Wjeršk na dobro inwesticijow
Berlin (dpa/SN). Zwjazkowy kancler Friedrich Merz (CDU) je so dźensa ze zastupnikami předewzaćow w kanclerskim zarjedźe na „inwesticiski wjeršk“ zetkał. Při tym dźěše wo to, zawody pohnuć, po třoch lětach hospodarskeje stagnacije zaso w Němskej inwestować. Po informacijach medijow bě mjez něhdźe 30 prošenymi firmami wjace hač dźesać tajkich, kiž su na bursy zapisanych. Woni chcychu Merza wo swojej iniciatiwje „Made for Germany“ informować.
Předsyda FDP Christian Dürr kritizuje wjeršk pola zwjazkoweho kanclera Merza jako „krótkodobnje inscenowane PR-zarjadowanje z wuzwolenymi koncernami, kotřiž so ze swojimi tak a tak planowanymi inwesticijemi hordźa“.
China hrozy EUz naprawami
Peking (dpa/SN). Něšto dnjow do wjerškoweho zetkanja mjez Europskej uniju a Chinu je Peking z přećiwnymi naprawami na paket sankcijow Brüssela reagował. EU je najebać wospjetne wobmyslenja chinske předewzaća do 18. paketa sankcijow přećiwo Ruskej zapřijała a chinskej financnej institutaj za „wumyslene wumjetowanja“ chłostała, kaž ministerstwo za wikowanje w Pekingu zdźěla. China tole raznje wotpokazuje a zahaji naprawy, zo by prawa swojich zawodow a financnych institutow škitała, Peking zdźěla.
Brüssel bě ruskeje wójny přećiwo Ukrainje dla minjeny pjatk nowe sankcije schwalił. Potrjechene su tež chinske předewzaća, kotrež dale z Ruskej wikuja.
Weidel podwojenje přiražki zakituje
Berlin (dpa/SN). Předsydka AfD Alice Weidel je podwojenje popłatkow za sebje a dalšich wodźacych čłonow frakcije zwjazkoweho sejma zakitowała. Po nimale wosom lětach je strona mzdu předsydow a čłonow předsydstwa na normalny niwow druhich frakcijow a stron pozběhnyła, rjekny wona w lěćnym interviewje sćelaka ARD. Strona AfD je wot lěta 2017 w zwjazkowym sejmje zastupjena.
Kónc junija bě rešerša powěsćoweho portala t-online wotkryła, zo je frakcija AfD přiražki za wobeju předsydow Alice Weidel a Tina Chrupallu kaž tež za dalšich čłonow frakciskeho předsydstwa podwojiła. Nimo normalneje diety zwjazkoweho sejma 12 000 eurow dóstanjetaj Weidel a Chrupalla nětko přidatnje 12 000 eurow za swoju wodźacu funkciju. Weidel argumentowaše, zo je strona wólbny wuslědk wot lěta 2017 podwojiła.
Zeleni płaća frakciskimaj předsydkomaj přidatnu přiražku 6 000 eurow. Lěwica jednaćelce žane přiražki njepłaći. Frakciji CDU/CSU a SPD swoje přiražki za předsydow dotal njewozjewjatej.
Wosebitosć wobchować
Rubjene objekty nacijow našli
To a tamne (21.07.25)
Bananu, kotraž bě z lěpjacym banćikom při wuměłskej mólbje w Centre Pompidou w francoskim Metzu přičinjena, je nižozemski wopytowar zjědł. Banana wisaše tam wot 8. meje a bě dźěl sławneje wuměłskeje twórby „Comedian“ italskeho wuměłca Maurizia Cattelanana. Tuta je šěsć milionow eurow hódna, muzej zdźěla. Bananu su spěšnje narunali. Nižozemjan nowinarjam rjekny, zo je tajku drohu bananu raz woptać chcył.
