Drježdźany (dpa/SN). Sakska je po měnjenju dźěłarnistwa kubłarjow GEW lěpje hač loni na nowe šulske lěto přiho­towana – ale nic derje dosć. Hinak hač minjene lěto je mjeztym dosć móžnosćow testowanja, šćěpjenja a jednotnych rjadowanjow wužiwanja škitneho nahubnika, rjekny předsydka dźěłarnistwa Uschi Kruse wčera w Drježdźanach. Při­wšěm widźi wona tež kritiske dypki. Tak starosći so mjez druhim špatneje kwoty šćěpjenja w Sakskej dla a žada sej lěpši škit dźěći a młodostnych w šulach. Kruse skedźbnja w tym zwisku na tamne zwjazkowe kraje, kaž na Sewjerorynsko-Westfalsku, hdźež su ličby infekcijow z koronawirusom po zahajenju šulskeje wučby zaso jasnje přiběrali. Aktualnje wučinja incidenca w Sakskej 19,5. Spočatk šulskeho lěta 2020/2021 ležeše wona tu pod dwaj. Dźěłarnica nimo toho kritizuje, zo nimaja na šulach dosć připrawow, powětr filtrować, dokelž kultusowe ministerstwo w tym prašenju hišće waha. Póndźelu so za 494 500 holcow a hólcow w Sakskej zaso šula započnje.

Čłonojo Choćebuskeho lětadłoweho muzeja su minjenu sobotu z pomocu krana dwojotřěšnikej typa AN-2 zaso křidła přitwarili. Minjene měsacy su křidła znowa z płatom poćahnyli a wobarbili. Mašinu sowjetskeje konstrukcije běchu 1947 wu­wili. Wona wukonješe wot lěta 1957 słužbu. AN-2 je tuchwilu jenički lětacy jednomotorowy dwojotřěšnik. Tež parašutisća w Kopańcach (Neuhausen) jón wužiwaja. Mašina bě swój čas na lětanišću wójska NDR a Straußbergu zasadźena a steješe pozdźi­šo w Drježdźanskim armejowym muzeju. Kónc 1990tych lět přiwjezechu ju do Choćebuza. Płat křidłow dyrbja kóžde dźesać lět ponowić. Foto: Michael Helbig

Z překwapjenjom je so wčerawši rekordny pospyt w Zwickauwje skónčił: Na wšě 20 sportowčow město planowanych 19 je so do Trabanta 601 tłóčiło. Runje tři a poł mjeńšiny młode žony trjebachu, zo bychu do nutřkowneje a kófroweje rumnosće zalězli, tak zo móžachu durje awta začinić, kaž sej to předpisy žadaja. Rekord je tuž nětko zaso w Zwickauwje.

Z rekordnymi 305 km/h bě 23lětny na ilegalnym wubědźowanju awtow na awtodróze w Düsseldorfje po puću a je so při tym hišće sam filmował. Tam je spěšnosć poprawom na 120 km/h wobmjezowana. Filmowy material, z kotrymž běchu so wobdźělnicy wubědźowanja w interneće hordźili, je policija mjeztym zawěsćiła. Awtomatiske kamery awtodróhi su to tohorunja dokumentowali. 23lětnemu hrozytej pokuta 700 eurow a sćazanje jězbneje dowolnosće na tři měsacy.

Washington (dpa/SN). Po cofnjenju wojakow z Afghanistana je prezident USA Joe Biden daloko sahace konsekwency za přichodne wojerske zasadźenja připowědźił. „Dyrbimy ze swojich zmylkow wu­knyć“, rjekny Biden w Běłym domje. „Doba wulkich wojerskich operacijow, přerjadować druhe kraje, je nimo.“ Přichodne zasadźenja měli jasne a docpějomne zaměry měć a so na „zasadne narod­ne wěstotne zajimy“ USA koncentrować.

Heil: Wosobinske daty škitać

Berlin (dpa/SN). Zwjazkowy minister za dźě­ło Hubertus Heil (SPD) so přećiwo tomu wupraja, zo smědźa so dźěłoda­warjo swojich přistajenych prašeć, hač su přećiwo koronawirusej šćěpjeni. To dźěłowe prawo njedowola, praji Heil w dźensnišim rańšim magacinje telewizije ARD. „Je drje wažne, zo njestanu so zawody ze žórłami infekcijow. Njeńdźe pak, wosobinske daty wo strowotniskim stawje wšitkim spřistupnić.“ Zawody měli skerje pragmatiske rozrisanja nańć.

Wohenje dale cychnuja