Njebjelčicy na wuchodźe wulke wuwzaće
Berlin/Njebjelčicy (dpa/SN). Ličba ludnosće na wuchodźe Němskeje po politiskim přewróće hižo tak dramatisce njewoteběra. To wuchadźa ze studije Berlinskeho instituta za ludnosć a wuwiće, kotraž bu wčera wozjewjena. Při tym pomhali su kreatiwne ideje a „nowa žadosć“, bydlić we wjesnej kónčinje. Fachowcy přepytowachu demografiske wuwiće we wuchodnych zwjazkowych krajach a wobswětleja sćěhi a naprawy jednotliwych komunow. Pod smužku je wuchod Němskeje (bjez Berlina) w lětach 1990 do 2020 něhdźe 2,3 miliony ludźi z tehdy 14,8 milionow wobydlerjow zhubił. Zapadne zwjazkowe kraje registrowachu porno tomu w tym času rozrost 5,4 milionow ludźi.
Němski póst porto podróši
Bonn (dpa/SN). Zwjazkowa agentura centralow za přetrjebowarjow je wčera wólny rum za zwyšenje płaćiznow wozjewiła, na kotrehož zakładźe Němski póst swoje porto wusměrja. Tak je hižo nětko wěste, zo Bonnski koncern porto za listy a pohladnicy zwyši, a to wo 4,6 procentow. Hódnota je hišće poměrnje niska, hakle před lětomaj wučinješe wona 8,9 procentow. Tehdy bě so porto standardneho lista wo dźesać na 80 centow podróšiło. Kaž koncern wčera wozjewi, postupi porto normalneho lista na 85 centow, štož ma potom přichodne tři lěta płaćić.
Listowe wiki so hladajo na digitalny swět dale a bóle pomjeńšeja. Dźeń a mjenje ludźi sej pisa, skerje wužiwaja moderne komunikaciske srědki. Přiwšěm wostawa listowe wobchodnistwo za koncern nadal lukratiwne, a to naposledk tež dowolenych wyšich płaćiznow.
Kaž Němski póst wčera dale wozjewi, chce tež tamne produkty wo pjeć centow podróšić. Logistiski koncern wopodstatnja to z wyšimi kóštami. Nětko ma zwjazkowa agentura přetrjebarskich centralow pruwować, hač je zwyšenje porta w přizwolenym wobłuku.
FDP chětro iritěrowana
Rozmołwy wo amplowej koaliciji zahajili
Berlin/Mnichow (dpa/SN). SPD, Zeleni a FDP wusměrjeja swój kurs na amplowu koaliciju. Jědnaće dnjow po wólbach zwjazkoweho sejma zahajichu zastupjerjo stron dźensa rozmołwy, zo bychu šansy koalicije dale wobrěčeli. Móžny jamaiski zwjazk, wobstejacy z unije, FDP a Zelenych, je tuž najprjedy raz z blida. Frakcija unije chce so dźensa na digitalne posedźenje zetkać a połoženje rozjimać.
Spomóžne to było njeby
Škit přesnadny
Berlin (dpa/SN). Předsyda stajneje šćěpjenskeje komisije Thomas Mertens warnuje koronapandemiju nastupajo před přemało gripowymi šćěpjenjemi rizikowych skupin. Dotal je 30- do 50procentowska kwota jasnje přeniska. Tež hdyž njebě minjenu sezonu žaneje sylneje gripoweje žołmy, móhło tomu tónkróć ćim hórje być. Fachowcy radźa wosebje samodruhim, chronisce chorym, medicinskemu personalej, hladacym přiwuznym a ludźom, kotřiž maja wšědnje kontakt k wulkemu publikumej, so šćěpić dać. Kaž hižo pola korony dźe wo to, zo by mjenje ludźi lěkowanje w chorownjach trjebało abo zemrěło. „Při šćěpjenju njeńdźe jenož wo koronu. Tež wšitke tamne šćěpiwa měli dale běžeć“, skedźbnja Mertens zdobom na šćěpjenje dźěći. „Srědki su genialne a jara wuznamne wudobyće mediciny“, wón měni. „Zo bychmy wjele infekciskich problemow rozrisać móhli, za to pomha nam naposledk jenož dobre šćěpiwo.“
To a tamne (07.10.21)
Agresiwny šofer nakładneho awta by na awtodróze A7 pola Fuldy bjezmała dwě njezboži zawinił. Najprjedy je spytał dalše jězdźidło z jězdnje stłóčić. Na to zasta prěki přez wšě čary, wulěze z Lkw-ja a pokaza tamnym šoferam nahi zadk. Dale jěducy by nimale dalše awto z dróhi stłóčił, te pak móžeše so jemu hišće runje tak wuwinyć a na parkowanišćo wotjěć. Policija 39lětneho skónčnje zadźerža, a tón ma so nětko wjacorych přeńdźenjow dla zamołwić.