Winowatostnu płuwansku wučbu na zakładnych šulach Němskeje žada sej Lěwica. Hladajo na přiběracu ličbu zatepjenych je tole nuznje trěbne, strona zdźěla. Wona je mjeztym akciski plan předstajiła. Dalše žadanja su mjez druhim inwesticiski program na dobro kupjelow a wjace personala. Nimo toho měł zastup do kupjelow „wšudźe a trajnje“ za dźěći a młodostnych zapłaćomny być.
Merz žurnalistam wotmołwjał
Berlin (dpa/SN). Friedrich Merz je dźensa na tradicionalnej lěćnej nowinarskej konferency zwjazkoweho kanclera na prašenja žurnalistow wotmołwjał, kotřiž w zwjazkowej stolicy skutkuja. Jedna z temow běchu před tydźenjom zwrěšćene wólby sudnicy za Zwjazkowe wustawowe sudnistwo. Dalše temy běchu wójna w Ukrainje, cłowna zwada z USA, dawk za milinu a etat EU. Na zarjadowanju Zwjazkoweje nowinarskeje konferency njejsu temy wobmjezowane.
USA hroža ze sankcijemi
Washington (dpa/SN). Běły dom je wot prezidenta USA Donalda Trumpa wukazane sankcije přećiwo wikowanskim partneram Ruskeje po 50 dnjow trajacym ultimatumje potwjerdźił. Rěčnica knježerstwa Karoline Leavitt rjekny, zo chcedźa USA wšitkim krajam, kotrež ruski zemski wolij kupuja, sankcije napołožić, njedyrbjało-li w běchu postajeneho čas k přiměrej a měrowym jednanjam w Ukrainje dóńć. Póndźelu bě Trump wikowanskim partneram Ruskeje z cłami hač do sto procentow hrozył.
Israel nadpad wobžaruje
Němski kolesowar Florian Lipowitz je wulka překwapjenka lětušeje ...
Wotsunjeni po puću do Kabula
Berlin (dpa/SN). Druhi króć po tym, zo su talibanojo w awgusće 2021 w Afghanistanje móc přewzali, je Němska afghaniskich staćanow do jich domizny wotsunyła. Lětadło z 81 ludźimi je dźensa z Lipska wotlećało, rěčnica zwjazkoweho nutřkowneho ministerstwa zdźěla. Pasažěrow běchu z wjacorymi busami na lětanišćo dowjezli. Krótko po 7 hodź. prěni z nich do mašiny předewzaća Qatar-Airways zalězechu. Znajmjeńša jedyn z nich měješe noze sputanej. Po informacijach ministerstwa jedna so wo ludźi, kotřiž su w Němskej chłostajomne njeskutki skućili a kiž dyrbja kraj wopušćić.
Němska nima žadyn diplomatiski zwisk k talibanam w Kabulu. Katar skutkuje nastupajo wotsunjenje jako posrědnik.
Trump akty wozjewi
Washington (dpa/SN). Tak mjenowaneje afery Epstein dla pod ćišćom stejacy prezident USA Donald Trump chce po swójskich wuprajenjach někotre juristiske podłožki w padźe zemrěteho seksualneho złóstnika wozjewić. „Hladajo na hobersku kedźbnosć, kotruž zjawnosć Jeffreyjej Epsteinej wěnuje“ je wón generalnu statnu rěčnicu Pam Bondi prosył, „wšě relewantne wuprajenja“ přepytowanskeje komisije zjawnje spřistupnić.
Trump bě we wólbnym boju připowědźił, zo chce wšitke podłožki w padźe Epstein předpołožić. Dźe wo złóstnistwa znjewužiwanja a wumocowanja małolětnych holcow, kotrež bě Epstein organizował. Po rešeršach medijow słušeše tež Trump do kruha prominentnych, kotřiž běchu so na partyjach Epsteina wobdźělili. Epsteina běchu 2019 zajeli a krótko po tym wobwěsnjeneho w jastwowej celi namakali. Po oficialnych informacijach bě sej wón žiwjenje wzał.
