Serbske plakaty za škit klimy
To a tamne (28.09.21)
Bjez toho zo by to wědźała je 91lětna na balkonje starownje w bayerskim Krumbachu hašišowu rostlinu plahowała. Sobudźěłaćerka doma bě podhladnu rostlinu wuhladała a policiju informowała. Wobydlerka bě dospołnje překwapjena, dokelž mjeno rostliny ani njeznaješe a wo zakazu plahowanja ničo njewědźeše. Hižo dlěši čas bě wona ju lubosćiwje wobstarała. Zastojnicy trjebachu wjele sćerpnosće, doniž jim seniorka rostlinu njepřepoda. Wróćo wšak ju njedóstanje.
W hornjopfalcskim Nabburgu je šěsćlětny hólčec swojeho dźěda wuchował. 59lětny sej nohu pod připowěšakom zatłusny, po tym zo bě so ze słomu nakładźene jězdźidło powaliło. Wnučk bě njezbožo wobkedźbował a alarmowaše pěškow, kotřiž na lěkarja zazwonichu. Dźěda dowjezechu ze złamanej nohu do chorownje. Bjez wnučka by wěc drje hórje wušła.
Poražka CDU w Zwjazku a kraju
Po wólbach zwjazkoweho sejma – AfD w Sakskej znowa najsylniša móc
Berlin (dpa/SN). SPD je wólby zwjazkoweho sejma ze snadnym předskokom dobyła. Po dotalnym stawje wuličenja su socialdemokraća z Olafom Scholzom najsylniša politiska móc w Němskej. Unija CDU/CSU je po 16 lětach knježerstwa kanclerki Angele Merkel nětko z Arminom Laschetom na čole historiske straty poćerpjeła. Najebać to žada sej tež Laschet nimo Scholza nadawk, knježerstwo wutworić směć. Wobaj prócujetaj so wo koaliciju ze Zelenymi a FDP.
Praša so za statusom cyrkwje
Berlin (B/SN). Za wěrjomnosću a statusom cyrkwjow w Němskej praša so přiběrajcy prelat a nawoda komisariata němskich katolskich biskopow w Berlinje Karl Jüsten. Tež cyrkej steji před dospołnje nowymi wužadanjemi, ale Jüsten je přiwšěm optimistiski, zo móže wona swój wid politice přeswědčiwje posrědkować. „Nimo powšitkowneje sekularizacije stej wěrjomnosć a status cyrkwje seksualnych znjewužiwanjow dla přiběrajcy do prašenja stajenej ... Mamy politice naše předstawy wo mandźelstwje a swójbje sylnišo sposrědkować“, wuzběhny 60lětny zastupjer Berlinskich biskopow napřećo katolskej powěsćerni KNA.
Nuncius namołwja k jednoće
SPD w Schwerinje wuspěšna
Schwerin (dpa/SN). SPD ministerskeje prezidentki Manuele Schwesig je so při wólbach krajneho sejma w Mecklenburgsko-Předpomorskej jasnje přesadźiła. Wona zdoby sej po dotalnym wólbnym wuslědku 39,6 procentow hłosow. Druha najsylniša móc je AfD ze 16,8 procentami. CDU zdoby sej 13,3 procenty, Lěwica 9,9 procentow. Zeleni su ze 6,3 procentami wotnětka zaso w krajnym sejmje zastupjeni, runje tak kaž FDP (5,8).
Giffey w Berlinje dobyła
Berlin (dpa/SN). Wólby Domu zapósłancow w Berlinje je SPD dobyła. Zwjazkowa stolica změje tuž prěni króć knježacu měšćanostku. Tole wuchadźa z dotalneho wólbneho wuslědka. SPD z načolnej kandidatku Franzisku Giffey docpě 21,4 procenty hłosow a tak hišće wjace hłosow hač Zeleni, kotřiž maja z 18,9 procentami swój dotal najlěpši wuslědk w Berlinje. CDU dósta 18,1 procent, Lěwica ma 14 procentow. AfD docpě wosom procentow, FDP 7,2. Wólbne wobdźělenje wučinješe w Berlinje 75,7 procentow.
Warnuje před radikalizowanjom
Kretschmer kritizuje uniju
Drježdźany (dpa/SN). Sakski ministerski prezident Michael Kretschmer (CDU) je zadźerženje unije na zwjazkowej runinje po wólbach zwjazkoweho sejma kritizował. „Wólbny wuslědk bě zemjerženje a je jasnu změnu nalady přećiwo CDU pokazał“, rjekny wón dźensa rano w sćelaku MDR. Tole dyrbjała strona jasnje přiznać. Tuž njemóže sej wón nastajenje w Berlinskim Adenauerowym domje rozkłasć, hdźež rěča wo nadawku k wutworjenju knježerstwa. „Tole wotpowěduje dotalnemu kursej, kotryž je k wulkim stratam unije wjedł a njeje hižo přichoda kmany“, tak Kretschmer. Kanclerski kandidat CDU Armin Laschet bě wčera rjekł, zo ma wólbny wuslědk za nadawk k wutworjenju knježerstwa, byrnjež jeho strona ze 24,1 procentom historisce spadnyła.
