Njeskutki přiběraja
Berlin (B/SN). Njeskutki přećiwo cyrkwjam su w lěće 2024 wo 21 proc. porno 2023 přiběrali, přećiwo mošejam wo 13 proc., kaž ze statistiskeho zapisa zwjazkoweho nutřkowneho ministerstwa wuchadźa. Powšitkowne nadběhi na nabožne zhromadźenstwa wučinjachu 11 proc. 7 504 njeskutki měrjachu so na politiskich reprezentantow, mjez nimi bě 5 554 antisemitiskich a 1 679 antiislamskich padow.
Prědowanja přepytował
Erlangen (B/SN). Prědowanja w mošejach Němskeje je islamski wědomostnik Jörn Thielmann přepytował. Wón zwěsći, „zo jedna so wo dospołnje akceptabelne wobsahi“, a wobžarowaše, zo medije a politikarjo njeregistruja, „zo na prědowanjach přitomnych wobstajnje k cyłotowaršnostnemu angažementej pohonjeja.“ W srjedźišću prědowanjow steja wšědny dźeń, spiritualnosć a towaršnostny angažement.
Za mnohotnosć wěry
Bórze wjace atomowych brónjow
Stockholm (dpa/SN). Minjene lětdźesatki woteběraca ličba atomowych brónjow na swěće móhła po posudźowanju měrowych slědźerjow prěni króć zaso přiběrać. Po wšěm swěće so składy jadrowych brónjow modernizuja, wobstejace brónje so polěpšuja a z nowymi wudospołnjeja, kaž měrowy slědźenski institut Sipri zdźěla. Dźewjeć krajow ma atomowe brónje: Ruska, USA, Wulka Britaniska, Francoska, China, Indiska, Pakistan, Sewjerna Koreja a Israel.
Dalše zajeća wukazał
Washington (dpa/SN). Prezident USA Donald Trump je napjatu debatu swojeje migraciskeje politiki dla hišće dale přiwótřił. Republikan je zarjadej za zapućowanje ICE kazał, zajeća a wotsunjenja wosebje w metropolach Los Angelesu, Chicagu a New Yorku, hdźež demokraća knježa, rozšěrić. Zastojnicy měli „wšitko činić“, zo bychu „najwjetše masowe wotsunjenje w stawiznach kraja“ zwoprawdźili, wón rjekny.
Macron poboku Grönlandskeje
Protesty přećiwo prezidentej USA Donaldej Trumpej a toho ...
Na Mallorce znowa protestowali
Płaćizny energije wobmjezować
Israel hrozy wobydlerjam Teherana
Tel Aviv (dpa/SN). Po nowych smjertnych raketowych nadpadach Irana na israelske města je zakitowanski minister Israel Katz wjećbu připowědźił. „Hubaty diktator z Teherana je so k mordarjej wuwił, kotryž zaměrnje na israelskich ciwilistow třěla“, piše Katz internetnje. „Wobydlerjo Teherana tole zapłaća – a to bórze.“ Israel nadběhuje wot minjeneho pjatka objekty w Iranje, mjez nimi atomowe připrawy, zepěranišća wójska a wolijowe zawody. Mjez woporami su wodźacy zastupnicy wójska a atomowi wědomostnicy.
Při nowych raketowych nadběhach Irana na israelske města je znajmjeńša wosom wobydlerjow žiwjenje přisadźiło. 92 ludźi so zrani. Z tym je ličba morjenych ludźi w Israelu wot pjatka na 23 rozrostła. Po informacijach pomocnikow su štyri iranske rakety w Tel Avivje rozbuchnyli. Detonacije načinichu wěcnu škodu. W Petach Tikava pola Tel Aviva su třo wobydlerjo zemrěli, jako raketa do škitneje rumnosće zrazy, do kotrejež běchu sej wućeknyli. Ludźo su namołwjeni, w bunkrach škit pytać.
Wočakowanja na wjeršk snadne
Zetkanje sydom wodźacych industrijnych krajow G7 w Kanadźe
Kananaskis (dpa/SN). Pod wliwom noweje wójny na Bliskim wuchodźe zahaja dźensa w Kanadźe prěnje wjerškowe zetkanje skupiny sydom wodźacych industrijnych krajow swěta G7 po nawróće Donalda Trumpa do Běłeho domu. Wčera wječor je Trump jako posledni z wobdźělnikow w Calgary přizemił. Dźensa měješe wón na dźěłowym posedźenju w hórskim městačku Kananaskis wo swětowej hospodarskej politice přednošować.
Zetkanja G7 maja poprawom zaměr, jednotnu liniju mjez wobdźělnikami nańć. Njewěstosć a konfliktny potencial mjez wobdźělnikami pak stej tak wulkej – wosebje hladajo na wójnu w Ukrainje a na eskalaciju w Bliskim wuchodźe – zo zwoprědka žane dojednanje njewočakowachu. Tuž tež žanu zhromadnu kónčnu deklaraciju zetkanja přihotowali njejsu. Wo wažnych temach chcedźa najebać to rěčeć. Za zwjazkoweho kanclera Friedricha Merza (CDU) je to prěnje wulke mjezynarodne wužadanje. Wón chce tohorunja k přitomnym porěčeć.
Wšitcy wobdźěleni byli
Hoberske napinanja a wulka próca Chróšćanow při přihotach wulkeho jubileja k 800. róčnicy prěnjeho naspomnjenja wsy su so zadanili. Wosebje wočiwidne bě zasadźenje wjesnjanow za „swój jubilej“ wčera na swjedźenskim ćahu po wsy. Cyłe swójby běchu do jednotliwych wobrazow zapřijate a swoju rólu ze samozrozumliwej hordosću wupjelnichu. Wulka ličba towarstwow w ćahu bě wuraz žiweje wjesneje zhromadnosće. Haj, samo rjadniske sotry klóštra Marija hwězda njeběchu sej přeškoda, w ćahu sobu běžeć. Někotryžkuli wopytowar je so zawěsće prašał, hač drje by tajki bohaty přećah tež w jeho wsy móžny był.
Dobru naladu wuprudźachu Chrósćicy hižo sobotu na dworach, hdźež so bohatosć wjesneho žiwjenja nazornje wotbłyšćowaše. Rjany swjedźenski stan wosrjedź wsy bě dostojny symbol wjerška. Swjatočnosće 800. jubileja wsy njech zańdu jako wusahowacy podawk do Chróšćanskich stawiznow. Marko Wjeńka
Wosebity kulturny wjeršk zahajeny
To a tamne (16.06.25)
Ćopłu kołbasku sej skazawši je so pjany šofer wosoboweho awta w Eilenburgu na sewjeru Sakskeje sam přeradźił. Swědkej w tankowni bě napadnyło, zo so 46lětnemu mužej jazyk chětro ćežko wjerći. Jako muž z kołbasku w ruce ze swojim awtom dale jědźeše, zawoła swědk policiju. Zastojnicy muža zadźeržachu a 1,8 promilow alkohola naměrichu. Jězbnu dowolnosć na městnje sćazachu.
Jendźelski narodny kopar David Beckham budźe na ryćerja powyšeny. Po wjelelětnym čakanju jemu kralowski dwór wysoku česć spožči. 50lětnemu koparskemu idolej je tole wulke wuznamjenjenje, wo kotrymž je dołho sonił a kiž je tež za jeho swójbu wulki „emocionalny wokomik“, Beckham nowinarjam přeradźi. Za jeho zasłužby za Wulku Britanisku spožča jemu titul ryćerja wosebiteho rjadu „Knight Bachelor“.
