Z „Jězusowymi črijemi“
New York (B/SN). Firma za produktowy design je tak mjenowany „Jězusowy črij“ kreěrowała a z hrónčkom „Walk on water“ (Běž po wodźe) za to wabiła. Wone 25 porow čriji wupadaja kaž sportowe črije a běchu spočatk oktobra w běhu minutow wupředate. 97 komorkojtych pucherjow w póduši běhanskich čriji su ze swjećenej wodu z rěki Jordana pjelnjene. Křižik debi šnórowanje, zady na jazyku je čerwjeny dypk, symbolizowacy krej Jězusa. Na wonkownej stronje wobeju čriji je w čornej barbje napisane MT.14:25. To je pokazka na sćenje swj. Mateja w Nowym zakonju a poćahuje so na to, zo bě Jězus po morju kročo so k stražnikam bližił, kotřiž pak spachu. Jězus jich wustróžanych tróštowaše ze słowami: „Njebojće so, ja to sym!“ Por Jězusowych čriji płaćeše 3 000 dolarow.
Wosady hromadu połožili
Płaćizny dla so dojednali
Berlin (dpa/SN). Wuhlikowy dioksid we wobchadźe a twarjenjach ma so po lěće 2025 jasnišo podróšić, hač dotal wotmyslene. W lěće 2021 chcedźa jón z 25 eurami wo wjele raznišo město planowanych dźesać eurow podróšić. Na to su so zastupnicy Zwjazka a zwjazkowych krajow dojednali. Hač do lěta 2025 ma płaćizna na 55 eurow rozrosć. Tak maja so fosilne palne maćizny podróšić, nowe energije pak potuńšić.
Erdoğan hrozy USA
Istanbul (dpa/SN). Turkowski prezident Recep Tayyip Erdoğan ma za móžne, dale wobstejacych napjatosćow mjez Washingtonom a Ankaru dla wojerske zepěranišća USA w Turkowskej zawrěć. To je wón turkowskim nowinarjam rjekł. Potrjechenej byštej lětarske zepěranišćo İncirlik a radarowa stacija Kürecik byłoj. Dyrbjeli-li „naprawy kaž sankcije“ přećiwo Turkowskej płaćiwosće nabyć, chcył Recep Tayyip Erdoğan na to wotpowědnje wotmołwić, kaž wón podšmórny.
Kipping: Radšo tunje jězdźenki
Něhdźe 350 čłonow sakskich powołanskich a hórniskich towarstwow ...
Ruska: USA wina na zwrěšćenju zrěčenja INF
Moskwa (dpa/SN). Ruska ma nowy test balistiskeje rakety USA za dopokaz, zo je Washington wina na zwrěšćenju wažneho wotbrónjenskeho zrěčenja INF. „Smy wospjet rjekli, zo so zjednoćene staty hižo dołho na to hotuja, postajenja INF ranić“, zdźěli rěčnik Krjemla Dmitrij Pjeskow minjeny pjatk w Moskwje powěsćerni Tass. „Kaž najnowši test wobkruća, buchu dojednanja na iniciatiwu USA woprawdźe ranjene.“
Po informacijach zakitowanskeho ministerstwa USA su raketu minjeny štwórtk na lětarskim wojerskim zepěranišću Vandenberg na zapadnym pobrjohu kraja mjez San Franciscom a Los Angelesom startowali. Hižo na prěni start rakety spočatk septembra, jenož něšto dnjow po skónčenju wupowědźenskeje doby, bě Moskwa podobnje reagowała. Wona měješe tehdy za dopokazane, zo su USA nowe rakety hižo twarili, jako bě zrěčenje wo jich zakazanju hišće płaćiwe.
Přesłapjenje po klimowym wjeršku
Madrid/Berlin (dpa/SN). Po snadnych wuslědkach swětoweje klimoweje konferency w Madridźe sej němscy politikarjo žadaja, w boju přećiwo woćoplenju zemje njepopušćić.
Frakciski šef Zelenych w zwjazkowym sejmje Anton Hofreiter rjekny, Němska měła nětko ćim bóle wodźacu rólu w klimowej politice přewzać, „runje, dokelž su wuslědki klimoweho wjerška tak přesłapjace“.
Klimowa aktiwistka Luisa Neubauer je hladajo na wuslědki wjerška přesłapjena, tež přinoška Němskeje dla. W Berlinje njejsu wočiwidnje na žadanja młodźinskeho hibanja Fridays for future a dalšich škitarjow klimy słuchali, rjekny wona powěsćerni dpa. „Smy cyłe lěto wšitko činili, zo bychmy staw wědomosće a zwólniwosć ludźi na dróhu přinjesli. Prašam so, što bychmy hišće činić dyrbjeli?“ Přesłapjena njeje Neubauer jenož wot USA a Brazilskeje, ale předewšěm wot Němskeje a Europskeje unije. Tute kraje móhli dopokazać, „zo su problem zrozumili a zo přewozmu zamołwitosć“.
