Budyšin (SN/bn). Spěchowanski kruh za serbsku ludowu kulturu zarjaduje kóždolětnje dźesać dnjow po popjelnej srjedźe resp. pjeć tydźenjow do jutrow tradicionalne Serbske jutrowne wiki w Budyskim Serbskim domje. Lětsa pokazuje potajkim 24. a 25. februara „dohromady 45 serbskich a němskich ludowych wuměłcow z Hornjeje, srjedźneje a Delnjeje Łužicy, mjez nimi žony we swojej pyšnej serbskej drasće, kak so typiske serbske jutrowne jejka debja. Lubowarjo tutych drohoćinkow a zajimowani hosćo změja móžnosć, sej z wulkeho wuběrka jutrowne jejka z charakteristiskimi motiwami a barbami kupić“, zarjadowace towarstwo zdźěla.

Choćebuz/Lipsk (SN/bn). Delnjołužiska, mjez druhim we wobłuku festiwala „Women in jazz“ a z Němskim rockowym a popowym mytom wuznamjenjena šansoneta Lena Hauptmann zakónči swój studij jazzoweho spěwanja ze zjawnym pruwowanskim koncertom. W minjenych lětach bě so na Lipšćanskej wysokej šuli za hudźbu a dźiwadło „Felix Medelssohn Bartholdy“ pod nawodom Pascal von Wroblewsky a Evelyn Fischer w swojim předmjeće wukmaniła. Z Baršća pochadźaca absolwentka Delnjoserbskeho gymnazija Choćebuz připowědźi „mnohostronski program z jazzom, brazilskej hudźbu a swójskimi kompozicijemi“, do kotrychž je so „za čas studija zalubowała“ resp. kotrež je sama napisała. Program skulojćeja „łaćonskoameriske rytmy a filigrana popowa melodika“, z přinoškami chce wona „multilingualnje mjez serbskej, portugalšćinu a jendźelšćinu so wotměnjejo pop a jazz bjezpo­srědnje do so ćeć dać“. Po jeje słowach jedna so wo „hudźbu, kotraž do wucha dźe; a teksty, wotbłyšćowace stawiznički ze žiwjenja wuměłče, kotraž sej při pisanju žane stilistiske hranicy njestaja“.

Šěsć solistow ze šěsć krajow wuhotowa w Budyšinje wohniwy festiwal

Zawěrno njewšědny wuměłski temperament tući komornohudźbni solisća wuprudźeja: Wiolinistka Franziska Pietsch, w lěće 1969 w Halle nad Solawu narodźena, we wuchodnym Berlinje wukubłana a jako wosebje talentowana a spěchowana hudźbnica wopušći wona swoju NDRsku domiznu a pokročowaše swoju zažnu karjeru w zapadnej Němske; z Tel Aviva pochadźaca cellistiska Hila Karni, japanska pianistka Maki Hayashida, w swojej španiskej domiznje wulce česćeny a tohorunja mjezynarodnje nastajeny pianist Josu de Solaun kaž tež spočatnje w Istanbulu a potom w Němskej wukubłany turkowski bračist Atilla Aldemir. Wot 26. hač do 28. wulkeho róžka wuhotowa tuta horliwa šestka na swjedźenskej žurli Serbskeho muzeja w Budyšinje festiwal „Klasika w zymje“, z kotrymž ze swojej intensitu hudźenja napjate připosłucharstwo jenož njezahori, ale samo wobkuzła.

Budyšin (SN/bn). We wobłuku Budyskich mjedowych tydźenjow je pčołar Günter Sodan z přednoškom „Hadam Bohuchwał Šěrach – přez jeho wědu sta so pčołka z domjacym zwěrjećom“ wčera něhdźe 20 zajimcam na žurli Budyskeho Serbskeho domu aktualny staw swojeho slědźenja wo załožerju moderneho pčołarstwa rozłožił. Hosćićel referata bě župa „Jan Arnošt Smoler“.