Woclownjemaja wulke ćeže
Brüssel (dpa/SN). We woclownjach Sakskeje přiběra strach před wikowanskej wójnu, zdźěla tež wo eksistencu. Připowědźene cła 25 procentow ze stron USA njejsu za branšu ani najwjetši problem. Wysoke płaćizny miliny a płuna zamołwitych najbóle bola. „To je hotowa błudnosć“, rjekny šef dohladowanskeje rady Freitalskeje woclownje Sönke Winterhager. W Francoskej płaći energija połojcu, w USA dźesaćinu. Nětko přidruža so hišće cła USA. Zo bychu financne straty wobmjezowali, wotpinu we woclownjach w tajkim času na bursach kachle.
Europska unija wočakuje, zo so kraje, kotrež su wocl dotalnje do USA předawali, přichodnje na EU měrja.
Krajny sejm etat wobjednawał
Drježdźany (dpa/SN). Sakski krajny sejm je dźensa prěni raz wo naćisku dwójneho etata za lěće 2025 a 2026 wuradźował. Knježerstwo bě jón 24. měrca předstajiło a krajnemu sejmej zapodało. W naćisku planuja wudawki 25 miliardow eurow. Po wjele lětach chce Sakska ličbu statnje přistajenych nětko zaso znižić.
Financny minister Christian Piwarz (CDU) rěči wo bolostnych skrótšenjach we wjacorych wobłukach. Najebać to wobsahuje etat tež inwesticije do přichoda. Financowanje wučerjow w swobodnym staće skrótšenja njenazhoni. Sakska dyrbi deficit 4,3 miliardy eurow wurunać. Třećina etata ma komunam słužić. Přiběrace socialne wudawki budget najbóle poćežuja.
Trump razne cła wukazał
Washington (dpa/SN). Prezident USA Donald Trump je hoberski paket cłow wukazał, kotryž Europsku uniju wosebje raznje trjechi. Za wšitke importy z EU žadaja sej w USA wotnětka 20 procentow cła, za awta samo 25 procentow. Je to dotal najagresiwniša a najskutkowniša kročel we wikowanskej politice prezidenta USA. Nowe cła swětowe hospodarstwo bjez dwěla bolostnje poćežuja – wikowanska wójna je njewobeńdźomna. „Woni wotkasěruja. Je zrudne, tole widźeć“, Trump rjekny. Z nowymi cłami chce Trump „wuklukowanje, wumocowanje a wurubjenje USA“ ze stron druhich krajow skónčić a złotu dobu w stawiznach kraja zahajić.
Europska unija přihotuje mjeztym hižo swójske naprawy, je pak přiwšěm zwólniwa, dalše rozmołwy wjesć. Tole je prezidentka komisije EU Ursula von der Leyen připowědźiła. Uniwersalne cła přećiwo wšemu swětej su razny dyr za swětowe hospodarstwo z hoberskimi sćěhami. „Miliony ludźi dyrbja z wyšimi płaćiznami žiwidłow ličić“, wona praji.
Hdyž šulerjo šoferow powuča
Policisća a šulerjo kontroluja spěšnosć před šulemi w Sakskej
Radeberg (dpa/SN). Zhromadnje ze šulerjemi policija tutón a přichodny tydźeń nadróžny wobchad před zakładnymi šulemi w Sakskej kontroluje. „Dźe wo wobchadnu wěstotu dźěći. Wone su ći najmjeńši w nadróžnym wobchadźe a tež najsłabši“, rjekny sakski minister za nutřkowne naležnosće Armin Schuster (CDU) při oficialnym zahajenju projekta „Blitz für kids“ wčera w Radebergu.
Minjenych 30 lět su njezboža z dźěćimi wo 60 procentow znižili. „To je zaměr tajkich akcijow“, wón doda. Před šulemi chcedźa šoferow sensibilizować.
Kondomy a krizy
Serbske nałožki w sejmje předstajili
Winicarjo wočakuja dobre lěto
Lipsk (dpa/SN). Lěto 2024 njebě za sakskich winicarjow dobre. Pózdne nócne zmjerzki běchu kónc apryla wulke straty zawinowali. „Wokomiknje je połoženje měrne. Minjene tydźenje bě wjedro wo tójšto chłódniše hač loni. Tuž je situacija přirody tuchwilu normalna“, rjekny Felix Hößelbarth, předsyda zwjazka sakskich winicarjow.
Loni běchu prućata miłeho wjedra dla něšto tydźenjow do toho hač hewak wubiwali. Potom bě pózdni zmjerzk posledni tydźeń apryla w sakskich winicach razne škody naparał. Zdźěla bě hač do 80 procentow kćenjow zničił. Tuchwilu žadyn strach njewobsteji, Hößelbarth potwjerdźi. Hdyž woprawdźe zaso zmjerzki hroža, winicarjo wo wotpowědnych naprawach rozmysluja.
To a tamne (03.04.25)
Šlinkam je tuchwilu přesuche. Populacija je drje z poměrnje wysokej ličbu do lěta 2025 startowała, suchota w februaru a měrcu pak wuwiće šlinkow tuchwilu haći. To fachowcy Senckenbergskeho slědźenišća w Frankfurće zwěsćichu. Inwazija kaž loni wokomiknje njehrozy, byrnjež małe šlinki hižo widźeć byli.
Bywši nawjedowanski bunker nutřkowneho ministerstwa NDR w Freudenbergu na sewjeru Braniborskeje móžeš kónc tydźenja zaso wopytać. „Bunker 7001 je dźěl widźomnych stawiznow NDR“, organizatorojo wodźenjow zdźěleja. Bunker běchu 1986 dotwarili. Wón skići 200 ludźom městno. W nim chcychu w padźe wójny zjawne žiwjenje w NDR nawjedować. Něhdźe 400 telefoniskich syćow zwjazowaše objekt z policiju, wójskom a statnej wěstotu. Hač do 1989 běchu w nim dwójce wšě wotběhi zwučowali.
Zajimy zawodow wobkedźbować
Berlin (dpa/SN). Z naležnym apelom namołwja hospodarstwo Němskeje uniju CDU/CSU a SPD, zajimy předewzaćow w koaliciskich jednanjach sylnišo wobkedźbować. Němska tči w ćežkej hospodarskej krizy, kotruž je z wulkeho dźěla sama zawinowała, rěka w zhromadnej deklaraciji sto hospodarskich zwjazkow. „Wobdźělnikow koaliciskich jednanjow pak tole wočiwidnje njestara. Dotalne wuslědki su njedosahace w napjatemu połoženju zawodow njewotpowěduja.“
Podpěruja namjet ćěkancow dla
Berlin (dpa/SN). W rjadach CDU/CSU podpěruja namjet, indiwidualne prawo na azyl wotstronić a město toho wobmjezowanu ličbu migrantow w Němskej přiwzać. Prezident Zwjazkoweho zarjada za migraciju a ćěkancy, Hans Eckhard Sommer, bě so za to wuprajił, wjace migrantow po ryzy čłowjeskich směrnicach přiwzać, štož by wosebje žony a dźěći potrjechiło. Parlamentariski jednaćel frakcije CDU/CSU Thorsten Frei ma namjet za „wažny přinošk“ noweje politiki.
Sudnistwo rozsudźi klětu
