Serbska identita ze spektakularnymi choreografijemi a modernymi ...
Budyšin (SN/bn). Serbski ludowy ansambl je předwčerawšim rejowanski kruch „Smy! Bin ich?“ prapremjernje na swojej wupředatej žurli w Budyšinje předstajił. Produkcija bu po słowach intendanta SLA Tomasa Kreibicha-Nawki „po połdra lěće přihota zwoprawdźena“ a wotbłyšćuje „sensibelnu temu, što serbskosć wučinja“. W tym zwisku dźakowaše so předewšěm wosobinam, kotrež běchu „zwólniwe, před kameru prašenje za serbskej identitu rozjimać“. Wurězki tak nastatych interviewow – nahrawanja wopřijimaja dohromady něhdźe 20 hodźinow – tworja žro inscenacije. Wuprajenjam wuznawacych so Serbow steja mysle mjezynarodnych wobdźělnikow napřećo, kotřiž swój wid na tudyši awtochtony lud w přirunowanju nastupajo (připóznate) mjeńšiny w swojej domiznje posrědkuja. Ćežišćo zaběraja při tym ludowe reje, kajkež su na přikład za rozdźělne regiony w Italskej, Šwedskej, Awstralskej abo Chorwatskej charakteristiske. Raz z hudźbu, raz bjez njeje podawa balet SLA wotpowědne přikłady, kotrež rejowane pokazki na (pječa) typiske serbske wašnja a tradicije kontrastuja.
„Juro“ a „Matej“ kaž w rozhłosu
Budyšin (SN/bn). We wobłuku posedźenjow wědomostneje přirady, kuratorija a towarstwa Serbskeho instituta (SI), z kotrymiž so stajnje nazymu dźěłowy plan slědźenišća za slědowace lěto přihotuje, wotmě so wčera zjawny přednošk „Technology meets language – Předčitanska funkcija za delnjo- a hornjoserbšćinu“ na žurli Budyskeho Serbskeho muzeja. Něhdźe 50 zajimcow powitawši podšmórny direktor SI prof. Hauke Bartels wuznam „slědźenskeho projekta, kotryž je nowe dopóznaća a daty nastupajo serbšćinu wujewił“ a podźakowa so Sakskemu statemu ministerstwu za wědomosć, kulturu a turizm za „šćedriwe spěchowanje předewzaća w minjenych šěsć lětach“.
Wulkotny hudźbny swjedźeń
Wuspěšnje wubědźowanje etniskich mjeńšinow po wašnju Eurovision song contesta na Korsice
Pjatk, 23. nowembra, wotmě so 14. wudaće „mjeńšinoweje Eurowizije“ LIET International, tónraz w měsće Bastia na kupje Korsika. Njehladajo njewjedra, kotrehož dla so wjacori wobdźělnicy zapozdźichu, wotmě so wulkotny hudźbny swjedźeń. Žurla Sala Centru Culturale Alb‘oru bě z wjace hač 300 wopytowarjemi połnje wobsadźena, cyłkownje dźesać wuměłcow/cyłkow je na jewišću wustupowało. Wothłosowali su přihladowarjo online kaž tež mjezynarodna jury na městnje. Kaž pola „wulkeho ESC“ njesmědźachu za „swojich“ kandidatow hłosować. Handrij Špitank ze Serbskeho rozhłosa bě tuž jako čłon jury za přinošk „Foarby“ Melissy Pander ze Zapadneje Friziskeje wotěrował, wuzběhnywši jeje „přewšo wysoki profesionelny niwow“. Najwjace hłosow a z tym hłowne myto „Spěwacy ptak“ kaž tež šek we wysokosći 3 000 eurow pak zdoby sej Nani Vazana. „Una Segunda Pie“, jeje spěw „wo přichodźe do smjerće“, přeswědči jurorow z „njewšědnje zabawjacym motiwom a mystiskim zmysłom“.
Wojerecy wuměłsce w Budyšinje
Wobstajny proces „ćahanja ludow“
Budyšin (SN/bn). Pod nadpismom „Stawizny a migracija w namrětych kajkosćach (Erbgut)“ je Maćica Serbska wčera poslednje zarjadowanje lětušeje Maćičneje akademije w Budyskim Serbskim domje wuhotowało. Wědomostnicy Lipšćanskeho Maxa Planckoweho instituta za ewolucionarnu antropologiju prof. dr. Johannes Krause, dr. Zuzana Hofmanová a dr. Joscha Gretzinger předstajichu „prěnje dopóznaća“ aktualneho interdisciplinarneho slědźenskeho projekta wjacorych europskich fachowych institucijow, w kotrehož wobłuku přepytuja „na zakładźe archeogenetiki přewróty a změny čłowječeje populacije za čas tak mjenowaneho ćahanja ludow“.
„Palenc“ mjeztym ze standardom
Před 20 lětami je huslacy spěwytwórc Geigerzähler swój debitowy album „Dagegen!“ wudał. Róčnica bě jemu z přiležnosću, zynkonošak znowa wudać, a to na kaseće kaž tež digitalnje. Za tak mjenowanu record-rerelease-party je sej minjeny pjatk sep hosći přeprosył, z kotrymiž je w zašłymaj lětdźesatkomaj zhromadnje wustupował.
Berlin (SN/bn). „Nawjazujo na poklaty čas korony“ zahajichu z balkona zynki pozawny a tuby koncert nad Berlinskim klubom Fischladen. W měnjacych so wobsadkach kaž tež solistisce předstaji Geigerzähler na to w kopaće połnym etablissemenće wjerški swójskeje diskografije, mjenujo swoje twórby „zhudźbnjenje towaršnosće“. Mjez druhim prezentowaše wón spěwy ćělesow, kotrejž „drje njebuštej ženje rozpušćenej, ale tuchwilu jenož hišće wuwzaćnje wustupujetej“. Tak zaklinčeštej w originalnej zestawje na přikład spěw „Začiń durje“ Berlinskeje dróhi a hit skupiny Atze Wellblech „Heul doch, Nazi“, kotrehož refrain bjezmała wšitcy přitomni sobu skanděrowachu.
