Wuběrk přepytuje katastrofu
Mainz (dpa/SN). Přepytowanski wuběrk krajneho sejma w Porynsko-Pfalcy ke katastrofje zapławjenja w juliju ze 134 mortwymi na sewjeru zwjazkoweho kraja je so dźensa prěni króć zešoł. Gremij ma podawki do katastrofy, za čas zapławjenjow a po tym rozswětlić, předewšěm pak politiske zamołwitosće. Opoziciska CDU bě sej zasadźenje wuběrka žadała. Mjeztym přepytuje statne rěčnistwo přećiwo krajnemu radźe wokrjesa Ahrweiler, Jürgenej Pföhlerej (CDU).
Wuwzaćny staw podlěšeny
Waršawa (dpa/SN). Hladajo na dale trajacy nawal migrantow je pólski sejm wuwzaćny staw na mjezy k susodnej Běłoruskej wo dalše 60 dnjow podlěšił. Prezident Andrzej Duda bě wotpowědnu próstwu zapodał. W debaće nawoda narodneho wěstotneho běrowa Pawel Soloch rozprawješe, zo su jeničce w septembru nimale 7 000 migrantow lepili, kotřiž chcychu z Běłoruskeje ilegalnje do Pólskeje zapućować. Loni w septembru bě jich 120 było. Podłu mjezy su zawrjene pasmo zarjadowali, do kotrehož njedadźa ani pomocnikow ani žurnalistow.
Na etat so dojednali
Europski wuběrk čěskeho senata a čłonojo wuběrka za wustawu, ...
Jednaja dale wo koaliciji – Merz kritizuje CDU
Berlin (dpa/SN). FDP a Zeleni su so dźensa dopołdnja na dalše rozmołwne koło zešli, zo bychu wo móžnym wobdźělenju w nowym zwjazkowym knježerstwje wuradźowali. W běhu dnja chcychu wo wuslědkach informować. Při druhich tak mjenowanych dočasnych sonděrowanjach chcychu konkretnišo wo wobsahach a zaměrach móžneje přichodneje koalicije rěčeć.
Tež nawodnistwo CDU je so dźensa zetkało. Prezidij strony je na widejowej konferency kurs za wočakowane rozmołwy wo móžnej jamaiskej koaliciji CDU/CSU, FDP a Zelenych schwalił.
Mjeztym je Friedrich Merz, čłon tak mjenowaneho mustwa přichoda kanclerskeho kandidata unije Armina Lascheta, swoju stronu raznje kritizował. „CDU je přelěnja k myslenju“, rjekny wón nowinarjam. Wón CDU wumjetowaše, zo nima žane tematiske wusměrjenje wjace a zo njeje mjez ludźimi wjace prezentna. Tole měło so změnić.
Kritizuja wolóženja w šulach
Berlin (dpa/SN). Zwjazk wučerjow Němskeje a dźěłarnistwo za kubłanje a wědomosć (GEW) planowane wolóženja nastupajo wužiwanje nahubnikow w šulach wotpokazujetej. „Skónčenje testowanja a wotstronjenje winowatosće wužiwanja nahubnikow kaž tež redukowanje karantenowych postajenjow zwyša strach, zo stanu so šule z „black Box“, štož kontrolu infekcije znjemóžnja, rjekny prezident zwjazka wučerjow, Heinz-Peter Meidinger nowinarjam. Předsydka GEW Maike Finnern w tym zwisku rjekny, zo ma winowatosć wužiwanja nahubnika „jako dźěl naprawow wotwisnje wot wuwića infekcijow za zmysłapołne“.
Wjacore zwjazkowe kraje běchu wolóženja nastupajo wužiwanje nahubnikow w šulach připowědźili. Runočasnje wočakuje Roberta Kochowy institut nazymu a w zymje zaso přiběrace ličby infekcijow. Hłowne přičiny su „přeco hišće wulka ličba nješćěpjenych“ a přiběrace kontakty w nutřkownych rumnosćach. Na Berlinskich šulach wot póndźele nahubniki wjace njetrjebaja, runje tak kaž w Braniborskej.
Zaso swjedźenje w Bayerskej
To a tamne (01.10.21)
Ze zwažliwej akciju je muž w zwjazkowym staće USA Floridźe z wotpadkowym sudobjom krokodila popadnył. Něhdźe mjeńšinu trajacy widejowy clip wo podawku w městačku Mount Dora, 35 kilometrow sewjerozapadnje Orlanda, su wot wutory na twitteru mjeztym dźesać milionow króć nakliknyli. W nim je widźeć, kak so 26lětny z wočinjenym sudobjom na zemi aligatorej bliži a jeho skónčnje popadnje. Po tym běži muž přez dróhu a krokodila zaso pušći.