Leopard na zahrodźe je policiju w Münsterlandźe zaběrał. Znajmjeńša přizjewi to wosoba, kotraž bě nuzowe čisło woliła. Jako zastojnicy na zahrodu w Stadtlohnje přińdźechu, tež woprawdźe za tym wupadaše. Kaž so wukopa, pak jednaše so wo rubježnu kóčku z mjenom serwal. Fachowc zwěrjo skónčnje popadny.
Solarna branša bilancuje
Mnichow (dpa/SN). Solarna branša wočakuje w Němskej přichodne lěta sylniše wužiwanje słónčneje energije. Hižo lětsa budźe wukon solarnych připrawow wo dźesać do 15 procentow přiběrać, zdźěli dźensa němski zwjazk solarneho hospodarstwa. Dale a wjac elektroawtow wuwiće pohonja. Po informacijach zwjazka w Němskej 4,5 milionow solarnych připrawow milinu abo ćopłotu produkuje.
Nětko interne rozmołwy
Berlin (dpa/SN). FDP a Zeleni chcedźa dźensa internu mjezybilancu w zwisku z wutworjenjom noweho zwjazkoweho knježerstwa sćahnyć. Digitalnje rozjimuja Zeleni sonděrowanski staw z přichodnymi koaliciskimi partnerami. FDP je so dopołdnja w Berlinje schadźowała. Wospjet stej wobě stronje wuzběhnyłoj, zo měłoj zakłady politiskeje změny zhromadnje tworić. Zeleni chcedźa koaliciju z SPD a FDP, tež jamaiski zwjazk je hišće móžny. Uniji přichilena FDP njeje so dotal hišće doskónčnje jasnje wuprajiła.
Koronu a gripu tematizowałoj
Za ludźi w karantenje su so wólby čěskeho parlamenta hižo dźensa ...
Ekstremisća na mocy dale přibywaja
Drježdźany (dpa/SN). Z wulkej starosću sakske wěstotne zarjady přiběracu radikalizaciju ekstremistiskeje sceny wobkedźbuja. „Naša demokratija njebě w najmłódšim času nihdy tak wohrožena kaž nětko“, wuzběhny sakski minister za nutřkowne naležnosće Roland Wöller (CDU) wčera na předstajenju rozprawy wustawoškita w Drježdźanach.
Lěwicarska kaž tež prawicarska scena so dale zesylnjatej. Prawicarscy ekstremisća a t. m. reichsbürgerojo naprawy zwjazkoweho knježerstwa hladajo na naprawy koronapandemije dla do prašenja stajeja a tak mnohich docpěwaja. Prawicarjo pytaja sej ludźi we wšěch worštach.
Chce za wuchod wjele docpěć
Podstupim (dpa/SN). Předsyda frakcije SPD w Braniborskim krajnym sejmje Erik Stohn wzda so swojeho zastojnstwa, zo by so na koaliciskich jednanjach w Berlinje wobdźělić móhł, kaž wón wčera wječor připowědźi. „SPD je w Braniborskej a na wuchodźe Němskeje jara dobre wólbne wuslědki dóstała“, Stohn wuzběhny. Tuž je nětko wažne zamołwiće jednać a hladajo na jednanja wjele za wuchod docpěć. Wosebje wažny je jemu zakoń wo kóncu wudobywanja brunicy, kotryž měli pod dobrymi wuměnjenjemi zwoprawdźić. Naslědnistwo Stohna ma parlamentariski jednaćel Daniel Keller přewzać, štož dyrbi frakciska klawsura wobkrućić. Termin pak hišće jasny njeje. Keller skutkuje hakle wot lěta 2019 w braniborskim sejmje.
Kotru rólu ma Erik Stohn w Berlinje přewzać, nochcyše wón rjec. Zhromadnje z braniborskim ministerskim prezidentom Dietmarom Woidku (SPD) pak chce so wón přichodne tydźenje „intensiwnje wo naležnosć starać“. Stohn je wot lěta 2014 zapósłanc Braniborskeho krajneho sejma a wot nowembra 2019 předsyda frakcije SPD. Wot lěta 2017 do 2021 bě wón zdobom generalny sekretar socialdemokratow w Braniborskej.