Wólbny wuslědk AfD w Sakskej připisuje Kretschmer zmylkam zwjazkoweje politiki předewšěm we wobchadźe z koronawirusom. Sakska je ludźom bliska była a so přećiwo zawrjenju šulow a pěstowarnjow wuprajiła. Tutón puć pak w Berlinje z nuzowym borzdźidłom skónčichu.
To a tamne (27.09.21)
Z 867 kilogramow ćežkim kirbsom je plahowar na mišterstwach w braniborskim Klaistowje prěnje myto dobył. Na Berlinsko-braniborskim wubědźowanju bě so wčera po informacijach zarjadowarja 87 plahowarjow a zahrodkarjow z 95 kirbsami wobdźěliło. Nimale 900 kilogramow ćežki kirbs plahowarja Olivera Gräfeho z wokrjesa Łobjo-Halštrow wuznamjenichu z mytom „Atlantic Giant“.
45 000 eurow škody zawinował je 82lětny šofer wosoboweho awta z Berlina, po tym zo bě pedalej płuna a borzdźidła zaměnił. Kaž policija informuje, dyrbi rentnar nětko z tym ličić, zo jeho kmanosć wodźenja awta přepruwuja. Muž bě na Rujanach w Binzu z parkowanskeho domu přijěł. Dokelž dawaše přewjele płuna, zrazy do na dróze parkowaceho awta. Swědcy wobkedźbowachu, zo rentnar po zražce přeco hišće płun dawaše.
Marko Suchy zastojnstwo złožił
Drježdźany (SN). Předsyda Rady za serbske naležnosće w Sakskej Marko Suchy je zastojnstwo srjedu złožił a da swoje čłonstwo w gremiju wotpočować. To bu na prěnim posedźenju rady po lěćnej přestawce wčera w rumnosćach krajneho sejma w Drježdźanach znate, kotrež nawjedowaše městopředsyda Marko Kliman, Chróšćanski wjesnjanosta. Wón předčita přitomnym radźićelam a zapósłancam list Sucheho, hdźež mjenuje předewšěm pobrachowacu podpěru dźěławosće serbskeje rady přez wotpowědne personelne a financne srědki. Tak po jeho słowach wuměnjenja za wuspěšne čestnohamtske dźěło gremija date njejsu. Marko Kliman nawodnistwo serbskeje rady nachwilnje přewozmje.
We wobsahowym dźělu rozłoži direktor Załožby za serbski lud Jan Budar aktualny staw kołowokoło strukturnych srědkow Zwjazka, kotrež maja wot klětušeho serbske projekty we wobłuku změny strukturow zmóžnić. Proces wobdźělenja zjawnosće ma so bórze zahajić.
Zhromadnje za łužiske projekty
Berlin/Zhorjelc (SN). Nadźija na bórzomny wutwar a elektrifikaciju železniskeju zwiskow Drježdźany–Budyšin–Zhorjelc a Berlin–Choćebuz–Běła Woda–Zhorjelc zaso přiběra. K tomu stej zwjazkowe ministerstwo za wobchad a digitalnu infrastrukturu a Swobodny stat Sakska wčera wozjewjenje wotpohlada podpisałoj. Wobaj projektaj železniskeho wobchada matej nowy, bóle realistiski projektowy format dóstać, zdźěli łužiski zapósłanc zwjazkoweho sejma Thomas Jurk (SPD). Zdobom dawa dokument wuhlady na zwjazkowe srědki za financowanje čary Drježdźany–Budyšin–Zhorjelc.
Tež rozšěrjenje awtodróhi A 4 na wosom resp. šěsć jězdnjow wot Nossena hač k pólskej mjezy je tam zakótwjene.
Puigdemont zajaty
Madrid (dpa/SN). Bywšeho šefa katalanskeho knježerstwa Carlesa Puigdemonta su na italskej kupje Sardiniska zajeli, wobkrući wčera jeho prawiznik Gonzalo Boye. Přičina toho je mjezynarodny wukaz zajeća přez Wyše sudnistwo Španiskeje. W Belgiskej bydlacy Puigdemont chcyše so dźensa na zetkanju njewotwisnych komunalnych politikarjow Sardiniskeje wobdźělić. Jako zapósłanc Europskeho parlamenta ma wón poprawom imunitu. Nětko leži na Italskej, kak dale postupować.
Rozjimanje nětko online
Podstupim (dpa/SN). Wjac hač 800 znapřećiwjenjow w zwisku z twarom Tesla-fabriki w Grünheidźe pola Berlina wot dźensnišeho online rozjimuja. Tři tydźenje braniborske wobswětowe ministerstwo za to planuje. Prěnje tajke rozjimanje bě loni w Erknerskej měšćanskej hali. Nětko je so krajny wobswětowy zarjad, kotryž ma twarej přizwolić, koronapandemije dla za digitalnu-wariantu rozsudźił. Za twar fabriki pobrachuje hišće wobswětoprawniska dowolnosć Kraja Braniborskeje.
Wukónc hišće njewěsty
