Berlin (dpa/SN). Zwjazkowe wustawowe sudnistwo je skóržbu přećiwo zasadźenju wobrónjenych trutow z USA z wojerskeho zepěranišća Ramstein w Pfalcy wotpokazało. Zwjazkowe knježerstwo měni, zo je sudnistwo dotalne stejišćo knježerstwa wobkrućiło. Zdobom je sudnistwo wopodstatniło, zo ma Berlin hladajo na winowatosć zachowanja prawa ludow ze stron třećich statow wěste swobody, rěčnica knježerstwa zdźěli. Sudnistwo měni, zo je Němska drje powšitkownje zamołwita za zachowanje čłowjeskich prawow, nic jenož w tu-, ale tež we wukraju. Konkretna winowatosć pak z toho njewurosće. Skoržiłoj běštaj Jemenjanaj, kotrajž běštaj 2012 při nadpadźe trutow USA wjacorych swójbnych zhubiłoj.

Brüssel (dpa/SN). Wonkowni ministrojo čłonskich krajow Europskeje unije njejsu so na nowy paket sankcijow přećiwo Ruskej dojednali. Po wuradźowanjach w Brüsselu je społnomócnjena EU za wonkowne naležnosće Kaja Kallas zrudźena, zo njeje so zhromadny rozsud zešlachćił. Dźensa chcychu dale wuradźować a so snano rozsudźić.

Kallas kritizowaše na nowinarskej konferency wosebje Słowaksku jeje blokady dla. Kraj žada sej zarunanje za straty, kotrež nastanu, jeli EU import ruskeho zemskeho płuna woprawdźe skónči. Słowakska je při zastaranju hospodarstwa a swojich wobydlerjow na ruski zemski płun wusměrjena.

Kallas rjekny, zo je Europska komisija wšitke žadanja Słowakskeje spjelniła. Słowakski ministerski prezident Robert Fico ma dotalne připrajenja EU porno tomu za njedosahace.

Nimo Słowakskeje ma tež Malta wobmyslenja naprawow dla, z kotrymiž chce EU dochody Ruskeje z předawanja wolija znižić. Kraj wobsedźi tójšto tankowcow, kotrež wolij transportuja. Łódźe móhli potom prózdne stejo wostać.

Kaž błysk z módrych njebjes dóńdźe powěsć wo zazběhu produkcije noweho, mjenje abo bóle serbskeho hrajneho filma w redakcijach medijow Łužicy. Byrnjež so „jenož“ wo takrjec studijny projekt jednało, runja so ambicije na přikład wotpohladej syće Łužycafilm a labela Lusatiafilm, mjenujcy produkcija wječory pjelnjacych paskow w regionje z akterami wottud a prezentowanje tutych na wulkej płachće. Zo tomu Filmowa akademija w Zhorjelcu polěkuje je runje tak kedźbyhódne kaž dopóznaće, zo móžeš tendencielnje najdróšu formu wuměłstwa tež bjez institucionalneho spěchowanja zwoprawdźeć. Njech žněje „Nykus“ znajmjeńša tak dobry wothłós kaž epizodowy film „Ein Feuerwerk für die Kleinstadt“, kotryž bu pod po­dobnymi wuměnjenjemi realizowany. Na kóždy pad dopokaza planowany mystery-thriller, zo je angažement, kotremuž dźensa „intrinsiska motiwacija“ rěkaja, najwažniši faktor w kreatiwnym hospo­darstwje. Bosćan Nawka

Dalejězbu ćaha je žona w Hessenskej skomdźiła. Jako dyrbješe regionalny ćah čerwjeneje swěcy dla pozastać, bě wona ze swojim psom wustupić šła. Po tym zo bě signal zaso zeleny a ćah wotjěł, steješe žona ze Šwedskeje ze swojim psom hišće na łuce při kolijach. Dalši ćah, kotryž dyrbješe tohorunja čakać, žonu sobu wza. Na dwórnišću w Fuldźe nječakaše jenož mandźelski, ale tež policija.

Dokelž staj sławny štom Robina Hooda ilegalnje pušćiłoj, dyrbitaj mužej w Jendźelskej wjacore lěta do jastwa. Sudnistwo w Newcastlu zasudźi kóždeho za štyri lěta a tři měsacy do jastwa. Njeskutk měješe „wulke socialne wuskutki“, sudnica rjekny. Worakawstwo 32- a 39lětneho bě we Wulkej Britaniskej a po wšěm swěće zludanje zbudźiło. Wobaj běštaj sto lět staru kulisu mnohich filmow w septembru 2023 podrězałoj.