Kanclerski kandidat Laschet chce rozdźěle k SPD a Zelenym pokazać

Berlin (dpa/SN). Kanclerski kandidat CDU/CSU Armin Laschet chce w horcej fazy wólbneho boja hladajo na špatne wuslědki woprašowanjow bóle hač dotal na swoje mustwo sadźeć. „Dyrbimy a budźemy wjace mjezwočow pokazać a tak potwjerdźić, zo smy sylne mustwo“, rje­k­ny předsyda CDU po informacijach wob­dźělnikow minjeny pjatk na internetnym posedźenju frakcije CDU/CSU. Na njej běchu­ wurjadne posedźenje zwjazkoweho sejma přichodnu srjedu přihotowali, hdźež póńdźe wo pomoc woporam wulkeje wody na zapadźe Němskeje a wo zasadźenje zwjazkoweje wobory w Afghanistanje. Z wažnymi temami chcedźa přichodne tydźenje tež kmanych fachowcow unije prezentować. Laschet rjekny: „Mjeztym, zo dyrbi SPD swojich ludźi schować, móžemy hordźe swoje kom­petentne wosobiny pokazać, w zwjaz­ko­wych krajach runje tak kaž w zwjaz­ko­wym sejmje. „Po tutym puću ma so wšón spektrum unije wotbłyšćować.“

Hišće w prawym času přeprošenje na dźěćace narodniny dóstał je hólc w Augsburgu – dźakowano policistam. Kriminalna policija bě pad pokradnjenych listow přepytowała a tójšto wočinjenych posyłkow namakała. Mjez nimi bě tež přeprošenje. Bychu-li zastojnicy list z pó­štu­ dale słali, njeby přeprošenje wjace w prawym času dóšło. Tuž přiwjezechu je wosobinsce.

Samotwarjene kabrio je francoska policija sćazała. Muž bě z pomocu piły swój 20 lět stary Citroën Xantia přetwarił a třě­chu prosće wotrězał. Policisća njewšědne jězdźidło na awtodróze A 20 do směra na atlantiski pobrjóh zadźeržachu a wotpowědujo předpisam sćazachu. Z tym zbudźichu tež tójšto kritiki. Ludźo njerozumja, zo so policisća z tajkim „problemom“ zaběraja, město toho, zo bychu woprawdźitych kriminelnych přesćěhowali.

Spěšnje roznjese so tež w Serbach powěsć, zo je 12. awgusta Kurt Biedenkopf 91lětny zemrěł. Rodźeny 28. januara 1930 w Ludwigshafenje je promowowany „doktor prawa“ na wjacorych uniwersitach na zapadźe Němskeje skutkował. Tohorunja na politiskim parkeće zapadneje Němskeje njebě Biedenkopf njeznaty a nje­boješe so tež rozestajenjow, tež nic z te­hdyšim kanclerom Helmutom Kohlom.

Po politiskim přewróće započa so za Kurta Biedenkopfa, runja njeličomnym wobydlerjam bywšeje NDR, nowa žiwjenska doba. Ze swojej mandźelskej Ingrid přińdźe wón do Sakskeje a sta so prěni ministerski prezident swobodneho stata po přewróće. Nic jenož němscy politi­karjo maja jeho za wuznamnu wosobinu za Saksku, ale tež serbscy. Přezjednje měni wjetšina ludnosće, zo je zakłady dźensnišeje sylneje Sakskeje połožił.

Budyšin (SN/CoR). Budyski krajny rada Michael Harig (CDU) je w zwisku z aktualnej diskusiju wo płaćomnych koronatestach wot oktobra před dalšim pačenjom towaršnosće warnował. „Wuslědk je, zo ćěrimy kritikarjow šćěpjenja do směra politiskich ekstremistow, štož je tež hladajo na bližace so wólby zwjazkoweho sejma strašne“, pisa 60lětny wčera w zjawnym lisće zwjazkowej kanclerce Angeli Merkel (CDU) a ministerskim prezidentam krajow. „Móžu Was jenož prosyć, hladajo na połoženje datow, normalitu zmóžnić a zakładne prawa zaručeć. Dźeń a bóle přiwótřa so zaćišć přez zajimy wodźeneho stata wyšnosće. Tomu ma so wězo zadźěwać“, w lisće dale rěka.

Po měnjenju Hariga zda so „stadłowa imunita“ zapřijejo dotal wustrowjenych docpěta. Za znamjo za to ma wón wobstejnosć, zo je ličba w chorowni lěkowanych padow drastisce woteběrała. 85 procentow nad 60lětnych je połne imunizowanych. Tak su wujasnjenske mustry, kotrež maja naprawy lockdowna – tež za nješćěpjenych – wusprawnjeć, zwjetša njepłaćiwe.