenta Sewjerorynsko-Westfalskeje Hendrika Wüsta (CDU) měło wuradźowanje hišće do hód zhromadny plan postupowanja wunjesć. „Trjebamy zhromadnu strategiju přećiwo omikronej“, rjekny Wüst wčera powěsćerni dpa. Ministerski prezident Badensko-Württembergskeje Winfried Kretschmann (Zeleni) je alarmowany wo tym, štož wo omikronje słyši.
To a tamne (20.12.21)
Ćeknjene domjace swinjo je policiju w porynsko-pfalcskim Bobenthalu za nós wodźiło. Po tym zo běchu skoćo bjezposrědnje při dróze widźeli, spytachu je zastojnicy wospjet podarmo popadnyć. Skónčnje skótna lěkarka z narkotiskej sykawu swinjo pohłuši. Dokelž wone na žanym statoku njepobrachuje, liča z tym, zo bě so přez francosku mjezu sem dóstało. „Hildegard“ je nětko w chlěwje Bobenthalskeho bura zaměstnjena a zbožowna.
Swětnišćowej turistaj z Japanskeje staj so ze stacije ISS zaso na zemju wróćiłoj. Kapsla, w kotrejž sedźeštaj japanski miliardar Yusaku Maezawa a toho asistent Yozo Hirani, je dźensa rano po planje w stepje centralnoaziskeje republiki Kazachstana přizemiła. Ruski kosmonawt Aleksander Misurkin je swětnišćoweju turistow tam a zaso wróćo na zemju přewodźał.
Wutrobu Zhorjelskeje synagogi ze zmužitym skutkom wuchowali
Zhorjelc (AK/SN). Lětsa znowa poswjećena Zhorjelska synagoga budźe prawje bórze wo někotre nabožne dokumenty bohatša. „Jedna so wo dźěle tory tudyšeje židowskeje wosady lěta 1938. Su to runje te dokumenty, kotrež pokazuja na wustawowe załoženje ludu Israel, a su centralne wuprajenja židowskeje wěry.“ To podšmórny 79lětny Uwe Mader, hač do lěta 2006 farar ewangelskeje wosady Kunnerwitz, wčera w Zhorjelskej radnicy. Tam přepoda wón zachowane tora-róle wyšemu měšćanosće Octavianej Ursu (CDU) a nawodźe radneho archiwa Siegfriedej Hoche.
Sudnistwo 2G zběhnyło
Hannover (dpa/SN). W zwadźe wo wobmjezowanja koronawirusa dla we wobchodach so něšto hiba: Wyše zarjadniske sudnistwo Delnjeje Sakskeje je hakle krótki čas płaćiwy wukaz „2G“ w tamnišich wobchodach zběhnyło. Naprawa njeje w boju přećiwo wirusej trěbna a njewotpowěduje zasadźe runoprawosće, sudnicy rozsudźichu. Zwjazk wikowarjow to wita a namołwja druhe zwjazkowe kraje, prawidło 2G tohorunja zběhnyć.
Ličby spěšnje dosć njespaduja
Berlin (dpa/SN). Ličby natyknjenjow z koronawirusom hladajo na wućeženje intensiwnych stacijow chorownjow a rozpřestrěća noweje warianty omikron spěšnje dosć njespaduja, pisa Roberta Kochowy institut w swojej tydźenskej rozprawje. Wšitke škitne naprawy kaž wužiwanje nahubnika, redukowanje kontaktow a dodźerženje prawidłow hygieny maja so tuž dale dodźeržeć a samo hišće přiwótřić, z instituta rěka.
W poslednim wokomiku
