Strózbje jednać
To a tamne (08.02.22)
Dźiwje swinjo na konopeju je wobydlerku w sewjerorynsko-westfalskim Hagenje njemało nastróžiło a zasadźenje policije zawinowało. Něhdźe 60 kilogramow ćežka wurosćena ranca bě so přez terasowe durje do domu zadobyła, stwu přeborkała a so skónčnje lehnyła. Policistam dyrbješe žona při telefonje potwjerdźić, zo nježortuje. Zastojnicy wołachu hajnika, kiž zwěrjo do swobody pušći.
Drogi susoda w swojim bydlenju składowała je rentnarka w Rüsselsheimje pola Darmstadta. 1,4 kilogramy kokaina, hašiša, marihuany a 12 000 eurow chowaše 70lětna w kófru. Policija w Darmstadtće z toho wuchadźa, zo žona wědźeše, zo jeje 35lětny susod z drogami wikuje. Přećiwo woběmaj su sudniske jednanje zahajili. Zastojnicy běchu kófer našli, po tym zo njeběchu w bydlenju 35lětneho tak derje kaž žane drogi namakali.
Znjewužiwanje, łžě a zakryće
Berlin (B/SN). W telewizijnym wusyłanju „Anne Will“ su njedawno wo přichodźe katolskeje cyrkwje diskutowali a so prašachu: „Móžemy tutu cyrkej hišće wuchować?“ Mjez diskutantami bě předsyda Němskeje biskopskeje konferency biskop Georg Bätzing. Hižo hodźinu po wótrej diskusiji wozjewichu w interneće 850 komentarow, kotrež signalizuja wulku rozhorjenosć wobydlerjow. Diskutanća běchu zwěsćili, zo je nutřkocyrkwinske předźěłanje skandala seksualneho znjewužiwanja zwrěšćiło. Kritisce wupraji so Georg Bätzing k emeritowanemu bamžej Benediktej XVI. z wočakowanjom, zo zmylki přiznaje a so pola potrjechenych woporow zamołwi.
Hišće w sudniskej žurli zajaty
Wolóženja jasnje do jutrow
Berlin (dpa/SN). Dobry tydźeń do přichodneje konferency ministerskich prezidentow je zwjazkowy minister za strowotnistwo Karl Lauterbach bórzomne zběhnjenje wobmjezowanjow koronawirusa dla připowědźił. „Myslu, zo móžemy jasnje do jutrow wolóženjam přizwolić“, rjekny politikar SPD nowinarjam. Tuchwilu by pak za to hišće přezahe było. 16. februara je přichodne wuradźowanje Lauterbacha z krajemi planowane.
Starosća so namocy dla
Berlin (dpa/SN). Zwjazkowa nutřkowna ministerka Nancy Faeser (SPD) starosća so přiběracych politisce motiwowanych namócnosćow přećiwo politikarjam dla. Po aktualnych ličbach Zwjazkoweho kriminalneho zarjada su namócnosće přećiwo politisce zamołwitym wo 200 procentow přiběrali. To pokazuje po jeje słowach přiběracu hrubosć a zacpěwanje stata a demokratije. Faeser chce so wo to postarać, zo so w socialnych medijach dlěje hidu a teorije zapřisahanja nješěrja.
Nuzowy staw w stolicy
Chětro wjele diplomatije Ukrainy dla
Washington. Před pozadkom konflikta Ukrainy dla je so zwjazkowy kancler Olaf Scholz (SPD) dźensa do USA podał, hdźež wočakowaše jeho prezident Joe Biden. Dwaj měsacaj po swojim spřisahanju je to zdobom nastupny wopyt Scholza w USA. Do swojeho wotlěta do Washingtona je Scholz w sćelaku ARD hišće raz wotpokazał, brónje do Ukrainy dodawać. Wón chcył ameriskemu prezidentej hišće raz potwjerdźić, zo je Němska najswěrniši partner USA w Europje.
Wopyt zwjazkoweho kanclera je zazběh diplomatiskeje ofensiwy. Přichodny tydźeń chce so Scholz do Kijewa a po tym do Moskwy podać. Do toho je hišće zetkanje ze statnymi a knježerstwowymi šefami baltiskich krajow w Berlinje planowane. Nimo toho chcetaj francoski prezident Emmanuel Macron a pólski prezident Andrzej Duda k rozmołwam wo krizy na Ukrainje do Berlina přijěć.
