Zeleni Harigej znapřećiwjeja
Předsydstwo wokrjesneho zwjazka Budyšin a frakcija Zwjazka 90/Zelenych w tudyšim wokrjesnym sejmiku znapřećiwjatej wuprajenjam w zjawnym lisće Budyskeho krajneho rady Michaela Hariga (CDU) zwjazkowej kanclerce a ministerskim prezidentam nastupajo politiku korony dla.
Budyšin (SN/at). „Ze zadźiwanjom“ su Zeleni w Budyskim wokrjesu zwuraznjenje Budyskeho krajneho rady Michaela Harig na wědomje brali, rěka we wčera wozjewjenej zhromadnej nowinskej informaciji wokrjesneho předsydstwa a frakcije w sejmiku.
Hinak hač Harig, kiž nadběhowaše w zjawnym lisće předwidźany kónc statneho financowanja spěšnotestow na koronu, maja Zeleni tajki krok „za zastupujomny“. Wšako je mjeztym dosć poskitkow so šćěpić dać. Sakska ma z nimale 50 procentami čerwjenu latarnju nastupajo šćěpjensku kwotu w Němskej, tempo šćěpjenjow so wšědnje spomala. „Při tajkim, we wokrjesu nimo toho jara njejasnym połoženju datow njeje móžno jeno přibližnje z wjetšinoweje imunity wuchadźeć“, w nowinskej zdźělence rěka.
Wočakuja słabe žně
Berlin (dpa/SN). Zwjazk ratarjow Němskeje liči lětsa z přesłapjacymi žnjemi. Tak wočakuja 42,4 miliony tonow žita, nimale dwaj procentaj mjenje hač loni. Je to zdobom 4,7 procentow mjenje hač přerězk žnjow w lětach 2015 do 2020, zdźěli prezident zwjazka Joachim Rukwied. Wospjetne krupy a zliwki su pokazali, zo maja so tež ratarjo z wuskutkami klimoweje změny bědźić. Kukuricy, cokorowej rěpje a zeleninje su spadki tyli. Płaćizny su so tohorunja zwyšili, štož je na dobro ratarskich zawodow.
Wjacore demonstracije zakazane
Berlin (dpa/SN). Policija w Berlinje je dalše planowane demonstracije přećiwnikow wobmjezowanjow koronawirusa dla zakazała. Dotal je sydom zarjadowanjow zakazanych, pruwowanja pak njejsu hišće wotzamknjene. Srjedu bě policija tři wulke demonstracije srjedź města zakazała, mjez nimi manifestaciju iniciatiwy prěkimyslerjow pod hesłom „Lěto swobody a měra“ na Dróze 17. junija před Braniborskimi wrotami. W zwisku z koronu běchu za sobotu 17 demonstracijow a njedźelu 14 přizjewili.
Z afriskimi krajemi rěčała
Zeman poskića Němskej milinu
Zwjazkowy prezident Frank-Walter Steinmeier přebywa na tři dny trajacym wopyće w susodnej Čěskej. Wčera je so wón z prezidentom Milošom Zemanom k rozmołwje zetkał.
Praha (dpa/SN). Čěski statny prezident Miloš Zeman je poćahi swojeho kraja k němskemu susodej „wulkotne“ mjenował. „Naše poćahi njeběchu hišće nihdy tak dobre kaž tuchwilu“, rjekny 76lětny po zetkanju ze Steinmeierom w Praze. Wosebje dźakowaše so Němskej za pomoc w koronapandemiji. Na wjeršku pandemije loni nazymu běchu lěkarjo Zwjazkoweje wobory we wojerskej chorowni w Praze wupomhali.
Biden wjećbu připowědźił
Wopačny swět w Kabulu
UNO prosy na wjeršk
Miliony eurow za nowe sireny
Drježdźany (dpa/SN). Swobodny stat Sakska chce ze Zwjazkom a tamnymi zwjazkowymi krajemi zrěčenje nastupajo pjenježnu pomoc k polěpšenju warnowanskeje infrastruktury wotzamknyć. Krajne knježerstwo je minjenu wutoru „hnydomny pomocny program za sireny wobzamknyło“. Nutřkowny minister Roland Wöller (CDU) ma program za wažny „hladajo na warnowanje wobydlerjow w padźe katastrofy“. Wón je za to, kóždy móžny warnowanski srědk wužiwać, dokelž móže kóžde warnowanje žiwjenje wuchować. Z cyłkowneho spěchowanskeho programa 88 milionow eurow dóstanje Sakska nimale 4,3 miliony. Z pjenjezami chcedźa nowe sireny kupić a wobstejace hladać. Za natwar noweje sireny na třěše přewostaja 10 000 eurow a za sirenu na sćežorje 17 000 eurow. Narunanje abo wudospołnjenje elektroniskeje sirenoweje techniki spěchuja z 1 000 eurami.
W Sakskej je tuchwilu něhdźe 3 000 sirenow. Po wulkej wodźe lěta 2002 bě swobodny stat komunam 1,3 miliony eurow za ponowjenje sirenow a za wutwar warnowanskeje syće přewostajił. Wot toho časa su 400 nowych sirenow zatwarili.
To a tamne (27.08.21)
Zwada wopačneje pizzy dla je so w badensko-württembergskim Waghäuselu namócnje skónčiła. Mějićel wobchoda biješe hosća z pizzowej łopaču na hłowu a skónčnje na zemi ležaceho z nožom mjezwoči zrani. Po wšěm zdaću njeje pizza hosćej hódź była.
Inscenacija dweju młodostneju za Instagram z wopačnej třělbu je w sewjerorynsko-westfalskim Bergheimje zasadźenje policije zawiniła. Žona bě policiju wo pozdatnje ćežko wobrónjenym poriku informowała. Zastojnicy přijědźechu z wjacorymi awtami a nańdźechu 14lětneho a 16lětnu při inscenowanju. Hrajkanska trělba bě mašinskej třělbje G36 chětro podobna. Młodostneju přepodachu staršimaj.
Liča z ćežkimi jednanjemi
Berlin (dpa/SN). Dosć wobćežne rozmołwy wočakuja dźěłarnistwa w přichodnym kole tarifowych jednanjow za přistajenych zjawneje słužby. Wšako su kasy zjawnych dźěłodawarjow koronakrizy a inflacije dla prózdne. Kaž dźěłarnistwo ver.di zdźěli, chcedźa w běhu dnja tarifowe žadanja wozjewić. Znate mjeztym je, zo chcedźa wurunanje za wobćežowanja korony dla wuwojować. Tarifowe jednanja su w oktobru a nowembru.
Incidenca snadnje přiběraca
Lipsk (dpa/SN). Sydomdnjowska incidenca w Sakskej snadnje přiběra. Po najnowšich informacijach Roberta Kochoweho instituta wučinja wona aktualnje 17,9 po wčerawšimaj 16,2. Strowotniske zarjady su institutej w běhu dnja 191 infekcijow a jedyn smjertny pad w zwisku z koronawirusom zdźělili. Na intensiwnych stacijach sakskich chorownjow lěkuja 20 pacientow. Po cyłym swobodnym staće maja 125 łožow na intensiwnych stacijach, hdźež na koronu schorjenych lěkuja.
Lědma zajim za paralympics
