Wólbne prawo změnić?
Merz a Scholz sej přezjednaj
Berlin (dpa/SN). Zwjazkowy kancler Olaf Scholz (SPD) a kanclerski kandidat CDU/CSU Friedrich Merz sej wobaj žadataj, zo maja ludźo ze sankcijemi ličić, kotřiž dźěłać nochcedźa a přiwšěm wobydlerski pjenjez dóstawaja. Scholz drje přizna, zo tajkim nětko hižo skrótšenje wukonow hrozy. Přiwšěm měli so sankcije přiwótřić, wón wčera w telewizijnym duelu wuswětli. Merz tohorunja wuzběhny, zo njeje stat zwólniwy, tutu situaciju hižo dlěje akceptować.
Scholz chce potrjechenym zjawnje spěchowane poskitki za dźěło namjetować. Tak móhli dopokazać, zo so něchtó po wšěm zdaću před dźěłom tłóči. Merz tónle model wotpokaza. Čehodla dyrbi to być, hdyž je 700 000 dźěłowych městnow w Němskej tuchwilu njewobsadźenych? „Čehodla Scholz stajnje zaso wo zjawnym spěchowanju rěči a hišće wjace pjenjez za skomoleny system wudawać chce“, so Merz prašeše.
Dalše temy duela w telewiziji běchu mjez druhim migracija, dawki, inwesticije a poćah k AfD.
Despot nawjeduje kraj
Demokraća w USA starosća so wo swoju demokratiju
Washington (dpa/SN). Donald Trump wšitke wočakowanja přetrjechi. Swět je so na chaos z nowym prezidentom USA nastajił, tola razantna spěšnosć, z kotrejž wón agěruje, ludźi po cyłym swěće šokuje. Trump je něhdźe měsac w zastojnstwje a demokraća hižo warnuja, zo je w USA demokratija wohrožena a zo diktatura hrozy. 78lětny jedna kaž despot a wodźi kraj do awtokratije.
Tele dny je prezident wozjewił: Štóž swój kraj wuchowa, zakoń njezrani. Citat drje to wot Napoleona, kotryž je so sam ke kejžorej Francoskeje pomjenował. Słowa su wulku kedźbnosć zbudźili. Tež norwegski prawicar – terorist Anders Behring Breivik je citat do swojeho dołheho manifesta zapřijał, prjedy hač bě w lěće 2011 cyłkownje 77 ludźi morił.
Trump přećel Putina?
To a tamne (20.02.25)
Njeznaći su sydom ćelatow z hródźe w Arzbergu pokradnyli. Skućićeljo su so w nocy do zymskeho kwartěra skoćatow zadobyli, zdźěli policija w Lipsku. Cyłkowna hódnota ćelatow wučinja wjace hač 2 000 eurow.
Ryby su mudre. Tole zwěsćichu nětko wědomostnicy Max-Planckoweho instituta za biologiske zadźerženje w Konstanzu. Při slědźenju na kupje Korsika bě wědomostnikam napadnyło, zo jim wěste ryby při nurjenju sćěhowachu a picu spakosćichu, kotraž bě poprawom jako mytowanje za wuspěšne pospyty postajena. Zadźiwani zwěsćichu, zo přewodźachu ryby bjezwuwzaćnje ludźi, wot kotrychž su hižo raz chłóšćenki dóstali.
Měrowa iniciatiwa běše hósć BSW
Zastupjerjo serbskeje iniciatiwy za měr w Ukrainje su wolóženi, zo skónčnje wo tym jednaja, pokročowanju morjenja zadźěwać. Zdobom su w zwjazkowym sejmje wo iniciatiwje rěčeli.
Berlin/Budyšin (SN/mb). Zapósłanča Żaklin Nastić witaše njedawno zastupjerjow serbskeje iniciatiwy za měr w Ukrainje, Hajka Kozela a Cyrila Pjecha, samo kašubsce do rumnosće skupiny Zwjazka Sahry Wagenknecht – rozum a sprawnosć (BSW). Nastić, něhdyša krajna předsydka Lěwicy w Hamburgu, ma pólske, němske, kašubske a židowske korjenja. Wona dźěła za BSW mjez druhim w zakitowanskim wuběrku zwjazkoweho sejma.
Warnowanske stawki zahajili
Drježdźany (dpa/SN). Po njewuspěšnych tarifowych jednanjach za sobudźěłaćerjow zwjazka a komunow chcychu potrjecheni dźensa w Drježdźanach stawkować. Dźěłarnistwo verdi je k tomu namołwjało. Planowane bě, zo so mjez druhim sobudźěłaćerjo měšćanskeho zarjada, klinikuma města a dalšich posłužbow na stawkach wobdźěla. Dotal njejsu dźěłodawarjo hišće žadyn poskitk předpołožili. Přichodne dny stawkuja na mnohich dalšich městnosćach.
Ludźo starosća so bamža dla
Rom (dpa/SN). Po nowej diagnozy chorosće bamža Franziskusa, so dale a wjac ludźi wo njeho starosći. W běhu přepytowanjow zwěsćichu lěkarjo Gemelli chorownje w Romje, zo stej płuca zahorjenej. Chorosć je chětro kompleksna, w zdźělence dale rěka. Před chorownju dale a wjac zastupjerjow medijow na nowe powěsće ze stron lěkarjow čakaja. Tež wěriwi so tam zetkaja a so za wustrowjenje bamža modla. Po informacijach swojeho rěčnika, měješe bamž měrnu nóc.
Identifikacija drje dlěje traje
