Drježdźany (dpa/SN). Wupad miliny wčera w 14 hodź. w Drježdźanach a wokolinje je pad za policiju. Po tuchwilnych dopóznaćach bě balon z metalowej worštu wupad miliny zawinił. Hač bu balon wotpohladnje do wažneho stejnišća přepinarnje wodźeny, ma nětko kriminalna policija přepytować.

Mjeztym so dimensija wupada dale a bóle wujewja. Něhdźe 300 000 domjacnosćow, ale tež industrijne zawody, njeje nachwilnje milinu měło. Mylenja mějachu tež w Radebeulu, Radebergu, Freitalu a dalšich kónčinach. Wokoło 15 hodź. móžeše předewzaće Sachsen-Energie 95 procentow domjacnosćow z milinu zaso zastarać.

Drježdźanska wohnjowa wobora pak měješe ruce połnej dźěła. W běhu dweju hodźin dósta wona 270 nuzowych tele­fonatow. Tak dyrbješe ludźi z liftow wuchować. Nimo toho su awtomatiske wohnjoškitne přizjewjenske připrawy wopačne alarmy signalizowali. Wuchowanska słužba dyrbješe pacientam doma pomhać, dokelž jich dychanske nastroje njefungowachu. Tež tramwajki w Drježdźanach nachwilnje jězdźić njemóžachu.

Přiznawam, zo běch wčera do zhromadneho wólbneho foruma našeho wječornika z Domowinu napjaty. To pak so z postupowacej diskusiju zhubi. Běch pozitiwnje překwapjeny wo poměrnje wěcownej a jasnej diskusiji kaž tež wo tym, kelko ­ludźi je poskitk w Chróšćanskej „Jednoće“ při­wzało. Wjeselu so tež, zo bě so tójšto młodych ludźi zmužiło na forumje kandidowacym a jich zastupjerjam swoje prašenja k palacym temam stajić, kaž stej to na přikład łužiska přiroda a wjelk, a zo njejsu cyle jednorje z powšitkownosćemi spokojom. Jasnje pokaza to mjez druhim prašenje samo- a sobupostajowanja Serbow, w kotrych wobłukach móhli sej ­kandidaća předstajić Serbam awtonomiju přewostajić. Zajimawe to prašenje, mjenje zajimawa bě wotmołwa. Wšako so pra­šani na podiju skerje wijachu hač wotmołwichu. Přiwšěm su mi wčerawši wječor a wosebje prašenja młodych Serbow pokazali, zo jim naš lud a Łužica smorže njejstej. Janek Wowčer

Chětro zajěł bě so kolesowar, kotrehož su danscy policisća na awtodróze pola ­Ellunda njedaloko mjezy k Němskej le­pili. Kaž jim 25lětny powědaše, bě wón před dnjemi w Madźarskej startował, zo by přećela w Italskej wopytał. Kartu ­abo handy pak młody muž žanej při sebi njeměješe. Zastojnicy přepodachu 25lětneho policiji w Němskej, kotraž přewodźeše jeho skónčnje na dwórnišćo.

Tankować a zapłaćić – tak to wodźerjo jězdźidłow činja. Na tankowni w delnjobayerskim Hauzenbergu pak je minjenu sobotu něšto křiwje běžało. ­Jako chcyše muž swoju zličbowanku 21 eurow za­płaćić, wón pytny, zo je tankownja zamknjena. Wón zawoła tuž policiju, zo móhł pjenjezy někomu dać. Wšako nochcyše nikoho wobšudźić. Kaž zastojnicy zwěsćichu, bě šef tankownje na dowolu a njedocpějomny. Po wšěm zdaću bě wón zabył tankowanske stołpy wupinyć.

Vatikan (B/SN). Nazymu zahaji so swě­towa synoda katolskeje cyrkwje, we wo­błuku kotrejež maja biskopja a lajkojo dwě lěće wuradźować. Za to su minjeny tydźeń na nowinarskej konferency při­hotowanski dokument čłonam synody přepodali, zwurazni nawoda vatikan­skeho sekretariata synody kurijowy kardinal Mario Grech. W oktobrje so wu­radźowanja synodalneje zhro­madźizny oficialnje zahaja, potom klětu w lěću ­bu­- dźe druha kontinentalna faza. Zakónčaca synodalna zhromadźizna biskopow a lajkow ma so w oktobrje 2023 wotměć. Na synodalnym procesu chcedźa po cyłym swěće samozrozumjenje katolskeje cyr­kwje sylnić a regionalnje kaž tež ­mje­zy­- narodnje wažne temy přichoda zdźěłać.

Rozprawa swětoweje cyrkwje