Po mysterioznej smjerći sławneho dźiwadźelnika USA a lawreata Oscara Gene Hackmana a toho mandźelskeje pyta policija dale za přičinami. Sherriff w Santa Fe w staće New Mexico ma wobstejnosće za dosć podhladne a je tuž wobšěrne přepytowanja wukazał. Durje bydlenskeho domu stejachu wočinjene, jako policija do domu zastupi. Hackman a jeho žona ležeštaj mortwaj we wšelakimaj rumnosćomaj. Pódla žony ležachu tablety.

Ćěkanje přez socialistisku Čěskosłowaksku do zapada měješe tele dny za muža z Němskeje 40 lět po tym hišće njelubozne sćěhi. Při snědani w hotelu w Českich Budějovicach jeho policija zaja. Sudnistwo města bě muža 1984 po toho wuspěšnym twochnjenju do zapada na lisćinu njewitanych ludźi zapisało. Po politiskim přewróće su prosće zabyli, tole změnić. Mjeztym su muža zaso pušćili.

Budyšin/Wojerecy (SN/MiR). Přichodny měsac přewjedu w Budyskim wokrjesu žónske akciske tydźenje 2025. Poskitki planuja wot 3. do 31. měrca pod hesłom „Měšej sobu!“. „Zarjadowanja zmóžnja zajimcam sej wšelakorosć žiwjenja a angažementa­ žonow wotkryć“, zdźěleja Madeleine­ Lenz, Sabrina Baumann a Korina­ Jenßen (społnomócnjene za runostajenje wokrjesa Budyšin, města Budyšin a Wojerecy) kaž tež Luise Baatzsch ze žónskeje iniciatiwy Budyšin z. t. Wone potwjerdźa, zo „steji měsac měrc dospołnje pod znamjenjom žonow“. Program pak njeměri so jenož na žony, ale tež na muži a zajimcow, kotřiž so mjez druhim z temami kaž towaršnostna změna a kulturna mnohotnosć rozestajeja. Wšako je zaměr akciskich tydźenjow, so za towaršnostne wobdźělenje, runoprawosć a widźomnosć žonow w mnohich žiwjenskich wobłukach zasadźić. A za to je trjeba so słowa jimać, sobu rěčeć a jednać.

Njebjelčicy (SN). Hač do dźensnišeho wječora w 23.59 hodź. móža so zajimcy jako wolerjo 2. Serbskeho sejma registrować. To je našemu wječornikej nawoda wólbneje komisije Siegfried Kühn na naprašowanje zdźělił. Digitalnje přizjewić móžeće so pod www.serbski-sejm-2024.de, potom dóstanjeće hnydom wotmołwu z mejlku, kotruž maće wobkrućić. Hač do 6. měrca w 18 hodź. dyrbja wupjelnjene hłosowanske lisćiki pola wólbneje komisije dóńć. Štóž najebać přizjewjenje hišće wólbne podłožki dóstał njeje, njech to zdźěli pod . Sobotu, 8. měrca, so wot 10 hodź. zjawne wuličenje hłosow z wozjewjenjom wuslědkow wotměje. K tomu přeprošuja wšitkich zajimcow do Njebjelčanskeje katolskeje Bjesady na Hłownej dróze 27. Serbski sejm zrozumi so sam jako demokratisce legitimowane ludowe zastupnistwo Serbow a zasadźuje so za zjawnoprawnisku korporaciju serbskeho ludu a nutřkowne samozarjadnistwo, wosebje w kubłanju a kulturje. Woni so złožuja na artikl 1 ciwilneho pakta UN, po kotrymž maja wšitke ludy prawo na samopostajowanje.

Drježdźany (dpa/SN). Sakska AfD pyta po swojim wuspěchu we wólbach zwjazkoweho sejma rozmołwu z CDU a chce wohnjowu murju potorhać. „Předsyd­stwje sakskeje AfD a sakskeje CDU dyrbjeli zhromadnje a zamołwiće bjez kóždeje wohnjoweje murje wo přichodźe swobodneho stata wuradźować. To je jasny nadawk našich wobydlerjow“, piše generalny sekretar AfD Jan Zwerg w zjawnym lisće swojemu koleze w CDU Tomej Ungerej. AfD je we wólbach 23. februara w Sakskej 37,3 procenty docpěła, CDU 19,7.

Stawki na lětanišćomaj

Mnichow (dpa/SN). Warnowanskich stawkow dla wočakuja pasažěrow na lětanišćomaj w Mnichowje a Hamburgu dźensa a jutře šmórnjene zwiski a za­pozdźenja. Dźěłarnistwo ver.di je přistajenych do warnowanskeho stawka namołwjało. Tak chcedźa w tarifowych jednanjach ćišć na dźěłodawarjow wukonjeć. Tež w druhich městach planuja stawki, mjez druhim w Erfurće a Essenje.

Ćěła zastajencow přepodali