Trump swěcu hasnył
Před něšto časom přirunowaše fachowc połoženje w Europje z lětom 1914. Tehdy knježeše wulka wójnska zahoritosć. Knježacy ludźom napowědachu, zo dyrbja ludy skónčnje na bitwišću wo swojim přichodźe rozsudźić. Wotpowědnje zahoriće wojacy do wójny ćehnjechu, dokelž běchu wo swojim dobyću kruće přeswědčeni.
Po zjawnej rozkorje mjez prezidentom USA Donaldom Trumpom a ukrainskim prezidentom Wolodymyrom Zelenskym w Běłym domje je swět naraz hinaši. Mi so zdawa, jako by Trump europskim wójnskim horliwcam swěcu hasnył abo kaž Němcy praja, tykačk wućahnył. „Stejimy bjez košle a cholowow“, rjekny jedyn z najzasaklišich zastupnikow wójnskeje politiki Roderich Kiesewetter (CDU) tele dny nowinarjam. Ludźo w Sakskej maja dobry čuch w tymle nastupanju. W zapadnej Europje knježi porno tomu wulka bjezradnosć. Politikarjam bych radźił: Štóž chce rady wojować, njech to čini abo swoje dźěći sćele. Marko Wjeńka
Wodźerjo nowe tramwajki zeznawaja
To a tamne (05.03.25)
Dźesać tonow kokaina su francoscy cłownicy w přistawje w Dunkerque sćazali. Tole je statne rěčnistwo wobkrućiło. Centrala za organizowanu kriminalitu je přepytowanja po hoberskej namakance w přistawje nad Sewjernym morjom přewzała. Wopojny jěd w hódnoće 320 milionow eurow běchu minjeny kónc tydźenja w kontejneru z južneje Ameriki našli. Dalše nadrobnosće njejsu znate.
Dyrbjał-li so tuchwilny trend pokročować, móhła so po najnowšim přepytowanju za 25 lět něhdźe třećina wšěch dźěći a młodych dorosćenych z nadwahu abo tučnym ćěłom bědźić. Najwjetši podźěl tołstych młodostnych wočakuja wědomostnicy w arabskim rumje. W Němskej móhło hač do 23 procentow potrjechenych być. Zwjazane je wuwiće z tójšto chorosćemi. Přičina je wužiwanje medijow a přiběrace zapadne zežiwjenje.
Miliardy eurow za brónjenje
Brüssel (dpa/SN). Prezidentka komisije EU Ursula von der Leyen je plan předstajiła, z kotrymž chcyła zakitowanje Europskeje unije sylnić a w tym zwisku hač do 800 miliardow eurow mobilizować. Wěstota Europy je na jara realne wašnje wohrožena, rjekny von der Leyen dźensa w Brüsselu. „Smy w fazy brónjenja a Europa je zwólniwa, swoje wudawki za zakitowanje masiwnje zwyšić“, wona rjekny. Planowany je fonds za zakitowansku industriju a za podpěru Ukrainje.
Bamž w akutnym stawje
Rom (dpa/SN). Strowotny staw bamža Franciskusa je so w chorowni zaso pohubjeńšił. 88lětny poćerpje wčera popołdnju „akutne zaprajenje dychanja“, Vatikan zdźěla. Hižo pjatk běchu jemu kumštnje při dychanju pomhać dyrbjeli. Wuhlady dalšeho wuwića su chětro njewěste. Franciskusa lěkuja wot srjedź februara w chorowni Gemelli w Romje. Wón ćerpi na zahorjenje płucow. Po wšěm swěće so wěriwi za njeho modla.
Gazaske pasmo zaso natwarić
W brazilskej metropoli Rio de Janeiro swjeća tele dny wjeršk ...
China šwika cła
Přepytuja njeskutk
Rozmołwy pod wulkim ćišćom
Berlin (dpa/SN). Zwada mjez USA a Ukrainu wuskutkuje so tež na rozmołwy mjez CDU/CSU a SPD k móžnemu wutworjenju noweho zwjazkoweho knježerstwa. Za dalšu pomoc na dobro EU wažne financne prašenja chcedźa tak spěšnje kaž móžno rozrisać – po móžnosći hišće do wjerška EU zajutřišim, štwórtk. Po prěnich sonděrowanjach minjeny pjatk su zastupnicy stron wčera wječor dale jednali. Tež dźensa běchu wuradźowanja předwidźane. „Nuznosć je z mojeho wida jara wulka“, rjekny předsyda CDU Friedrich Merz. Najebać časowy ćišć je tež předsyda SPD Lars Klingbeil zwólniwy, so hižo tutón tydźeń z CDU dojednać. Jutře móhli sej nawodźa stron ze zwjazkowym kanclerom Olafom Scholzom (SPD) dorěčeć, što štwórtk w Brüsselu předpołoža.
Na wjeršku EU chcedźa na zwadu mjez prezidentom USA Donaldom Trumpom a ukrainskim prezidentom Wolodymyrom Zelenskym reagować. Při tym póńdźe wo dalšu financnu a wojersku pomoc na dobro Ukrainy a wo zesylnjenje europskeho zakitowanja.
Kónc pomocy USA za Ukrainu
Prezident Donald Trump nuzuje Kijew k měrowym jednanjam
Washington (dpa/SN). Knježerstwo prezidenta Donalda Trumpa wojersku podpěru USA na dobro wot Ruskeje nadpadnjeneje Ukrainy nachwilnje přetorhnje. Wukaz prezidenta je hnydom płaćiwy. Trump z tym potwjerdźi, zo je jemu měr najwažniši, rěka z Běłeho domu. Pomoc tuž skónča, zo móhli wšitke dotalne naprawy pruwować a pohódnoćić. Něšto dnjow po eklaće při wopyće ukrainskeho prezidenta Wolodymyra Zelenskeho wukazana kročel USA změje bjezdwěla dramatiske sćěhi za Ukrainu.
Nowina New York Times rozprawja po informacijach zastojnikow knježerstwa, zo chcedźa z pomocu hakle potom pokročować, hdyž je so Ukraina k měrowym jednanjam z Ruskej zawjazała. To potrjechi brónje a municiju w hódnoće jedneje miliardy eurow, kotrež su hižo po puću do Ukrainy abo kiž su skazane. Trump bě so do swojeho wukaza z wonkownym ministrom Marcom Rubiom, wiceprezidentom D. J. Vancom a zakitowanskim ministrom Pete Hegsethom dorozumił.