Z pomocu bananow su ze zwěrjenca ćeknjenu wopičku w porynsko-pfalcskim Rockenhausenje do paslow wabili. Makak „Udo“ bě před měsacomaj twochnył. Minjene dny bě wón stajnje zaso sad z balkona spakosćił. Tuž jemu direktor tam bananowe pasle nastaji, do kotrychž sej Udo zalěze. Kónc julija bě wón stpicu swojeje klětki wotzhibnył a so zminył.
Skućićeljo za wodźidło
London (dpa/SN). W boju přećiwo wulkim njedostatkam při zastaranju ludźi we Wulkej Britaniskej je zastupowacy premierminister Dominic Raab namjetował, jako šoferow jatych zasadźić, kotřiž dotal w jastwach darmotnje dźěłaja. W kraju pobrachuje něhdźe 100 000 šoferow nakładnych awtow. Tole wjedźe k problemam při zastaranju tankownjow a kupnicow. Warnowanja knježerstwa před „paniku“ su k dołhim rynkam čakacych awtow před tankownjemi wjedli.
Za lěpše lěkarske zastaranje
Drježdźany (dpa/SN). Sakski krajny sejm je dźensa z aktualnej debatu wo kumštnej inteligency druhi dźeń wuradźowanjow zahajił. Nimo toho dyrbješe so statne knježerstwo prašenjam zapósłancow stajeć. W běhu dnja chcychu zakoń schwalić, z kotrymž ma so lěkarske zastaranje we wjesnych kónčinach polěpšić. Kóžde lěto chcedźa 50 studijnych městnow poskićić, hdyž so studowacy zawjazaja, znajmjeńša dźesać lět na kraju dźěłać.
Kritizuja wuznamjenjenje
Po šěsć lětach ponowjenja je płachtak Gorch Fock wot ...
Vatikan zasudźuje brónjenje
Rom (dpa/SN). Vatikan je mjezynarodne zhromadźenstwo statow a wosebje kraje z atomowymi brónjemi namołwjał, wjace za wotbrónjenje činić. Cyrkwinski stat wuzběhny „wurazne žadanje čłowjestwa“ za kóncom atomowych bróni, „zo by swět wot stracha nuklearneje wójny wuswobodźił“, rjekny arcybiskop Paul Richard Gallagher we wčerawšej powěsći. Brita je sekretar swjateho stoła za poćahi Vatikana k druhim krajam a tak praktisce wonkowny minister bamža Franciskusa.
Gallagher kritizuje, zo politika wottrašenja a stajnje nowe „nječłowjeske technologije“ njedowěru mjez statami powjetša. Nimo toho wjedu „nadměrne wudawki někotrych krajow“ za produkciju a hladanje atomowych bróni k dale přiběracej njesprawnosći na swěće. Runje w časach pandemije dyrbjeli kraje wojerske wudawki znižić a wjace pjenjez za humanitarne naprawy na swěće nałožować.
Politiski ćišć šćěpjenja dla „absurdny“
Stuttgart (dpa/SN). Móžne šćěpjenske doporučenje za dźěći pod dwanaće lětami budźe z wida Stajneje šćěpjenskeje komisije hišće ćeše hač za młodostnych mjez dwanaće a 17 lětami. Dotal njeje žane dźěćo pod 17 lětami w Němskej jenož koronawirusa dla zemrěło, rjekny předsyda komisije Thomas Mertens Stuttgartskim nowinarjam. Tohodla bě rozsud po wotwažowanju wužitka a njelěpšinow tak ćežki. „Pola młódšich budźe tónle rozsud hišće ćeši.“
Předsyda komisije wočakuje zdobom „nowu žołmu politiskeho ćišća“ hladajo na šćěpjenje młódšich dźěći. „Ćišć je pak w tymle zwisku škódny. Wosebje tež tohodla, dokelž dyrbja dźěći nětko špatnu kwotu šćěpjenja mjez 18 do 59lětnymi wurunać. To je absurdne.“
Šćěpjenska komisija je wědomostny gremij, kiž ma na zakładźe přepytowanjow rozsudźić a doporučenja dawać. Pobrachuja-li wuzrawjene ličby, wostanje komisija kedźbliwa. Tomu bě tež nastupajo šćěpjenje dwanaće do 17lětnych tak. Skónčnje pak šćěpjenje doporučichu.