Fachowcy z wukraja pytani
Wjerškowe zetkanje w kanclerskim zarjedźe
Berlin (dpa/SN). Zwjazkowa kanclerka Angela Merkel (CDU) je sej wěsta, zo budźe Němska přichodne lěta dale a bóle na to pokazana, zo připućuja fachowcy zwonka Europskeje unije do kraja. Politikarka warnowaše do dźensnišeho wjerškoweho zetkanja ze zastupnikami hospodarstwa w Berlinje před drastiskimi wuskutkami hladajo na pobrachowacych fachowcow w mnohich powołanjach. „Znajemy tójšto rjemjeslnikow, kotřiž zadwělowani za fachowcami pytaja“, rjekny Angela Merkel w swojim tydźenskim widejowym poselstwje. „Tohodla dyrbimy so wo fachowcow starać, hewak so předewzaća druhdźe zasydla, štož wězo tež nochcemy“, wona zwurazni.
1. měrca 2020 budźe nowy zakoń wo zapućowanju fachowcow płaćiwy. Tón ma kwalifikowanym fachowcam zwonka Europskeje unije puć do Němskeje runać. Zastupjerjo zwjazkoweho knježerstwa, krajow, hospodarstwa a dźěłarnistwow schadźowachu so dźensa w kanclerskim zarjedźe. Tam dźěše wo to, kak móhli nowy zakoń spěšnje zeskutkownić a fachowcow prawje bórze do Němskeje nawabić.
Policajska šula ma nětko slědźenski institut
To a tamne (16.12.19)
Škleńčanu hodownu pyramidu z 5 038 palencowych blešow su w Schleswigsko-Holsteinskej natwarili. Wjace hač 20 muži trjebaše dwaj dnjej, zo bychu 6,50 metrow wysoki twar w Bendorfje we wokrjesu Rendsburg-Eckernförde zdokonjeli. Zezběrali běchu bleše pola hosćencarjow a na wjesnych swjedźenjach. Nětko chcedźa so naprašować, hač maja wuhlady na zapis do Guinnessoweje knihi rekordow.
Pěskowčik je rumpodicha wopytał. Wobaj postrowištaj so sobotu w braniboskim Himmelpforće, hdźež ma rumpodich swoju póstowu filialu. Pěskowčik rozhladowaše so tež po hodownych wikach. Wobaj lubuškaj dźěći swjećitaj lětsa jubilej: Pěskowčik bu w nowembru 60 lět, rumpodich přijimuje mjeztym 35 lět listy dźěći. Tam dochadźeja hodowne přeća dźěći ze wšeho swěta, na kotrež rumpodich swěru wotmołwja.
Staty EU so klimy dla dojednali
Brüssel (dpa/SN). Čłonske staty EU su so minjenu nóc na kompromis škita klimy dla hač do lěta 2050 dojednali. Při tym přizwolichu Pólskej wosebity status. Zwjazkowa kanclerka Angela Merkel (CDU) bě spokojom, „hladajo na wobstejnosće“, kaž rjekny. Hłowny zaměr je, hač do lěta 2050 Europu klimje napřećo neutralnu sčinić a škódnym maćiznam w atmosferje zadźěwać. Namjet Čěskeje, atomowu energiju jako „zelenu milinu“ připóznać, su wjacore staty EU wotpokazali.
Hišće tójšto konfliktow
Madrid (dpa/SN). Swětowy klimowy wjeršk w Madridźe je w kónčnej a rozsudnej fazy. Po informacijach wobdźělnikow a wobkedźbowarjow wobsteji pak do dźensa wječor planowaneho zakónčenja konferency hišće tójšto konfliktow. Je tuž móžno, zo wjeršk podlěša. Tak njejsu sej přezjedni, hač móhli hižo nětko nowe klimowe zaměry hač do lěta 2030 wukazać. Po Pariskim klimowym zrěčenju je to hakle klětu planowane.
Ludomordarstwo připóznate
Płoty přećiwo swinjacej mrětwje stajeć?
Podstupim (dpa/SN). Budźe so Braniborska z płotami podłu němsko-pólskeje mjezy přećiwo afriskej swinjacej mrětwje škitać? Wo tym móhli po informacijach braniborskeho ministerstwa za škit přetrjebarjow hišće kónc tydźenja rozsudźić. Dźensa su so fachowcy Zwjazka, Pólskeje a podłu pólskeje mjezy ležacych zwjazkowych krajow zetkali, zo bychu wo tym wuradźowali, kaž ministerka za škit přetrjebarjow Ursula Nonnemacher (Zeleni) zdźěli. Po tym chcedźa doskónčnje rozsudźić, hač Braniborska płoty nastaji.
Płoty we wobjimje 150 kilometrow je kraj Braniborska hižo wobstarał, rjekny Nonnemacher. K tomu přińdu po jeje słowach wudawki wokrjesow za płoty. Tuchwilu je „dosć materiala“, ministerka praji. 150 000 do 225 000 eurow je kraj za płoty hižo wudał. Mobilne płoty hodźa so spěšnje nastajić a zaso wottwarić. Planowane su zawěry podłu škitnych naprawow přećiwo wulkej wodźe a podłu němsko-pólskeje mjezy.
