Wuprajenjasu fantazija
Klingbeil nochce hranicy zawrěć
Přihotuja zetkanje Putina a Trumpa
Moskwa (dpa/SN). Prominentny ruski wonkowny politikar Leonid Sluzki wočakuje zetkanje ruskeho prezidenta Wladimira Putina a prezidenta USA Donalda Trumpa hižo w najblišim času. „Hač februar abo měrc, njech mataj dosć chwile, so dokładnje na zetkanje přihotować. Te pak so bórze wotměje“, rjekny Sluzki, nawoda wonkowneho wuběrka Statneje dumy ruskej powěsćerni interfax. Přihoty zetkanja su „daloko pokročowali“.
Dotal staj Trump a Putin stajnje zaso swoju zwólniwosć wuprajiłoj, so wo rozrisanju konflikta w Ukrainje dorozumić. Konkretne městno a čas pak njejsu dotal mjenowali. Dospołnje njejasne je, kak měło měrowe dojednanje wupadać. Tuchwilu je Ruska wojersce wuspěšna.
USA chłostaja sudnistwo
Washington (dpa/SN). Prezident USA Donald Trump je sankcije přećiwo mjezynarodnemu chłostanskemu sudnistwu (IStGH) wukazał. Sudnistwo je „swoju móc znjewužiwało“, jako je bjez přičiny wukazy zajeća přećiwo israelskemu ministerskemu prezidentej Benjaminej Netanjahuwej a tehdyšemu israelskemu zakitowanskemu ministrej Joavej Galantej wobzamknyło. Trump wumjetuje sudnistwu w tym zwisku „złowólne zadźerženje“. Trump a Netanjahu běštaj so wčera w Běłym domje zatkałoj. USA runje tak kaž Israel mjezynarodne sudnistwo njepřipóznawaja. Gremij bě Netanjahuwej a Galantej w zwisku z wójnu w Gazaskim pasmje wójnske złóstnistwa wumjetowało, wosebje bombardowanje bydlenjow a ciwilneje infrastruktury dla.
Trump je nětko sankcije přećiwo sobudźěłaćerjam sudnistwa wukazał. Trump bě sudnistwo hižo 2020 chłostał, dokelž běchu wójnske złóstnistwa USA w Afghanistanje přepytowali.
Sprjewina galerija bórze hotowa
Hotuja so na róčnicu zničenja
Drježdźany (dpa/SN). Kładźenje wěncow, měrowe nyšpory, koncerty a ćiche wopominanje – w Drježdźanach wopominaja za tydźeń zničenje města w Druhej swětowej wójnje. Składnostnje 80. róčnicy zahubnych powětrowych nadpadow 13./14. februara 1945 chcedźa w měsće nad Łobjom wosebje sylne znamjo za wujednanje a zhromadnosć sadźić. Stać ma so tole tež hladajo na aktualne konflikty w Ukrainje a w Bliskim wuchodźe kaž tež prawicarskeho ekstremizma w Němskej dla, zarjadowarjo zdźěleja.
Pod hesłom „Zhromadnje kedźbliwi“ chcedźa sej wječor zaso dźesaćitysacy ruce zawdać a čłowjeski rjećaz wokoło nutřkowneho města wutworić.
Policija hotuje so hladajo na „sylne mobilizowanje we wšěch lěhwach“ na wjetše zasadźenja w měsće, na dnju samym a sobotu po tym. Wona liči z demonstraciju prawicarjow a z wotpowědnym přećiwnym protestom. Tuchwilu je 13. februara nimale 20 zarjadowanjow planowanych, 15. februara pak wopominanski pochod prawicarjow. Bombowcy aliěrowanych běchu 13. februara 1945 město zničili a 25 000 ludźi morili.
Přidružnicy dale trěbni
To a tamne (07.02.25)
Za wodźidłom swojeho oldtimera je žona w Ludwigshafenje tčacy wostała, dokelž elektriske přestajenje sedła hižo njefungowaše. Sedło hodźeše so jenož hišće doprědka k wodźidłu sunyć, wróćo pak nic wjace. Tež wohnjowi wobornicy sej žaneje rady njewědźachu. Skónčnje wućahnychu wulke hydrawliske nožicy a žonu wuswobodźichu. Kelko škody su w drohim awće zawostajili, njeje znate.
Šlagrowy spěwar Heino je čestny hósć Semperoweho operoweho bala dźensa wječor w Drježdźanach. 86lětny njebě hišće ženje na tutym balu a so přewšo wjeseli, nowiny pisaja. Loni bě Heino hósć Wienskeho operoweho bala. Spěwać wšak zastupnik jakneho němskeho šlagra w Drježdźanach njebudźe. Za to pak wočakuja jeho w kruhu prominentnych na čerwjenym přestrjencu a na rozmołwje z čestnymi hosćimi.
Pjeć lět „Sorbisch? Na klar.“
Drježdźany/Budyšin (SN). Dźensa před pjeć lětami su na žurli Serbskeho domu w Budyšinje oficielnje kampanju „Sorbisch? Na klar!“ zahajili. Kaž su woprašowanja ludźi njedawno wobkrućili (Serbske Nowiny su rozprawjeli), je kampanja akceptancu serbšćiny w zjawnym rumje Łužicy polěpšowała. Zamołwići kampanje su dźensa w socialnych syćach „wulkotnej syći partnerow, podpěraćelam a wjele ludźom“ dźakowali, „kotřiž ze swojej horliwosću za serbšćinu a serbsku kulturu pokazuja, štož Łužicu wučinja.“ Woni su přilubili, tež přichodne lěta so wo to starać, zo wostanje naša rěč widźomna.
Kulturna ministerka Barbara Klepsch (CDU), kotraž běše tež na zahajenju před pjeć lětami přitomna, wčera zwurazni, zo posrědkuje serbšćina identitu a žiwu kulturnu mnohotnosć we Łužicy. Kampanja „Sorbisch? Na klar.“ tule w Němskej jónkrótnu mnohotnosć zesylnja. Ministerka pokaza na wuslědki woprašowanja wo kampani, zo maja 75 procentow ludźi serbsku rěč a kulturu za wobohaćenje regiona, kotrež tež turistisku atraktiwitu Łužicy stopnjuje.
Scholz: Sym na dobrym puću
Berlin (dpa/SN). Zwjazkowy kancler Olaf Scholz (SPD) je přeswědčeny, zo je wón při wobmjezowanju njeregularneje migracije na dobrym puću. „Sym pomjezne kontrole wukazał, sym so wo to postarał, zo su při mjezach 40 000 ludźi wotpokazali. Ličba za azylom pytacych je wo třećinu woteběrała“, rjekny Scholz nowinarjam. Runočasnje wón kanclerskeho kandidata CDU/CSU Friedricha Merza kritizowaše, kiž bě přihłosowanje AfD w zwjazkowym sejmje akceptował.
Israel wustupi z rady UNO
Jerusalem (dpa/SN). Israel je wot prezidenta USA Donalda Trumpa připowědźeny wustup z rady UNO za čłowjeske prawa witał a so tutej kročeli přizamknył. Rada z hłownym sydłom w Genfje „jeničku demokratiju na Bliskim wuchodźe Israel runjewon agresiwnje zasudźuje“, piše wonkowny minister Gideon Saar na platformje X. Israel su z wjace hač sto rezolucijemi zasudźili, wjace hač Iran, Kuba, Sewjernu Koreju a Venezuelu hromadźe“, Saar piše. Tole Israel dlěje njećerpi.
London podpěruje Ukrainu
