Pistorius namołwja k sćerpnosći
Berlin (dpa/SN). Zakitowanski minister Boris Pistorius (SPD) je před tym wojersce nadměrnym reagowanjom na zaměrne prowokacije ze stron Ruskeje warnował. Na zetkanju ze swojim šwedskim kolegu Pålom Jonsonom w Berlinje rěčeše Pistorius wo „paslach eskalacije“. „Tutu dobrotu Putinej njewopokazamy“, wón doda. Pistorius na to skedźbni, zo njeběchu dotalne pady agresiwne. „Tole pak je wuměnjenje za wojerske zasadźenje“, rjekny minister hladajo na žadanja, zo maja ruske wojerske lětadła při ranjenju powětroweho ruma wottřělić. „Runje tohodla dyrbimy jasnje rjec: Njedamy so prowokować. Smy pak na městnje, zo bychmy ruske lětadła wotpopadnyli a sćerpnje přewodźeli, doniž njejsu powětrowy rum NATO zaso wopušćili“, minister praji. Piloća eurofighterow pak móža powětrowy rum kóždy čas tež aktiwnje zakitować, Pistorius rjekny. Dale měni: „Tole dyrbjało wšěm jasne być, tež Ruskej.“
Financny labyrint
To a tamne (24.09.25)
Socialnych medijow w interneće so wzdać abo znajmjeńša so wot nich zdalować, je za młodostnych prosće njepředstajomne. Přiwšěm to najwjetši dźěl z nich woprawdźe chce. To je naprašowanje instituta Infratest dimap w nadawku załožby Vodafone zwěsćiło. Časy jako běchu młodostni hišće zwólniwi, handy tři dny wotedać, pak su nimo. A tola je wjetšina naprašowanych wosobow za to, zo mobilne telefony na šulach a w rjadownjach zakazaja.
Nic mjenje hač 53,7 tonow wažeše nakładne awto z drjewom w durinskim Gräfethalu, jako je policija kontrolowaše. Zastojnikam bě wočiwidnje přećežke wozydło napadnyło. Waha pokaza, zo je awto 34 procentow ćeše hač dowolene 40 tonow. Přećiwo 43lětnemu šoferej zahajichu pokutne jednanje. Tež lěsniski zawod dóstanje chłostanku.
Hoberski tajfun so bliži
Hongkong/Manila (dpa/SN). Hoberski tajfun „Ragasa“ zawinuje w Aziskej masiwne haćenja na lětanišćach. Jeničce předewzaće Cathay Pacific dyrbi 500 zwiskow šmórnyć. Tež druhe předewzaća dyrbjachu lěty wotprajić. Na juhu Chiny su zamołwići najwyši warnowanski schodźenk wukazali. „Ragasa“ drje jutře z morja přišedši kraj docpěje. Je to mjeztym 18. tajfun w tuchwilnej sezonje. W centrumje orkana zachadźa wichor ze spěšnosću 200 km/h.
Žadyn zběžk francoskeho wójska
Paris (dpa/SN). Informacije w socialnych medijach, po kotrychž je so francoske wójsko přećiwo knježerstwu pozběhnyło a prezidenta Emmanuela Macrona ze stolicy Parisa wuhnało, su wopačne. Na to skedźbnjeja francoske medije. Fota, kotrež pokazuje pochmurjenych francoskich wojakow a oficěrow, pochadźeja z Afriki. Lěta 2019 bě tehdyši premierminister Edouard Philippe tam přebywacych francoskich wojakow wopytał. Foto zadwělowaneho Macrona je tež wobdźěłane.
Wjace dawkow za zamóženja
Tež namócne rozestajenja běchu wčera dźěl demonstracije na dobro ...
Zahaja generalnu debatu UNO
Wadephul warnuje Rusku
New York (dpa/SN). Wonkowny minister Johann Wadephul je Rusku před dalšim ranjenjom powětroweho ruma čłonskich krajow NATO Pólskeje a Estiskeje warnował. „Kóždy dyrbjał wědźeć, zo móžemy stajnje reagować“, rjekny politikar CDU po wurjadnym posedźenju wěstotneje rady UNO ranjenja powětroweho ruma wojerskeho lětadła Ruskeje dla. „Namołwjamy Rusku, zo so njech dalšich agresiwnych akcijow tutoho razu wzda“, Wadephul rjekny. Pólski ministerski prezident Donald Tusk a wonkowny minister Radosław Sikorski běštaj hrozyłoj, zo ruske lětadła abo rakety nad teritorijom Pólskeje wottřěla.
Ruska dale prěje, zo su jeje lětadła powětrowy rum druhich krajow ranili.
Tež Francoska za stat Palestinjanow
New York (dpa/SN). Tež Francoska přichodny stat Palestinjanow připóznawa. Tole je francoski prezident Emmanuel Macron, kaž bě to připowědźił, na konferency za wutworjenje dweju statow do generalneje debaty UNO w New Yorku oficialnje pod wulkim přikleskom zdźělił. Do zetkanja běštej Kanada a Wulka Britaniska palestinski stat formelnje připóznałoj – jako prěnjej čłonaj skupiny sydom wodźacych industrijnych krajow.
„Někotři praja, zo je přezahe. Někotři praja, zo je přepozdźe. Jasne je, zo njemóžemy dlěje čakać“, Macron rjekny. Masaker Hams 7. oktobra je dale hłuboka rana. „Ničo pak njemóže trajacu wójnu w Gazy wusprawnić“, wón zjima.
Tež Belgiska je so w New Yorku iniciatiwje statow přizamknyła a palestinski stat připóznała. Hladajo na dale trajacu wójnu mjez Israelom a islamistiskej Hamas w Gazy wšak njeje tole wjace hač symboliski akt. Israel stat Palestinjanow raznje wotpokazuje, runje tak kaž USA jako najwuši zwjazkar Israela. Wobaj krajej konferencu bojkotujetej.
2026 hišće wjace kreditow
Zwjazkowy sejm wuradźuje wo etaće Němskeje za přichodne lěto
Berlin (dpa/SN). Runje hakle je zwjazkowy sejm etaty jednotliwych ministerstwow za tute lěto wobzamknył. Nětko hižo zaso wo etaće wuradźuja, tónkróć wo financnym planje za 2026.
Etat 2025 běchu po zwrěšćenju amploweje koalicije ze zapozdźenjom wjacorych měsacow schwalili, wón płaći jenož hišće za zbywace tři měsacy lěta. Z etatom 2026 njesmě so tole wospjetować. Zwjazkowe knježerstwo je planam financneho ministra Larsa Klingbeila (SPD) hižo přihłosowało. Nětko so zwjazkowy sejm z nimi zaběra. Jeli so wšitko po časowym planje poradźi, móhł parlament etat 2026 hižo kónc nowembra doskónčnje wobzamknyć. Tak by wón ze spočatkom noweho lěta płaćił.
Klingbeil chce klětu wjace pjenjez wudać hač lětsa, konkretnje 520,5 miliardow eurow (2025: 502,5 miliardow). Jednotliwe ministerstwa bychu rady wo wjele wjace pjenjez k dispoziciji měli, mjez druhim tež wobchadny minister Patrick Schnieder (CDU). Wón chce wjace za wutwar awtodróhow a zwjazkowych dróhow nałožować. Klingbeil jemu radźi, zo ma srědki efektiwnišo zasadźić.
