Kónc tydźenja wjele wobchada
Mnichow (dpa/SN). Přichodny kónc tydźenja nadróžny wobchad na awtodróhach Němskeje zaso masiwnje přiběra. W Bremenje, Delnjosakskej, Hessenskej, Porynsko-Pfalcy, Posaarskej kaž tež na juhu Nižozemskeje započinaja so prózdniny. W Sakskej, Saksko-Anhaltskej a Durinskej su hižo prózdniny. Při rjanym wjedrje drje mnozy wulětnicy dróhi přidatnje zatykaja. Wosebje potrjechene su dróhi k morju, do horow a k jězoram. Tuchwilu je na awtodróhach Němskeje cyłkownje 1 200 twarnišćow.
Najwjetše haćenja hroža pjatk popołdnju, sobotu dopołdnja a njedźelu popołdnju. Štóž je fleksibelny, njech wužiwa měrnišu póndźelu abo wutoru za jězbu, po móžnosći nic za čas powołanskeho wobchada.
Na čarach do směra na juh hroža po dotalnych nazhonjenjach najsylniše haćenja. Strach haćenjow wobsteji před wšěmi tunlemi pod Alpami, ale tež na Brennerowej awtodróze z Awstriskeje do Italskeje, dokelž tam móst ponowjeja. Šoferojo po puću do Prahi njech so na to nastaja, zo na čěskim boku wjacore tunle awtodróhi D8 do směra na čěsku stolicu wuporjedźa.
To a tamne (03.07.25)
Wulka horcota je za železnicu techniske defekty a zapozdźenja zawiniła. Najčasćišo bědźachu so sobudźěłaćerjo ze sćehnjenymi wuhibkami a horcymi motorami. Sapace słónco bě wocl kolijow zezhibowało. Motory ćahow njejsu so dosć chłódźili a su wupadnyli. Nimo toho so podłu kolijow stajnje zaso kerčiny palachu, štož zawrjenje čarow zawinowaše – mjez druhim w Delnjosakskej, Saksko-Anhaltskej a w Hamburgu.
Přepjany, zo móhł do awta zalězć, bě muž w Jenje. Swědkojo prócowanja 33lětneho wobkedźbowachu a policiju informowachu. Jako zastojnicy přijědźechu, njebě muž přeco hišće dale. Policisća zwěsćichu, zo je wón z awtom hač tam dojěł a při zaparkowanju druhe awto wobškodźił. Alkoholowemu testej pak so muž zasakle spjećowaše. Skónčnje jeho sputachu a na stražu sobu wzachu.
Rěča wo dawku na milinu
Berlin (dpa/SN). Wodźacy zastupnicy CDU/CSU a SPD su dźensa w koaliciskim wuběrku wo móžnym zniženju dawka na milinu za priwatne domjacnosće wuradźowali. Zwjazkowy kancler Friedrich Merz je do zahajenja posedźenja nadźiju na rozrisanje zbudźił: „Jeli móžemy wjace za priwatne domjacnosće wuzbytkować, potom to činimy“, rjekny předsyda CDU w sćelaku ARD. Hłownje wuradźuja wo tym, kak zniženje dawkow za domjacnosće a industriju ze stron stata wurunaja.
EU předstaja klimowe zaměry
Brüssel (dpa/SN). Komisija EU dźensa swój namjet za zawjazowacy klimowy zaměr hač do lěta 2040 předstaješe. Kaž bě hižo do toho z naćiska znate, maja čłonske kraje EU produkciju maćiznow, kotrež klimje škodźa, přirunujo z lětom 1990 wo znajmjeńša 90 procentow znižić. Móžne su pak tež mjezynarodne projekty za zniženje wuhlikoweho dioksyda. EU chce po swójskich wuprajenjach hač do 2050 klimoneutralna być.
Pušćenje İmamoğla sej žadali
Wulke wentilatory wochłódźuja konje, jěcharjow a publikum při ...
Israel přiměrej w Gazy přihłosuje
Macron a Putin telefonowałoj
Symbolowa politika
Nalada w industriji jasnje špatniša
Drježdźany (dpa/SN). Nalada w zawodach na wuchodźe Němskeje je so po informacijach Drježdźanskeho instituta Ifo w juniju snadnje pohubjeńšiła. Woprašane předewzaća pohódnoćichu swoje połoženje wo něšto špatnišo hač měsac do toho a znižichu swoje hospodarske wočakowanja přirunujo z meju.
W industriji je so nalada w juniju jasnje pohubjeńšiła, institut zdźěla. Hospodarske połoženje wobhladuja tam wo tójšto špatniše hač měsac do toho. Za to su wočakowanja do přichoda ćim lěpše. Posłužbowy wobłuk zhladuje trochu lěpje do přichoda, twarske firmy porno tomu špatnišo.
Mjez wikowarjemi je wobraz rozdźělny. Wulke wikowanske předewzaća posudźuja połoženje nastupajo wuwiće přichodneho časa lěpje hač hišće w meji. Małe wobchody njejsu spokojom a nimaja tež přewulke nadźije do přichoda.
Posudk Ifo złožuje so na měsačnje wozjewjene ličby 1 700 zawodow předźěłaceho a posłužboweho wobłuka, wikowanja a twarstwa. Firmy su prošene, swoje połoženje posudźować, a wočakowanja za přichod formulować.
Přehladka wo nabožinach w Slepom
Ličba potrěbnych spochi přiběra
Drježdźany (dpa/SN). Ličba hladanja potrěbnych w Sakskej spochi přiběra. W běhu dźesać lět je so ličba wjace hač podwojiła. Tole wuchadźa z wotmołwy socialneho ministerstwa na naprašowanje zapósłanče Lěwicy Susanne Schaper w krajnym sejmje. Tak dósta w lěće 2013 dokładnje 149 461 ludźi pjenjezy hladanskeho zawěsćenja. Dźesać lět pozdźišo bě jich 363 243 ludźi. To je rozrost 143 procentow. „Lěto wob lěto přidružeja so jeničce w Sakskej dźesaćitysacy“, Schaper wudospołni. Situacija so tak spěšnje njezměni. Najwjetši podźěl hladanja přewozmu přiwuzni. „Woni zasłužeja sej wjace podpěry a měli prawo měć, so wot powołanja wuswobodźić kaž tež nawróćić směć“ sej wona žada.
Schaper bě sej tež ličby personala w hladarnjach wuprosyła. Tam maja wjace sobudźěłaćerjow: Lěta 2015 měješe branša 83 000 hladarjow, 2023 hižo 98 700. Runočasnje pak je ličba njewobsadźenych městnow wot 27 444 na 39 492 rozrostła. Wulki problem wostanje tež swójski pjenježny podźěl w hladarnjach, kotryž wučinja mjeztym hač do 3 000 eurow měsačnje.