Hišće dźensa chcyše so Macron na puć do Moskwy k prezidentej Wladimirej Putinej podać. Wobaj běštaj minjene dny wospjet telefonowałoj.
Prěnje konkretne kročele
Trěća synodalna zhromadźizna k ponowjenju katolskeje cyrkwje nimo
Frankfurt (dpa/SN). Z prěnimi konkretnymi wobzamknjenjemi je so sobotu třeća synodalna zhromadźizna k ponowjenju katolskeje cyrkwje w Němskej zakónčiła. Předsyda Němskeje biskopskeje konferency Georg Bätzing hódnoćeše tři dny trajace zetkanje w Frankfurće nad Mohanom jako „wulki wuspěch“.
Konkretnje su wobzamknyli, zo maja wěriwi biskopstwow přichodnje wjetši wliw při powołanju noweho biskopa. Nimo toho wuprajichu so za to, homoseksualne pory žohnować, ženjenym duchownym dźěło zmóžnić a žony na diakonow wuswjećić. Jasnje wuprajichu so delegaća za změnu cyrkwinskeho dźěłoweho prawa. Tuchwilu hroža sobudźěłaćerjam cyrkwinskich institucijow w padźe dźělenja mandźelstwa dźěłoprawniske konsekwency, w najhóršim padźe pušćenje. Dotal je njejasne, kak bamž Franciskus na wobzamknjenja reaguje. Minjeny čas běchu z Vatikana skerje kritiske signale słyšeć byli.
Rozmach w cyrkwi?
Wjace policistow
To a tamne (07.02.22)
Karantena muža koronawirusa dla je w Drježdźanach zasadźenje wohnjoweje wobory zawiniła. Susodźa běchu policiju a wohnjowu woboru wołali, po tym zo běchu muža na třěše wjaceswójbneho domu wuhladali. Wohnjowym wobornikam na wjerćatym rěblu wón rozłoži, zo je tuchwilu w karantenje a zo chcyše na čerstwy powětr, bjez toho, zo by někoho wohrozył. Tuž je na třěchu zalězł.
Swětowy rekord nastupajo NDRski „Trabant“ je wotnětka oficialnje zaso w Zwickauwje. Pjeć měsacow po tym, zo bě so spočatk septembra 20 młodych žonow do zeleneho Trabanta 601 tłóčiło, su fachowcy rekord nětko oficialnje připóznali. Prěni rekord ze 17 wosobami běchu 1976 w Zwickauwje nastajili. Před lětomaj dźěše titul do braniborskeho Altlandsberga z 18 ludźimi. Wot toho časa su w Zwickauwje za nowy rekord zwučowali.
Wjace ruskeho płuna do Chiny
Peking (dpa/SN). Ruska chce wosrjedź napjatosćow ze zapadom Chinje wjace zemskeho płuna dodawać. Prezident Wladimir Putin a chinski statny a stronski šef Xi Jinping staj dźensa w Pekingu nowe zrěčenje připowědźiłoj. Tak dóstanje China dźesać miliardow kubiknych metrow płuna wob lěto. Putin je dźensa w Pekingu tež na zahajenju Olympiskich zymskich hrow. Poćahi mjez Ruskej a Chinu su po jeho słowach „bjez přikłada“.
Unija SPD přesćahnyła
Berlin (dpa/SN). Unja CDU/CSU je SPD po zwěsćenju sćelaka ARD w nahladnosći ludźi prěni króć po měsacach zaso přesćahnyła. Bychu-li njedźelu wólby zwjazkoweho sejma byli, by SPD 22 procentow dóstała, štyri procenty mjenje hač tydźenja. Unija móžeše so wo štyri procenty polěpšić a ma 27 procentow. Zeleni maja dale 16 procentow, Lěwica pjeć. FDP je wo jedyn dypk na dźesać procentow spadnyła. AfD je so wo jedyn dypk na dwanaće polěpšiła.
Roth: Agresiwny akt
